قايتىس بولعان 14 ادامنىڭ, ونىڭ ىشىندە ءبىر بالانىڭ دەنەسى ءۇيىندى استىنان شىعارىلدى. قازاقستان تجم اپاتتار مەديتسيناسى ورتالىعىنىڭ دارىگەرلەرى زارداپ شەككەن ادامدارعا تاۋلىك بويى العاشقى مەديتسينالىق كومەك كورسەتىپ جاتىر.
گازيانتەپ قالاسى ءبىرىنشى ەشەلوننىڭ جۇمىس جۇرگىزۋ اۋدانى بولىپ بەلگىلەندى. مۇندا جۇمىستار تاۋلىك بويى ەكى اۋىسىمدا ءۇش ۋچاسكەدە جۇرگىزىلۋدە.
قۇتقارۋشىلاردىڭ ءبىرىنشى توبى توعىز قاباتتى عيماراتتا جۇمىس جۇرگىزىپ جاتىر. عيمارات تولىعىمەن قيراعان, كينولوگيالىق ەسەپتوپتار بارلاۋ جانە ۇيىندىلەردىڭ اراسىنان ادامداردى ىزدەۋ جۇمىستارىن جۇرگىزۋدە. بۇل جەردە ۇيىندىلەردىڭ استىنان 4 ادام قۇتقارىلدى, 4 قازا تاپقان ايەلدىڭ دەنەسى شىعارىلدى.
قۇتقارۋشىلاردىڭ ەكىنشى توبى التى قاباتتى عيماراتتا جۇمىس ىستەپ جاتىر. عيمارات ءىشىنارا قيراعان, اپاتتى, قيراۋ ديناميكاسى بايقالادى, تۇراقسىز قۇرىلىمدارعا بايلانىستى عيماراتتاردىڭ تولىق قيراۋ قاۋپى بار. عيماراتتىڭ 3-قاباتىنا دەيىن ينجەنەرلىك تەحنيكانى پايدالانا وتىرىپ, دەمونتاج جۇرگىزىلدى, قايتىس بولعان 5 ايەلدىڭ دەنەسى شىعارىلدى.
ءۇشىنشى توپ تا التى قاباتتى عيماراتتا جۇمىس جۇرگىزۋدە. عيمارات تولىعىمەن قيراعان. بارلاۋ جانە ۇيىندىلەردىڭ اراسىنان ادامداردى ىزدەۋ جۇمىستارى جۇرگىزىلىپ, قايتىس بولعان ايەلدىڭ دەنەسى شىعارىلدى.
ەكىنشى ەشەلون ءۇشىن ىزدەۋ ورنى نۋرداگى - گازيانتەپ قالاسىنان 69 شاقىرىم جەردەگى تولىعىمەن قيراعان عيمارات بەكىتىلدى. بۇل نىساندا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ, ۇيىندىلەر استىندا زارداپ شەككەندەرمەن اۋديو بايلانىس ورناتۋ, قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى. قازاقستاندىق قۇتقارۋشىلاردىڭ ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ, جەدەل جانە ساۋاتتى ءىس - قيمىلدىڭ, سونداي-اق زارداپ شەككەندەردى بلوكتان شىعارۋ بويىنشا ۋاقىتىلى قابىلدانعان شارالاردىڭ ناتيجەسىندە بۇگىن تۇندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعارۋعا مۇمكىندىك تۋدى. ادامدار دەرەۋ مەديتسينالىق قىزمەتتەرىنە جەتكىزىلدى.
مەملەكەت باسشىسىنىڭ تاپسىرماسى بويىنشا حاتاي ەلدى مەكەنىنە قۇتقارۋشىلار توبى جانە كينولوگيالىق ەسەپتوپتار جىبەرىلدى. ىزدەۋ وبەكتىسى - تولىعىمەن قيراعان التى قاباتتى ءۇي, ءۇيىندىنىڭ كولەمى 18 مىڭ م3 اسادى.
قۇتقارۋشىلاردىڭ جۇمىسى كوپتەگەن ۇيىندىلەرمەن, تۇراقسىز قۇرىلىمدارمەن كۇردەلەنە تۇسەدى. قازاقستاندىق قۇتقارۋشىلار بارىنشا ءتيىمدى جۇمىس ىستەپ جاتىر.
قازىرگى ۋاقىتتا وسى وبەكتىدە ءۇيىندىنىڭ استىنان قايتىس بولعان ءۇش ادامنىڭ دەنەسى شىعارىلدى, ونىڭ ءبىرى – قازاقستان ازاماتى, ەكەۋى – تۇركيا ازاماتى.
ىزدەۋ-قۇتقارۋ جۇمىستارى ءالى دە جالعاسادى.
