دەگەنمەن سەكتورداعى پورتفەل سەگمەنتتەلگەن جانە ديناميكاسى وتەلمەگەن قارىز سوماسىنا بايلانىستى ايتارلىقتاي ەرەكشەلەنەدى. ماسەلەن, جالپى نەسيە پورتفەلىنىڭ بىردەن 45 پايىزى (3,3 ترلن تەڭگە) قارىز الۋشىلاردىڭ نەبارى 10 پايىزىنا (700 مىڭ ادام) تيەسىلى. ولاردىڭ ارقايسىسى – ورتاشا ەسەپپەن 2,5 ملن تەڭگە قارىز. وسى ساناتتاعى ازاماتتاردىڭ نەسيە الۋى جىلدام ءوسىپ كەلەدى: 2022 جىلى وسى 10 پايىز قارىز الۋشىلاردىڭ جالپى قارىزى 1,5 ەسەگە جۋىق (47 پايىز) وسكەن.
«قارىز الۋشىلاردىڭ قالعان 90 پايىزى 6,3 ملن ادامدى قۇرايدى, بىراق ولارعا پورتفەلدىڭ تەك 55 پايىزى (شامامەن 4,1 ترلن تەڭگە) تيەسىلى. 2022 جىلى بۇل سەگمەنتتەگى نەسيە پورتفەلى بار بولعانى 16,3 پايىزعا ءوستى, بۇل ينفلياتسيا دەڭگەيىنەن (20,3 پايىز) تومەن. ونىڭ ۇستىنە 0,5 ملن تەڭگەگە دەيىنگى ەڭ از قارىزى بار جۇمىس ىستەپ تۇرعان قارىز الۋشىلاردىڭ جارتىسىنا (3,5 ملن ادام) جالپى قارىزدىڭ نەبارى 10 پايىزى نەمەسە شامامەن 740 ملرد تەڭگە عانا تيەسىلى. 2022 جىلى بۇل قارىز الۋشىلاردىڭ پورتفەلى 9 پايىزعا عانا ءوستى. بۇل سەگمەنتتە ورتاشا قارىز 202 مىڭ تەڭگەنى قۇرايدى, بۇل ءىس جۇزىندە ءبىر جىل بۇرىنعى دەڭگەيدەن اسپايدى (ول كەزدە ورتاشا قارىز كولەمى 200 مىڭ تەڭگەنى قۇرادى, 1 پايىزعا عانا كوبەيدى)», دەپ جازادى Ranking.
وسىلايشا, نەسيە پورتفەلىنىڭ ءوسۋىن ەلدەگى نەسيە ماسساسىنىڭ جارتىسىنا جۋىعىن قۇرايتىن ەڭ ءىرى نەسيەلەرى بار قارىز الۋشىلاردىڭ 10 پايىزى قامتاماسىز ەتىپ تۇر. بۇل ادامداردىڭ كەدەيلەر ساناتىنا جانە الەۋمەتتىك ءالسىز توپقا جاتپايتىنى انىق دەيدى ساراپشىلار. مۇندا ءبىر بورىشكەردىڭ ەڭ از 2,5 ملن تەڭگە قارىزى بولسا, ەڭ كوپ سوما – 3,5 ملرد تەڭگە, ال ورتاشا كورسەتكىش – 4,6 ملن تەڭگە.
