بريفينگتە ءبىلىم باسقارماسىنىڭ باسشىسى ءنازىر جاشىبەكوۆ وتكەن جىلى 2,5 ميلليارد تەڭگەگە 31 نىسان جوندەۋدەن وتكەنىن ايتتى. ونىڭ ىشىندە 21-ءى «اۋىل – ەل بەسىگى» باعدارلاماسى بويىنشا. مەكتەپتەردىڭ شاتىرى, تەرەزەلەرى, جىلۋ جۇيەسى اۋىستىرىلىپ, كۇردەلى جوندەۋ جۇمىستارى جۇرگىزىلدى.
«اپاتتى مەكتەپتەردى جويۋ جۇمىستارى جالعاسىپ جاتىر. تايىنشى اۋدانىندا 720 ورىندىق ەكى مەكتەپتىڭ قۇرىلىسى ءجۇرىپ جاتىر. الداعى ۋاقىتتا دراگوميروۆكا اۋىلىندا 120 ورىندىق مەكتەپ سالۋدى جوسپارلاپ وتىرمىز. پەتروپاۆلدا ورىن تاپشىلىعىن ازايتۋ ءۇشىن 2026 جىلعا دەيىن 3,3 مىڭ وقۋشىعا ارنالعان ءتورت جاڭا مەكتەپ سالىنادى», دەدى ءنازىر جاشىبەكوۆ.
ولار 28 پاندىك كابينەت ساتىپ الۋدى جوسپارلاپ وتىر. وتكەن جىلى 150 ميلليون تەڭگەگە 28 فيزيكا-بيولوگيا كابينەتى ساتىپ الىندى.
«2020 جىلدان باستاپ پەتروپاۆلداعى كۇندىزگى وقۋ نىسانىنداعى 48 مەكتەپتە جان باسىنا شاققانداعى قارجىلاندىرۋ تەتىگى ەنگىزىلدى. بۇل قارجىنى دەربەس جانە ءتيىمدى باسقارۋعا, ولاردى ساقتاۋعا جانە قايتا باعىتتاۋعا مۇمكىندىك بەرەدى. ۇنەمدەلگەن قاراجات ەسەبىنەن بيىل قالا مەكتەپتەرىنىڭ ماتەريالدىق-تەحنيكالىق بازاسىن جوندەۋ جانە نىعايتۋ جوسپارلاندى», دەپ قوستى ءنازىر جاشىبەكوۆ.
