قىستىڭ دا قىزىعى مول

بار مۇمكىندىكتى ويشا ساراپتاپ باعامداساڭىز, تابيعاتى تامىلجىعان ولكەدە جادىراعان جاز ايلارىندا عانا ەمەس, شىڭىلتىر, قۇرعاق ايازدى, اياق باسقان سايىن كىرشىكسىز تازا, اق قارى سىقىر-سىقىر ەتىپ, قىسقى دالانىڭ ادەمى ءانىن سالاتىن وسى ءبىر ايماقتىڭ وزگەشە ءوڭدى كەزىندە الاڭسىز دەمالساڭىز قۇر اتقا مىنگەندەي قۋناپ سالا بەرەر ەدىڭىز. اسىلىندا, جاز بويى كەلىمدى-كەتىمدى كىسى دۇمەپ, بۋرابايىنىڭ باۋرايى بۋىرقانىپ, زەرەندىنىڭ زەرلى ومىراۋى ءجۇز سان تۋريستكە تولىپ كەتەتىن ايماق قىستىگۇنى دە قوناق كۇتۋدەن كەندە ەمەس.

جالپى, وبلىستا 300-دەن اسا دەمالىس ورنى بار دەسەك, سول نىسانداردىڭ 60 پايىزعا جۋىعى قىسقى تۋريزم باعى­تىندا تياناقتى جۇمىس ىستەيدى. دەمەك, كورىكتى كوكشەتاۋ, قۇنارلى قورعالجىن وڭىرلەرى جىل بويى ءبىر دامىل تاپپايدى. ءسوزىمىز دالەلدى بولۋى ءۇشىن ءبىر عانا دەرەك كەلتىرە كەتەلىك. ەگەر تالايدى تامساندىرعان وسى ءبىر اجارلى ايماققا ءبىر جىلدا ميلليوننان اسا تۋريست ات ارىتىپ جەتەتىن بولسا, سول ادامداردىڭ 30 پايىزدان استامى قىستا كەلەدى. ياعني كەيىنگى جىلدارى سالا وزگەشە سەرپىن الىپ, بار ءىسىن جاڭا زاماننىڭ تالابىنا ساي ەتىپ, وركەنيەتتى ەلدەردەگىدەي تاجىريبە جيناقتاي باستاعان. ءسوز اراسىندا «Rixos Borovoe», «Windham Garden», «سۇلتان پلازا», «پارك حاۋس كوكشەتاۋ», «تەرراسسا پارك» قوناق­ۇيلەرى مەن «وقجەتپەس», «الماز», «ششۋچين­سكي», «زەرەن» ساناتوريلەرى, «جۇم­باقتاس» پانسيوناتى جانە باسقا دا نىساندار قىسقى ماۋسىمدا تۋريستەردى تارتۋ ءۇشىن كورسەتىلەتىن قىزمەتتەردىڭ سانىن كوبەيتىپ, قىزمەتىن جاقسارتىپ كەلەدى. ءبىر ايتا كەتەرلىگى, تۋريستەردىڭ تابيعاتتى تاماشالاپ, سەرگۋى عانا ەمەس, سونداي-اق اۋرۋدىڭ الدىن الۋ, دەنساۋ­لىعىن نىعايتۋ باعىتىندا دا ءمىنسىز قىزمەت كورسەتىلەدى.

كۇنى كەشە جامان تۇماۋدىڭ جالپاق الەمدى ءبىر قاۋىزدىڭ ىشىنە سىيعىزعانى بارىمىزگە ءمالىم. داۋاسىز دەرتتىڭ سا­قىنىن سىلىپ تاستاۋ ءۇشىن كوپتەگەن شيپا­جاي تىنىس الۋ جانە جۇرەك-قان تامىرلارىن ەمدەيدى. بۇل ورايدا سۋ جانە بالشىق, ينەمەن ەمدەۋ ءتارىزدى ەمدىك شا­رالار قولدانىلادى. كوروناۆيرۋسپەن اۋىرىپ تۇرعان ادامدار اراسىندا تازا اۋا­مەن دەمالۋعا قۇشتارلار كوبەيدى. ولار­دىڭ بويىنداعى اتالعان دەرتتىڭ زارداپتارىن جويۋعا ءبىزدىڭ ەم-دومنىڭ اسەرى مول ەكەنىن ايتادى شيپاجاي دارىگەرلەرى.

