ۋكراينا پرەزيدەنتى ۆيكتور يانۋكوۆيچ بۇرىنعى كسرو-نىڭ دۇنيەسى وداققا كىرگەن رەسپۋبليكالارعا بولىنۋگە ءتيىس دەگەن پىكىرىن جاريالادى. ونىڭ بۇل ۇسىنىسى ءجاي ساياسي ۇپاي جيناۋدىڭ قۋلىعى سياقتى. رەسەيمەن جاقىنداسۋمەن قاتار, قاجەتتى جەرىندە وعان قارسى دا شىعامىن دەگەندى بىلدىرمەك بولسا كەرەك. كەزىندە سول وداقتاس رەسپۋبليكالاردىڭ باسشىلارى رەسەي كسرو-نىڭ دۇنيەسىن الۋمەن بىرگە, ونىڭ قارىزدارىن دا وتەسىن دەگەن كەلىسىمگە كەلگەن. ونى قايتا قاراۋدىڭ رەتى جوقتاي. كەلىسىلگەن سوڭ, سوزدە تۇرۋ قاجەت.
بيلىكتەن شىققان
جاپونيانىڭ سوتسيال-دەموكراتيالىق پارتياسىنىڭ باسشىلىعى وزدەرىنىڭ بيلىكتەگى پرەمەر-مينيستر يۋ.حاتوياما باسقاراتىن كواليتسيادان شىعاتىنىن مالىمدەدى. بۇلارعا نە جەتپەي قالعانى بەلگىسىز. سوتسياليستەردىڭ كەتۋىنەن كواليتسيا پارلامەنتتەگى كوپشىلىك داۋىستان ايىرىلار بولسا, بۇل ەلدەگى تۇراقتىلىققا قاتتى سوققى بولىپ تيمەك. چيناۆات ايىپتى تايلاند سوتى ەلدىڭ بۇرىنعى پرەمەر-ءمينيسترى تاكسين چيناۆاتتى لاڭكەستىك ارەكەتتەرى ءۇشىن ايىپتى دەپ تاۋىپ, ونى تۇتقىنداۋعا وردەر بەردى. قازىرگى بيلىك ونى ەكى جارىم ايداي “قىزىلجەيدەلىلەردىڭ” كوشەلەردەگى تارتىپسىزدىگى مەن شەرۋلەر وتكىزىپ, ەلدىڭ بەرەكەسىن كەتىرگەن ارەكەتتەرىن ۇيىمداستىرۋشى دەپ سانايدى. سول ارەكەتتەردىڭ سالدارىنان وتىزدان استام ادام قازا تاۋىپ, مىڭعا تارتا ادام جارالانعان. سول ءۇشىن دە جازاعا تارتۋعا بولعانداي. وپپوزيتسيا 36 عيماراتتى ورتەپتى.
زەينەتكەرلىككە اسىعۋ
فرانتسۋزدار ەرەۋىلگە شىعىپ, ەل ىشىندە ءبىراز قيىندىق تۋدى – كوشەلەردە كولىك كەپتەلىپ, اۆيارەيستەر ورىندالماي قالدى, ءتىپتى مەكتەپتەردە وقۋ توقتاعان. ەرەۋىلدىڭ سەبەبى – ۇكىمەتتىڭ زەينەتكەرلىككە شىعۋ جاسىن كوتەرمەك ويىنا قارسىلىق. بۇل ەلدە زەينەتكەرلىككە شىعۋ جاسى – 60. بۇل تەك ەۋروپادا عانا ەمەس, الەمنىڭ كوپتەگەن جەتەكشى ەلدەرىندەگىدەن الدەقايدا تومەن. ايتالىق زەينەتكەرلىككە شىعۋ جاسى اقش-تا – 65-67, جاپونيا, گەرمانيا, يسپانيا, فينليانديادا – 65, ال يزرايلدە 67 جاس. فرانتسۋزدار زەينەتكەرلىككە 62 جاستا شىعۋعا قارسى.
