ۆەدومستۆو حابارلاعانداي, كاسپي جاعالاۋىندا تابىلعان يتبالىقتاردىڭ ۇشاسىنا قاتىستى زەرتتەۋمەن عىلىمي ۇيىمدار مەن قۇزىرەتتى مەملەكەتتىك ورگانداردىڭ وكىلدەرىنەن تۇراتىن جۇمىس توبى اينالىسقان.
زەرتتەۋ قورىتىندىسىنا سايكەس, كاسپي يتبالىقتارىنىڭ جاپپاي قىرىلۋ سەبەبى - موربيلليۆيرۋستىق ينفەكتسيانىڭ ءورشۋى ناتيجەسىندە پايدا بولعان پنەۆمونيا اۋرۋى.
«تەڭىز جانۋارلارىنىڭ يممۋنوتوكسيكالىق ەلەمەنتتەرمەن جانە ءتۇرلى قوسپالارمەن ۋلانۋى يممۋنيتەتتىڭ تومەندەۋىنە جانە دەنەنىڭ جالپى توزىمدىلىگىنە بايلانىستى جۇقپالى اۋرۋلارعا سەزىمتالدىعىنىڭ جوعارىلاۋىنا ىقپال ەتەدى», دەلىنگەن حابارلامادا.
وسىلايشا, 2022 جىلدىڭ قاراشاسىندا كاسپي تەڭىزىنىڭ قازاقستاندىق بولىگىندە تابىلعان يتبالىقتار يممۋنيتەتتىڭ تومەندەۋىنەن, سونىڭ ىشىندە ولاردىڭ تىرشىلىك ەتۋ ورتاسىنىڭ لاستانۋىنان تۋىنداعان ۆيرۋستىق ينفەكتسيالارعا بايلانىستى ورشىگەن پنەۆمونيادان قىرىلعان.
ەسكە سالا كەتسەك, 2022 جىلدىڭ 7 قاراشاسى مەن 3 جەلتوقسانى ارالىعىندا ماڭعىستاۋ وبلىسىنىڭ تۇپقاراعان اۋدانىندا كاسپي تەڭىزىنىڭ جاعالاۋىندا وتكەن رەيدتىك ءىس-شارالار بارىسىندا 172 ءولى يتبالىق ۇشاسى تابىلعان.
