اتالعان ايماقتا كۇننىڭ كۇرت جىلىنۋى مەن جاۋعان جاڭبىردىڭ سالدارىنان ەلدى مەكەندەر مەن شارۋاشىلىق قىزمەت وبەكتىلەرىن سۋ باسۋ قاۋپى تۋىندادى. سۋ تاسقىنىنا قارسى جۇمىستارعا لۋگوۆوي گارنيزونىنداعى بارلاۋ بولىمشەسى جانە موتواتقىشتار باتالونىنان بارلىعى 300-گە جۋىق اسكەري قىزمەتشى جۇمىلدىرىلدى. سونىمەن قوسا اسكەري تەحنيكا دا تارتىلدى.
– بىردەن قۇلان اۋىلىنىڭ تۇرعىندارىنا كومەككە كىرىسىپ كەتتىك. ويتكەنى قيىن جاعدايدا حالىققا قول ۇشىن بەرۋ – اسكەري جانە ازاماتتىق بورىشىمىز, – دەپ اتاپ ءوتتى جاۋىنگەرلىك دايارلىق جونىندەگى بارلاۋ بولىمشەسى كومانديرىنىڭ ورىنباسارى مايور ابزال جانىبەكوۆ.
ارنايى تەحنيكانىڭ كومەگىمەن سۋ ارناسىن باسقا جاققا بۇرۋدى توتەنشە جاعدايدىڭ الدىن الۋ جونىندەگى ورگاندار جۇرگىزەدى, ال اسكەري قىزمەتشىلەر جينالعان سۋدىڭ ۇيلەردى باسۋىنا جول بەرمەۋ ءۇشىن بەكىنىستەر سالىپ جاتىر.
– اسكەريلەردىڭ كەلىپ, كومەكتەسىپ جۇرگەنىنە ريزامىز. ولار ەكى كۇن قاتارىنان بىزگە قول ۇشىن بەرىپ, وسىندا ءجۇر, – دەپ العىسىن ءبىلدىردى رىسقۇلوۆ اۋدانى قۇلان اۋىلدىق وكرۋگىنىڭ وكىلى نۇربولات قويشىباەۆ.
جۇمىس اۋىسىممەن ۇيىمداستىرىلعان. ۇيلەردى سۋ تاسقىنىنان قورعاۋ ءۇشىن 50 ادامنان قۇرالعان توپتار قۇم سالىنعان قاپشىقتاردان بوگەت جاساپ جاتىر.
قازىر اۋدانداعى ەلدى مەكەندەردى سۋ باسۋ قاۋپى ءالى دە سەيىلگەن جوق. الايدا جاعداي باقىلاۋدا.