ليبەرمان جەمقور ما؟
بي-بي-سي اقپارات اگەنتتىگىنىڭ حابارلاۋىنا قاراعاندا, يزرايل پوليتسياسى ەلدىڭ سىرتقى ىستەر ءمينيسترى اۆيگدور ليبەرماننىڭ سىبايلاس جەمقورلىققا قاتىسى بار-اۋ دەگەن كۇدىك ءبىلدىرىپتى. ونىڭ ءبىر دالەلى – سىرتقى ىستەر ءمينيسترى اقشانى جاسىرىپ وتكىزگەندەردى تەرگەۋگە ىقپال ەتپەك بولىپتى. پوليتسيا بۇل جايدان-جاي ەمەس دەپ قورىتىندى جاساعان.
ۇندىستانداعى اپات
جۇما كۇنى بۇل ەلدە تەمىر جول اپاتى بولىپ, ودان 65 ادام قازا تاۋىپ, 200-دەي ادام جارالانىپتى. باتىس بەنگاليادا بۇل اپاتتى ەلدەگى ماويستىك توپ جۇزەگە اسىرىپتى. كالكۋتتادان مۋمبايعا بارا جاتقان پويىز رەلستەن شىعىپ كەتىپ, سودان سوڭ قارسى كەلە جاتقان جۇك پويىزىمەن سوعىسقان. ماويستىك ەكسترەميستەر بۇعان دەيىن دە وسىنداي تەراكت ۇيىمداستىرعان ەكەن.
چاۆەس تە قورقادى
ۆەنەسۋەلا پرەزيدەنتى ۋگو چاۆەس استانانىڭ سىرتىندا بولاتىن شارالارعا الدىن الا حابارلاماي باراتىن كورىنەدى. ءوز ءومىرىنىڭ قاۋىپسىزدىگى ءۇشىن وسىلاي ەتۋدى وعان كۋبا كوسەمى فيدەل كاسترو ايتتى, دەيدى ول. چاۆەس ۇنەمى تىكۇشاقتى پايدالانادى ەكەن. تاعى دا بۇل كولىكتى فيدەل كاسترو ۇناتپاپتى. تىكۇشاقتى زىمىرانمەن اتىپ تۇسىرەتىن جىندىلار كوپ, دەپتى چاۆەس. ءوز حالقىنان قورىققان پرەزيدەنتتىڭ دە كۇنى كۇن ەمەس-اۋ.
كەرەكسىز نارسە كوپ
نەمىستىڭ ەكونوميست-عالىمى يۋستۋس حاۋكال “گەرمانياداعى شەنەۋنىكتەر تاسقىنى” دەگەن كىتاپ شىعارىپ, ەلدەگى 50 مەملەكەتتىك قىزمەتتىڭ ەشقانداي پايدالى ءىس اتقارمايتىنىن, تەك بيۋدجەتتىك قارجىنى بوسقا جەيتىنىن جان-جاقتى دالەلدەپتى. حاۋكالدىڭ پىكىرىنشە, سول مەكەمەلەردى جويۋ مەملەكەتتىك ورگانداردىڭ جۇمىسىن شيراتا تۇسۋمەن قاتار, قىرۋار قارجىنى وتەيتىن كورىنەدى. ءسىرا, ونداي كەرەكسىز مەكەمەلەر بارلىق جەردە دە بار شىعار. نەمىس عالىمى تالايلارعا وي سالىپ وتىرعانداي.
اق جاڭعاق – كوك جاڭعاق
قازىر بازارلاردا, سونداي-اق داستارقانداردا ءبىر مۇرتى اشىلعان ۇساق اق جاڭعاقتى ءجيى كەزدەستىرەمىز. ول نەگىزىنەن قىتايدان اكەلىنەدى. بۇل شەكىلدەۋىكتەردىڭ تابيعي ءتۇسى اق ەمەس, سۇر كورىنەدى. ساۋدادا ءوتىمدى بولسىن دەپ قىتايلار ونى اققا بويايدى ەكەن. تابيعي ءتۇسى قانداي ەكەندىگىنەن بەيحابار تۇتىنۋشى اعىن الادى. بۇلاي بوياۋ قىتايلاردىڭ ءوز زاڭدارىنا دا قايشى كورىنەدى. ال اققا بوياعاننان ونىڭ ادام اعزاسىنا زيانى انىقتالماعانمەن, ول ونىمدەگى ۆ1 ءۆيتامينىن جويادى ەكەن.
ازىرلەگەن ماماديار جاقىپ.
