2022 جىلدىڭ قاڭتار-جەلتوقسان ايلارى ارالىعىندا بىرىڭعاي اقپاراتتىق مەديتسينالىق Call-ورتالىعىنا 759 164 ءوتىنىم كەلىپ تۇسكەن. ونىڭ ىشىندە 707,5 مىڭ ادام كەڭەس السا, 24 مىڭ جۇگىنۋشى شاعىم قالدىردى.
تالداۋ كورسەتكەندەي, وتىنىشتەردىڭ 85%-ىندا 1406-عا قوڭىراۋ شالىنعان. شامامەن 14% ءوتىنىم قورعا Qoldau 24/7» ءموبيلدى قوسىمشاسىنا كەلىپ ءتۇستى. قوردىڭ fms.kz رەسمي سايتى, Telegram-داعى @Saqtandyrýbot, قر دەنساۋلىق ساقتاۋ مينيسترلىگىنىڭ سايتى مەن بلوگى سىندى كەرى بايلانىس ارنالارى دا حالىق اراسىندا تانىمال.
الەۋمەتتىك مەديتسينالىق ساقتاندىرۋ قورىندا اتاپ وتكەندەي, وتىنىمدەردىڭ 93%-ىندا كەڭەس بەرىلسە, 50 مىڭنان استام ءوتىنىمدى ەگجەي-تەگجەيلى قاراۋ جانە جاۋاپ بەرۋ ءۇشىن 2-ءشى جانە 3-ءشى قولداۋ جەلىسىنە جىبەرىلدى.
استانا, الماتى, اقمولا جانە اقتوبە وبلىستارىنىڭ تۇرعىندارى الەۋمەتتىك مەديتسينالىق ساقتاندىرۋ قورى وپەراتورلارىنىڭ كەڭەسىن بەلسەندى پايدالانادى.
قوردا اتاپ وتكەندەي, رەسپۋبليكالىق ماڭىزى بار قالالاردا ەل حالقىنىڭ 20%-ى تۇرادى. سايكەسىنشە مۇندا مەديتسينالىق قىزمەتتەردى تۇتىنۋشىلار باسىم ءارى حالىق تاراپىنان ءجيى سۇراقتار قويىلادى.
الەۋمەتتىك مەديتسينالىق ساقتاندىرۋ قورى ءوزىن پاتسيەنتتەردىڭ ومبۋدسمەنى رەتىندە ۇستاناتىنى كوپشىلىككە ءمالىم. سول سەبەپتى ادامدار مەديتسينالىق كومەك الۋ كەزىندە قۇقىقتارى بۇزىلعان جاعدايدا قورعا جازىپ, حابارلاسادى.
وتكەن جىلى ناۋقاستار قورعا 24 مىڭ شاعىم جىبەرگەن. الدىڭعى كەزەڭمەن سالىستىرعاندا ولاردىڭ سانى 35%-عا ارتتى (2021 جىلى 17,7 مىڭ شاعىم). شاعىمداردىڭ جارتىسىنا جۋىعى الماتى, استانا قالالارىنا جانە قاراعاندى وبلىسىنا تيەسىلى.
ازاماتتار كوبىنەسە مەديتسينالىق كومەكتىڭ ساپاسىز كورسەتىلگەنىن ايتىپ شاعىمدانادى (32,6%). ەكىنشى ورىندا مەديتسينالىق كومەك كورسەتۋدەن باس تارتۋ تۇر (19%). سونداي-اق مەديتسينالىق كومەكتى ۇزاق كۇتۋ (5,8%), ءدارى-دارمەكتەرمەن قامتاماسىز ەتۋدەن باس تارتۋ (4,8%), ەتيكا مەن دەونتولوگيانى بۇزۋ (4%), مەديتسينالىق ۇيىمنىڭ اقپاراتتىق جۇيەلەرىندە كورسەتىلمەگەن قىزمەتتى كورسەتىلدى دەپ كورسەتكەن جالعان اقپارات (3,2%) بويىنشا شاعىمدار ءتۇستى.
«ناۋقاستار ءوز ەمحانالارىندا بەيىندى ماماندار بولماعان كەزدە, باسقا مەديتسينالىق ۇيىمدارعا جولداما الا الماعاندارىن نەمەسە اقىلى نەگىزدەگى تەكسەرۋلەر مەن كونسۋلتاتسيالارعا جىبەرىلگەندەرىن, سونىمەن قاتار, ۋاقتىلى ەم الا الماي نەمەسە ساپاسىز ەمدەلگەندەرىن, بەيىندى دارىگەرلەردىڭ كونسۋلتاتسيالارىن ۇزاق كۇتكەندەرىن, مەديتسينا قىزمەتكەرلەرىنىڭ دورەكى ارەكەتى, تمككك كىرەتىن مەديتسينالىق كومەكتى الۋعا ساقتاندىرۋ مارتەبەسىن زاڭسىز تالاپ ەتكەندەرىن جانە ءوز قۇقىقتارى بۇزىلعانىن ايتىپ شاعىمدانادى», دەپ اتاپ ءوتتى الەۋمەتتىك مەديتسينالىق ساقتاندىرۋ قورى.
ەستەرىڭىزگە سالا كەتەيىك, الەۋمەتتىك مەديتسينالىق ساقتاندىرۋ قورىنىڭ ساراپشىلارى ءاربىر شاعىم بويىنشا جوسپاردان تىس مونيتورينگ جۇرگىزەدى جانە ونىڭ قورىتىندىسى بويىنشا بۇزۋشىلىقتار راستالعان جاعدايدا ايىپپۇل سانكتسيالارى قاراستىرىلادى.
قور كەلىپ تۇسكەن ءوتىنىش-شاعىمداردى تالداۋ جانە مونيتورينگ ارقىلى كەرى بايلانىس ساپاسىنا حالىقتىڭ كوڭىلى تولعانىن انىقتايدى. جىل قورىتىندىسى بويىنشا 95,3% تولىققاندى جاۋاپ بەرىلەدى.