«بۇل ازاماتتارعا بانكتەر مەن باسقا دا نەسيە مەكەمەلەرى ەرەكشە قارايدى. قارىز الۋشىلاردىڭ وسى سەگمەنتىندەگى بورىشتىق جۇكتەمە دەڭگەيى تۋرالى الاڭداۋدىڭ قاجەتى جوق. شىندىعىندا, ۇلكەن سوما نەسيە الاتىن 700 مىڭ بورىشكەردىڭ باسقا ساناتتاعى ازاماتتاردان ءۇش ەسە قارقىندى قارىز الىپ جاتقانىنا قاراپ بارلىق ازامات نەسيەگە بەلشەسىنەن باتىپ جاتىر دەگەن جالعان قورىتىندى جاسالىپ وتىر. جالپى, نەسيە پورتفەلىن بورىشكەر سانىنا شاققاندا جۇكتەمە ەكى ەسە كوبەيدى دەلىنگەنىمەن, قارىزدىڭ كوبەيۋى جوعارىدا اتالعان 700 مىڭ بورىشكەر ەسەبىنەن بولىپ وتىر. وسىلاي جىكتەپ قاراعاندا حالىقتىڭ قارىزعا سونشالىقتى باتىپ جاتپاعانىن بايقاۋعا بولادى», دەپ مالىمدەيدى بيۋرو.
نەسيەلەردىڭ تابىسقا قاتىناسىن قاراستىرعان كەزدە ازاماتتاردىڭ قارىزدىق جۇكتەمەسى, كەرىسىنشە, ايتارلىقتاي تومەندەگەنى دە بايقالادى. مىسالى, ەڭ كوپ سومادا نەسيە الاتىن 10 پايىز بورىشكەردىڭ قارىزى جالاقىعا شاققاندا بىلتىر 18,3 ەسە بولسا, قازىر 15,3 جالاقىعا تەڭ ەكەن. قارىز الۋشىلاردىڭ 90 پايىزى, ياعني قارىز الۋشىلاردىڭ نەگىزگى بولىگى تۋرالى ايتاتىن بولساق, مۇندا ءار بورىشكەردىڭ موينىنداعى قارىز ولاردىڭ 2 جالاقىسىنا تەڭ. بىلتىر بۇل كورسەتكىش 2,3 بولعان. ونىڭ ۇستىنە بورىشكەرلەردىڭ 50 پايىزىنداعى نەسيە كولەمى ءبىر جالاقى كولەمىنەن دە از (دالىرەك ايتساق, ءبىر جىل بۇرىن 0,8 جالاقى بولسا, قازىر 0,7 جالاقى).
سونداي-اق نەسيە بيۋروسى ازاماتتاردىڭ قارىزدى مەرزىمىنەن بۇرىن ءجيى جاۋىپ تاستايتىنىن دا مالىمدەيدى.
2022 جىلى تۇتىنۋشىلىق كەپىلسىز نەسيە كولەمى 6,7 ترلن تەڭگەنى قۇراعان, بۇل وتكەن جىلمەن سالىستىرعاندا 16,8 پايىزعا كوپ. ءبىر نەسيەنىڭ ورتاشا سوماسى ءبىر جىل بۇرىن 314 مىڭ تەڭگە بولسا, قازىر شامامەن 22 پايىزعا ازايىپ, 246 مىڭ تەڭگەنى قۇراپتى. بۇل رەتتە قارىز الۋشىلاردىڭ 90 پايىزى ءۇشىن بەرىلگەن نەسيەنىڭ ورتاشا مولشەرى 2022 جىلى قاڭتارداعى 178 مىڭ تەڭگە بولسا, 2022 جىلى جەلتوقساندا 171 مىڭ تەڭگەنى قۇرادى.
پورتفەلدىڭ ساپاسى جىل ىشىندە ايتارلىقتاي وزگەرگەن جوق, ءسال عانا جاقساردى: 2022 جىلعى 1 قاڭتارداعى جاعداي بويىنشا بانكتەر مەن بانكتىك ەمەس ۇيىمدار بەرگەن نەسيەلەر بويىنشا 90 كۇننەن ارتىق كەشىكتىرىلگەن بەرەشەك ۇلەسى 12,9 پايىز بولسا, 2023 جىلعى 1 قاڭتارداعى جاعداي بويىنشا بۇل كورسەتكىش – 12,8 پايىز. NPL90+ جالپى كولەمى بيىل جىل باسىندا 943,8 ملرد تەڭگەنى قۇراپ وتىر.