قازىرگى ءتۋريستىڭ تالابى كۇشتى. سون­دىقتان بار قولايلى جاعدايدى تۋعىزعان ابزال. قىسى-جازى ات باسىن تىرەيتىن تۋريستەرگە جايلى دەمالىستى قامتاماسىز ەتۋ ءۇشىن ءوڭىردىڭ شيپاجايلارىندا اينا­داي جالتىراعان مۇز ايدىندارى قۇ­يىلدى, شاڭعى باعىتتارى سالىندى. شاڭ­عى, كونكي, سنوۋبورد ءتارىزدى جاب­دىق­تاردى جالعا بەرەتىن ورىندار اشىل­دى. بۋرابايدىڭ باۋرايى كوكى­رەگىڭدى تازا اۋاعا عانا تولتىرىپ قوي­مايدى, سونىمەن بىرگە ەل تاريحىن ەك­شەپ جۇرگەن ادامداردىڭ جادىنا دا جاقسى ەستەلىك سىيلايتىنى بار. تۋ­عان ەلدىڭ اپپاق پەيىلىندەي اقشاڭ­قان جامىلعى جامىلعان, اتشاپتىرىم جەردەن مۇنارتىپ كورىنەتىن تاۋ سىلەم­دەرىنىڭ قويناۋى – تۇنعان تاريح. الاش­تىڭ كەشەگى كۇنگى ءتول تاريحى جاق­پار-جاقپار تاستاردىڭ بەتىندە تاڭ­با­لانعانداي, قويناۋىندا كىلكىلدەپ بۇعىپ جاتقانداي. كوڭىلىڭ اۋسا كەل دە كور, وتكەندى تانى, ونەگەسىن ۇق. انە كوز ۇشىڭدا قىلاڭداعان بەدەرى بولەك, بەينەسى كوركەم بولەكتاۋ, ءسال ارى­رەكتە الۋان ءتۇرلى اڭىزبەن ادىپتەلگەن كەنە­سارى ۇڭگىرى. قاقاعان قىستىڭ وزىندە ۇڭگىر­دىڭ اۋزىنان جان دۇنيەڭدى شىمىرلاتاتىن جىلى ءبىر لەپ ەسىپ تۇرعانداي. شىمىرلاي قايناپ, ورتتەي لاپىلداپ قا­نىڭا قۋات بەرەدى. ۇڭگىر تۇبىندە تۇنىپ قالعان ءوز زامانىنىڭ اسىل پەر­زەنت­تەرىنىڭ اسقاق ارمانىنىڭ, ءماندى ماق­ساتىنىڭ سىرىن ۇعاتىن قۋات بار. قىسقا قايىرىپ ايتقاندا, بۋرابايدىڭ باۋرايىندا مۇلگىگەن تىنىشتىق, ماۋ­جىراعان تابيعاتتىڭ اياسىندا دەما­لىس پەن رۋحاني قاجەتتىلىكتى وتەۋ مۇم­كىندىگىن ۇشتاستىرۋعا ابدەن بولادى. قوناق­ۇيلەردىڭ اۋماعىندا ويىن-ساۋىق كەشەندەرى جۇمىس ىستەيدى. ال ەكسترە­مالدى دەمالىس اۋەسقويلارى ءۇشىن جىل بويى ۇزبەي جۇمىس ىستەيتىن ۆەيك-پاركتىڭ ەستەن كەتپەس قىزىعىن كۇندى تۇنگە, ءتۇندى كۇنگە ۇلاستىرىپ جىرلاۋعا بولار ەدى. بۇل – ەلىمىزدەگى جىل بويى ۇزبەي ىلكىمدى ءىسىن ساتىمەن ساباقتاپ وتىرعان العاشقى پارك.

