قازاقستاندا بەدەلدى MOTO GP ءتۋرنيرى وتەدى

اسحات ورالوۆ سپورتتىق ديپلوماتيا ەلدەر اراسىنداعى ىنتىماقتاستىقتى نىعايتىپ، تۋريستەردى كوپتەپ تارتاتىنىن اتاپ ءوتتى.

«مۇنداي جوبالار تۋريستەردى تارتۋدىڭ تاماشا مۇمكىندىگى جانە ەلدەر اراسىنداعى دوستىق قارىم-قاتىناستىڭ كوپىرى بولۋى كەرەك. سونىمەن قاتار جارىستى ۇيىمداستىرۋ مەملەكەتتىك بيۋدجەتكە ەشقانداي دا سالماق تۇسىرمەيدى. ءبىز يسپانيا ەلشىلىگىمەن بەلسەندى قارىم-قاتىناس ورناتتىق»، دەپ اتاپ ءوتتى مينيستر اسحات ورالوۆ.

يسپانيا ەلشىسى Moto GP — بۇل باستى جانە ەڭ بەدەلدى موتوتسيكل جارىسى ەكەنىن اتاپ ءوتتى. تۋرنيرگە الەمدەگى ەڭ مىقتى شاباندوزدار، سونداي-اق موتوتسيكل تەحنيكاسىنىڭ وزىق وندىرۋشىلەرى: Aprilia، Ducati، Honda، Suzuki، KTM جانە Yamaha قاتىسادى.

«بۇل تۋرنير «فورمۋلا-1» جارىسىنان كەم تۇسپەيدى جانە فۋتبولدان الەم چەمپيوناتى مەن وليمپيادا ويىندارىنىڭ قاتارىندا تۇر. موتو GP - 70 جىلدىق تاريحى بار موتوتسيكل جارىستارىنىڭ ءۇش ساناتىنىڭ ىشىندەگى ەڭ تانىمالى. ونى بۇكىل الەم بويىنشا 250 مىڭنان استام كورەرمەن تاماشالايدى، ال 40 مىڭعا جۋىق تۋريست كەلەدى. زەرتتەۋلەرگە سايكەس، ءىس-شارانى وتكىزگەننەن كەيىن دە 3-5 جىل ىشىندە جارىس ورنىنا ورتا ەسەپپەن 5 ميلليوننان استام تۋريست كەلەدى. بىرلەسكەن سپورتتىق ءىس-شارالار مەملەكەتتەر اراسىنداعى قاتىناستارعا عانا ەمەس، ەلدىڭ تۋريستىك يميدجىنە دە وڭ اسەر ەتەدى»، دەيدى حورحە ۋربيولا.

الماتى Sokol race Track اۆتودرومىنىڭ وكىلى ۆلاديسلاۆ ستەپنوۆ الاڭنىڭ قوناقتاردى قابىلداۋعا دايىن ەكەنىن ايتتى.

«Sokol Race track اۆتودرومى 105 مىڭعا جۋىق ادامدى ىڭعايلى ورنالاستىرا الادى. Moto GP سياقتى اۋقىمدى ءىس-شارانى وتكىزۋ ءبىز ءۇشىن ۇلكەن مارتەبە. قازىرگى ۋاقىتتا قوس تاراپ — ءبىز جانە يسپاندىق سەرىكتەستەر وسىنداي اۋقىمدى ءىس-شارانى وتكىزۋگە دايىنبىز»، دەدى ستەپنوۆ.