جيىنعا «قازاقستان حالىق پارتياسى» قوعامدىق بىرلەستىگىنىڭ توراعاسى ەرمۇحامەت ەرتىسباەۆ, وبلىستاردىڭ, استانا, الماتى جانە شىمكەنت قالالارىنىڭ اۋماقتىق سايلاۋ كوميسسيالارى (بەينەكونفەرەنتسيا رەجىمىندە) جانە بۇقارالىق اقپارات قۇرالدارىنىڭ وكىلدەرى قاتىستى. سونداي-اق باس پروكۋراتۋرا, ادىلەت, ىشكى ىستەر, قارجى مينيسترلىكتەرىنىڭ جاۋاپتى لاۋازىمدى تۇلعالارى, ەۋروپاداعى قاۋىپسىزدىك جانە ىنتىماقتاستىق ۇيىمىنىڭ دەموكراتيالىق ينستيتۋتتار جانە ادام قۇقىقتارى بيۋروسىنىڭ (ەقىۇ/دياقب) سايلاۋدى بايقاۋ ميسسياسىنىڭ وكىلى شاقىرىلدى.
ورتالىق سايلاۋ كوميسسياسىنىڭ توراعاسى نۇرلان ءابدىروۆ ەلىمىزدە تىركەلگەن 7 ساياسي پارتيانىڭ بارلىعى پارتيالىق تىزىمدەر بويىنشا پارلامەنت ءماجىلىسى دەپۋتاتتارىنىڭ سايلاۋىنا قاتىسۋعا جىبەرىلگەنىن مالىمدەدى. سونداي-اق ول 1 اقپاندا وسك-عا پارلامەنت ءماجىلىسى دەپۋتاتتارىن سايلاۋعا پارتيالىق ءتىزىمدى ۇسىنۋ تۋرالى قازاقستان حالىق پارتياسىنىڭ قۇجاتتارى تاپسىرىلعانىن ەسكە سالدى. ورتالىق سايلاۋ كوميسسياسى سايلاۋ زاڭناماسىنا سايكەس كانديداتتاردىڭ كونستيتۋتسيامەن جانە سايلاۋ تۋرالى كونستيتۋتسيالىق زاڭمەن قويىلاتىن تالاپتارعا سايكەستىگىن اڭىقتاۋ بويىنشا ءتيىستى راسىمدەر جۇرگىزدى.
ورتالىق سايلاۋ كوميسسياسىنىڭ مۇشەسى شاۆكات وتەمىسوۆ «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 89-بابىنا سايكەس تىركەۋگە ءبىر ساياسي پارتيادان ءبىر عانا ءتىزىم جىبەرىلەتىنىن, وعان ساياسي پارتيالار اراسىندا بولىنەتىن دەپۋتاتتىق مانداتتاردىڭ بەلگىلەنگەن سانىنىڭ 30 پايىزدان اسپايتىن ادامدار سانى ەنگىزىلگەنىن حابارلادى. پارتيالىق تىزىمدە ايەلدەر, جاستار جانە مۇگەدەكتىگى بار ادامدار سانى جيىنتىق بويىنشا وعان ەنگىزىلگەن ادامداردىڭ جالپى سانىنىڭ كەمىندە 30 پايىزىن قۇراۋعا ءتيىس.
بەلگىلى بولعانداي, قازاقستان حالىق پارتياسى 52 ادامنان تۇراتىن پارتيالىق ءتىزىمدى ۇسىنعان. تىزىمدەگى 17 كانديدات ايەلدەر, جاستار جانە مۇگەدەكتىگى بار ادامدار ساناتقا جاتادى, ياعني تالاپقا سايكەس 32,7 پايىزدى قۇرايدى. پارتيالىق تىزىمگە ەنگىزىلگەن بارلىق ادامدار كونستيتۋتسيا مەن سايلاۋ تۋرالى كونستيتۋتسيالىق زاڭنىڭ تالاپتارىنا سايكەس كەلەدى.
شاۆكات وتەمىسوۆ پارتيالىق تىزىمدەردى ۇسىنعان ساياسي پارتيالار پارتيالىق تىزىمگە ەنگىزىلگەن ءاربىر ادام ءۇشىن زاڭنامادا بەلگىلەنگەن ەڭ تومەنگى جالاقىنىڭ ون بەس ەسەلەنگەن مولشەرىندە ورتالىق سايلاۋ كوميسسياسىنىڭ شوتىنا سايلاۋ جارناسىن ەنگىزەتىنىن حابارلادى. پارلامەنت ءماجىلىسى دەپۋتاتتارىنىڭ الدىڭعى سايلاۋىندا داۋىس بەرۋگە قاتىسقان سايلاۋشىلاردىڭ 5 جانە ودان دا كوپ پايىزىن العان ساياسي پارتيالار سايلاۋ جارناسىن تولەمەيدى.
2021 جىلعى قاڭتاردا وتكەن پارلامەنت ءماجىلىسى دەپۋتاتتارىنىڭ سايلاۋىندا قازاقستان حالىق پارتياسى سايلاۋشىلاردىڭ 9,1 پايىزىن جينادى. وسىعان بايلانىستى اتالعان پارتيا سايلاۋ جارناسىن تولەۋدەن بوساتىلادى.
كوميسسيا مۇشەلەرى سايكەستىكتى اڭىقتاۋ جانە تىركەۋ تۋرالى ءتيىستى حاتتامالارعا قول قويعاننان كەيىن «2023 جىلعى 19 ناۋرىزعا تاعايىندالعان پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىندا «قازاقستان حالىق پارتياسى» قوعامدىق بىرلەستىگىنىڭ پارتيالىق ءتىزىمىن تىركەۋ تۋرالى» قاۋلى قابىلدادى. تىركەلگەن كانديداتتار ءتيىستى كۋالىكتەرىن الدى.
كوميسسيا توراعاسى نۇرلان ءابدىروۆ قازاقستان حالىق پارتياسىنىڭ پارتيالىق ءتىزىمى تىركەلگەنىن جانە ەندى پارتيا سايلاۋ قورىن قالىپتاستىرۋ ءۇشىن ارناۋلى ۋاقىتشا شوت اشۋعا قۇقىلى ەكەنىن اتاپ ءوتتى.