حالىقارالىق دەڭگەيدەگى جارىس­تار دا ءجيى وتكىزىلەدى. ششۋچينسك قالاسىنداعى شاڭعى سپورتىنىڭ رەسپۋبليكالىق بازا­سىنىڭ اۋماعىندا تالايدى تامساندىرعان دودالاردىڭ دۇرمەگى شارتاراپقا جە­تىپ جاتىر. كاسىبي شاڭعى اۋەسقويلارى «Elikti Park» جانە «نۇر تاۋ» تاۋ شاڭ­عىسى بازالارىنىڭ مۇمكىندىكتەرىن پاي­دا­لانادى. سونداي-اق زەرەندى دەمالىس ايماعىندا اۋەسقوي شاڭعى سپورتشىلارى وداعى جۇمىس ىستەيدى. بۇل جەردە يت تۇمسىعى وتپەيتىن قالىڭ ورماننىڭ قويناۋىندا ۇزىندىعى 500 مەتردى قۇراي­تىن تاۋ شاڭعىسىنىڭ جولى بار. تۋ سوناۋ تاۋ ەتەگىنەن اتقان وقتاي سىرعاناۋ ەستەن كەتپەس ءلاززات سىيلايدى. شاڭعى ستاديونى ءداستۇرلى حالىقارالىق زە­رەن­دى شاڭعى مارافونىن وتكىزۋگە مۇمكىن­­دىك بەرۋمەن قاتار, سپورتتىڭ وسى ءتۇرى­نىڭ دامۋىنا ءتاپ-ءتاۋىر سەپتىگىن تيگىزىپ وتىر.

ەندى ءبىر ءسات قۇيقالى, سۋلى-نۋلى قورعالجىن وڭىرىندەگى مول مۇمكىندىكتى از سوزبەن اجارىن كەلتىرىپ ايتا كەتەلىك. بۇل وڭىردە دە قىسقى ءتۋريزمدى جاپ-جاقسى دامىتۋعا مول مۇمكىندىك بار. ايتالىق, كۇمىس كولدەردە باۋىرىن جارقىراتىپ بالىق اۋلاۋعا بولادى. ايتپاقشى, مۇن­داي دەمالىس بۋراباي باۋرايىنداعى شال­قارلار مەن زەرلى زەرەندىدە دە بار. جىل سايىن مۇز ۇستىندە بالىق اۋلاۋ فەستيۆالدەرى ۇيىمداستىرىلىپ جاتادى. قىزىققا جينالعان كودەدەي قالىڭ كوپشىلىك تاماشا تابيعاتتىڭ مول تارتۋىن پايدالانۋمەن قاتار, ونى كوزدىڭ قاراشىعىنداي قورعاپ, كەلەر ۇرپاقتىڭ سىباعاسى رەتىندە ساقتاۋ كەرەكتىگىن دە كوڭىلدەرىنە ءتۇيىپ كەتەدى. بۇل باعىتتا تۋريزم سالاسىنىڭ قىزمەتكەرلەرى تىنىمسىز جۇمىس ىستەپ جاتىر. الاعان قولدىڭ بەرەگەن بولعانى دا جاقسى عوي.

وڭىردە قىسقى ءتۋريزمدى دامىتۋ ءۇشىن بىرقاتار وڭتايلى ءىس-شارا قولعا الىنعان. تۋريستىك قىزمەت سۋبەكتىلەرى اراسىندا ءارتۇرلى بايقاۋلار وتكىزىلەدى. جەڭىمپازدار جۇلدەسىز قالمايدى. ەڭ باس­تى جۇلدە – حالىقتىڭ ىقىلاسى, قىسقى ءتۋريزمنىڭ قىزىعىن كورگەن كەلۋ­شىلەردىڭ العىسى.

– تۋريزم قاۋىمداستىعى وسى كەزەڭ­دە دەمالۋشىلار اراسىندا بار جۇمىس­تى ەكشەپ, الەمدىك تاجىريبەنىڭ ءبىزدىڭ جاع­دايعا كەلەتىن وزىق ۇلگىلەرىن جەتىلدىرە جۇمىس ىستەپ جاتىر. بۇقارالىق سپورتتىق ءىس-شارالاردى ءجيى ءارى قىزىقتى وتكىزۋ ارقىلى قىسقى دەمالىس نىساندارىنىڭ جىل بويى جۇمىس ىستەۋىنە جاردەمدەسەمىز, – دەيدى وبلىستىق دەمالىس جانە تۋريزم يندۋسترياسى اسسسوتسياتسياسىنىڭ پرەزيدەنتى شىناربەك باتىرحانوۆ.

كورىكتى ايماقتا قىسقى تۋريزم ۋاقىت وتكەن سايىن دامىپ كەلەدى. الداعى ۋاقىتتا اتىنا اجارى ساي ايماقتىڭ بار مۇمكىندىگى وسى باعىتتا ورىستەي بەرمەك.

اقمولا وبلىسى