ەلىمىزدىڭ عالىمدارى تۋبەركۋلەزگە قارسى تەڭدەسى جوق ءدارى ويلاپ تاپتى

استانا. 19 ماۋسىم. عالىمدارىمىز تۋبەركۋلەزگە قارسى الەمدە تەڭدەسى جوق ءدارى جاساپ شىعاردى. ورتالىق كوممۋنيكاتسيالار قىزمەتىندە وتكەن بريفينگتە «جۇقپالى اۋرۋلارعا قارسى پرەپاراتتار عىلىمي ورتالىعى» اكتسيونەرلىك قوعامىنىڭ پرەزيدەنتى الەكساندر يلين وسىلاي دەپ مالىمدەدى. بۇل تۋرالى i-news.kz حابارلادى. ا.ءيليننىڭ ايتۋىنشا, تۋبەركۋلەزبەن اۋىراتىن ادام ەف-ەس-1 پرەپاراتىن قابىلداسا 2 ايدىڭ ىشىندە دەرتىنەن قۇلان تازا ايىعىپ شىعادى. سونداي-اق, ول: «GLP ستاندارتى تەحنيكالىق رەتتەۋ نىساندارى رەتىندە تەك ءدارى-دارمەكتەردى عانا ەمەس, سونىمەن قاتار باسقا دا سالالاردى قامتيدى. ولاردىڭ قاتارىندا حيميالىق ونەركاسىپ, اۋىلشارۋاشىلىعى سالاسى, ۆەتەرينارلىق ءدارى-دارمەكتەر بار. اتالعان ستاندارت وتاندىق ءونىمنىڭ باسەكەگە قابىلەتتىگىن ارتتىرادى جانە ونىڭ حالىقارالىق نارىققا شىعۋىنا مۇمكىندىك بەرەدى», – دەدى. ەف-ەس-1 پرەپاراتىن جاساۋشى عىلىمي توپتىڭ جەتەكشىسى مۇرات قۇلمانوۆ: «قازىرگى ءبىز كلينيكالىق سىناقتىڭ ءۇشىنشى كەزەڭىنە كىرىسۋدەمىز», – دەدى. جۇقپالى اۋرۋلارعا قارسى پرەپاراتتار عىلىمي ورتالىعى» اكتسيونەرلىك قوعامى ءوزىنىڭ GLP حالىقارالىق ستاندارتىنا سايكەستىگىن دالەلدەپ وتىر. قازىر بۇل ورتالىق تمد اۋماعىندا عىلىمي زەرتتەۋلەر جانە يننوۆاتسيالىق ءدارى-دارمەكتەر وندىرۋمەن اينالىساتىن بىردەن-ءبىر ۇيىمعا اينالدى. بۇگىندە مۇندا 200-گە جۋىق ادام جۇمىس ىستەيتىن 10 زەرتحانا بار. پارلامەنت ءماجىلىسىنىڭ دەپۋتاتى نادەجدا پەتۋحوۆا: «بىزگە الەمدەگى دامىعان 30 ەلدىڭ قاتارىنا قوسىلۋ كەرەك. وعان تەك وزىق ەكونوميكامىزبەن عانا ەمەس, عىلىمداعى ساپالى جەتىستىگىمىزبەن دە بارۋىمىز كەرەك. بۇل تۇرعىدان كەلگەندە حالىقارالىق ستاندارتتارعا جاۋاپ بەرەتىن تاجىربيەلىك زەرتحانا ءبىزدىڭ عىلىمىمىزدىڭ ۇلكەن جەتىستىگى سانالادى», – دەدى. تاعى ءبىر ايتا كەتەر ءجايت, «جۇقپالى اۋرۋلارعا قارسى پرەپاراتتار عىلىمي ورتالىعى» اكتسيونەرلىك قوعامى كەلەشەكتە كادرلىق جانە وندىرىستىك جاعىنان ورتا ازياداعى العاشقى جانە بىردەن-ءبىر GLP-حالىقارالىق تالاپتارعا ساي ورتالىق بولىپ قالۋى مۇمكىن. جولدىباي بازار. دەرەككوز: i-news.kz. فوتو: Livejournal.com.