سۋرەتتى تۇسىرگەن يۋري بەككەر
گرەك-ريم كۇرەسى شەبەرلەرىنىڭ سايىسىندا سەنساتسيالىق ناتيجەلەر كوپ تىركەلسە, بۇرىمدىلاردىڭ باسەكەسىندە تاڭداي قاعارلىقتاي ەش وقيعا بولعان جوق. فينالعا شىققان بالۋانداردىڭ بارلىعى دا بۇعان دەيىن دە ەلىشىلىك دودالاردا قارسىلاس شاق كەلتىرمەي, حالىقارالىق ارەنالاردا دا ەلەۋلى تابىستارعا قول جەتكىزىپ جۇرگەن ساقا سپورتشىلار ەدى. ماسەلەن, 68 كگ سالماقتاعى شىمكەنتتىك ەلەنا شالىگيناعا الماتى وبلىسىنىڭ وكىلى گاۋھار مۇقاتايدى جەڭۋ ەش قيىندىق تۋعىزعان جوق. گاۋھاردىڭ جاسى – 24-تە. ال ەلەنا – 36 جاستا. شالىگينا 2008 جىلى بەيجىڭ وليمپياداسىندا ءۇشىنشى ورىندى يەلەنسە, الەم چەمپيوناتتارىندا ءۇش مارتە جۇلدەگەرلەر ساناتىنا قوسىلدى. 2010 جىلى ازيا ويىندارىن ۇتىپ, قۇرلىق بىرىنشىلىگىندە بەس رەت (2 التىن+2 كۇمىس+1 قولا) جەڭىس تۇعىرىنا كوتەرىلدى. كەيىننەن ۇلكەن سپورتتان قول ءۇزدى.
ارادا 10 جىل وتكەن سوڭ سپورتشى بوزكىلەمگە قايتا ورالدى. كەلگەن بەتتە بىردەن ءوزىنىڭ مىقتىلىعىن مويىنداتتى. بىلتىر ەلەنا ەل چەمپيونى اتانسا, بيىل سپارتاكيادادا باس جۇلدەنى ولجالادى. ءبىر كەرەمەتى, الماتىداعى جارىستا ەلىمىزدىڭ بىردە-ءبىر بالۋانى ارداگەر بالۋاننىڭ ەكپىنىنە شىداي المادى.
بىرەر جىلدان بەرى 72 كگ سالماق دارەجەسىنىڭ تىزگىنىن ەشكىمگە بەرمەي جۇرگەن استانالىق ءجاميلا باقبەرگەنوۆاعا العاشقى كەزەڭدە جاستار اراسىنداعى الەم مەن قۇرلىق بىرىنشىلىكتەرىنىڭ جۇلدەگەرى, باتىس قازاقستان وبلىسىنان كەلگەن اناستاسيا پاناسوۆيچ اجەپتاۋىر قارسىلىق كورسەتتى. بىراق مىقتىنىڭ اتى مىقتى عوي. بىرتە-بىرتە ءجاميلا ونى ساباسىنا ءتۇسىردى. سوڭعى ەكى الەم چەمپيوناتىنىڭ كۇمىس جۇلدەگەرى, ازيانىڭ ەكى دۇركىن چەمپيونى دەگەن دارداي اتاقتارى بار بالۋان اقىرىندا اناستاسيادان باقانداي 11 ۇپاي وزدى. تورەشىنىڭ بەلدەسۋدى مەرزىمىنەن بۇرىن توقتاتۋدان باسقا امالى قالمادى.
