«بۇگىن «اماNات» پارتياسى ورتالىق سايلاۋ كوميسسياسىنا پارتيالىق ءتىزىمدى تاپسىردى. رەسپۋبليكا بويىنشا بارلىق دەڭگەيدەگى ماسليحاتتارعا ءوتىنىش بەردىك, 3821 ادام ءماسليحات دەپۋتاتتىعىنا كانديدات بولدى. سونداي-اق قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا 119 كانديداتتى ۇسىندىق. پارتيالىق تىزىمدە كۆوتا زاڭدى تۇردە ساقتالعان: 30%-دان استامى – ايەلدەر, جاستار, سونداي-اق مۇمكىندىگى شەكتەۋلى جاندار. سايلاۋ ادال ءارى ءادىل وتەدى دەپ ويلايمىز», دەدى «اماNات» پارتياسىنىڭ جاۋاپتى حاتشىسى ەلنۇر بەيسەنباەۆ.
ءبىر كۇن بۇرىن «اماNات» پارتياسى كەزەكتەن تىس سەزىندە قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتاردىڭ ءتىزىمىن بەكىتتى.
ساياسي كەڭەس بيۋروسىنىڭ شەشىمىمەن پارتيالىق ءتىزىم بويىنشا 90 ادام, ءبىر مانداتتى وكرۋگتەردەن 29 ادام ۇسىنىلدى.
الداعى پارلامەنت ءماجىلىسىنىڭ سايلاۋىنا قاتىسۋعا بارلىعى 119 كانديدات ماقۇلداندى.
قازاقستاندا ءماجىلىس دەپۋتاتتارىنىڭ سايلاۋى 19 ناۋرىزدا وتەدى. ءدال وسى كۇنگە ءماسليحات دەپۋتاتتارىن سايلاۋ بەلگىلەنگەن.