55 كگداعى مارينا سەدنەۆا (الماتى وبلىسى) اقتىق سىنعا دەيىن القىنباي جەتتى. جاستاردىڭ الەم بىرىنشىلىگىنىڭ ەكى دۇركىن قولا جۇلدەگەرى, ازيا چەمپيونى جانە ايەلدەر اراسىنداعى قۇرلىقتىڭ باستى دوداسىندا ءۇشىنشى ورىنعا تابان تىرەگەن ول شەشۋشى تۇستا گۇلسامال نۇرلاندى (اقتوبە) ايقىن باسىمدىقپەن ۇتتى. 57 كگ سالماقتا نيلۋفار رايموۆاعا (تۇركىستان) تەڭ كەلەر ەشكىم تابىلمادى. جاستار اراسىنداعى الەم چەمپيونى فينالدا اينۇر ءاشىموۆادان (الماتى وبلىسى) ايلاسىن اسىرسا, 59 كگداعى ديانا كايۋموۆا (استانا) ايگەرىم يبارشەۆانى (اقتوبە) قاپى قالدىردى.
62 كگ سالماق دارەجەسىندەگى يرينا كۋزنەتسوۆا (اقمولا) مەن اياۋلىم قاسىموۆانىڭ (الماتى وبلىسى) ءوزارا باسەكەسى وتە تارتىستى ءوتتى. بۇل ايقاس ءسال عانا باسىمدىقپەن كۋزنەتسوۆانىڭ پايداسىنا شەشىلدى. 65 كگدا ءالبينا قايىرگەلدينوۆا (اقمولا) جەڭىس تويىن تويلادى. فينالدا ول داريعا ابەندى (تۇركىستان) جەڭدى. ال اسا جەڭىل سالماقتا جاستار بۋىنىنىڭ وكىلى ەللادا ماحياددينوۆانىڭ (اقمولا) مەرەيى ۇستەم بولدى.
بالۋان شولاق اتىنداعى سپورت سارايىنا جينالعان جۇرت 76 كگ سالماق دارەجەسىندەگى اقتىق سايىستى اسىعا كۇتتى. بوزكىلەمگە قاراعاندىلىق ەلميرا سىزدىقوۆا مەن استانالىق گۇلمارال ەركەباەۆا شىقتى. ەلميرا – ريو وليمپياداسى مەن جاكارتاداعى ازيا ويىندارىنىڭ قولا جۇلدەگەرى. سونىمەن قاتار ول قۇرلىق چەمپيوناتىندا التى رەت (1 التىن+2 كۇمىس+3 قولا) جەڭىس تۇعىرىنا كوتەرىلگەن. گۇلمارال – ازيا چەمپيوناتىنىڭ ءتورت دۇركىن قولا جۇلدەگەرى. وسى بالۋانداردىڭ ءوزارا ايقاسى اركەز اسا شيەلەنىستى وتەدى. كوپ جاعدايدا باسەكە تاعدىرىن ءبىر نەمەسە ەكى ۇپاي عانا شەشكەنىن كوزىمىز كورگەن. بىردە سىزدىقوۆا جەڭسە, ەندى بىردە ەركەباەۆانىڭ باعى جانادى. بۇل جولى دا ءدال سولاي بولدى. ەكەۋى سوڭعى سەكۋندتارعا دەيىن ايانباي ايقاسىپ, اقىرىندا ءبىر عانا ۇپاي ايىرماشىلىعىمەن قاراعاندىلىق سپورتشى جەڭىسكە جەتتى.
تاعى ءبىر ايتا كەتەرلىگى, ءدال سول كۇنى اتاقتى بالۋانىمىزدىڭ تۋعان كۇنى ەدى. وسىلايشا, ەلميرا ءوز-وزىنە كەرەمەت سىي جاساپ, سپارتاكيادانىڭ جەڭىمپازى اتاندى. قازاقستان كۇرەس فەدەراتسياسى مەن ازيا كۇرەس كونفەدەراتسياسىنىڭ پرەزيدەنتى, بىرىككەن كۇرەس الەمىنىڭ بيۋرو مۇشەسى داۋلەت تۇرلىحانوۆ چەمپيوندى تۋعان كۇنىمەن قۇتتىقتاۋ ءۇشىن سپورت سارايىنا ارنايى ات باسىن بۇردى.
