جەڭىس قاسىمبەك ۇركەر ەلدى مەكەنىنىڭ تۇرعىندارىمەن كەزدەستى

«ۇركەر ەلدى مەكەنىنىڭ تۇرعىندارىمەن كەزدەستىم. تۇرعىندار ينجەنەرلىك جەلىلەردى، ەلەكترمەن جابدىقتاۋ جەلىلەرىن، الەۋمەتتىك نىسانداردى، جولدار سالۋ، اباتتاندىرۋ، كوگالداندىرۋ، ايالدامالار جانە باسقا دا ماسەلەلەردى كوتەردى. ەلدى مەكەندى دامىتۋدىڭ جالپى جوسپارىن قۇرامىز، ەڭ الدىمەن شەشىلۋى ءتيىس مىندەتتەردى جانە ەكىنشى كەزەڭدە قولعا الۋ قاجەت ماسەلەلەردى انىقتايمىز.

ءبىرىنشى كەزەكتەگى مىندەت - ۇركەر ەلدى مەكەنىندە كارىز جانە ەلەكترمەن جابدىقتاۋ جەلىلەرى ماسەلەسىن شەشۋ. ءبىز مۇنى ءبىرىنشى كەزەكتە ورىندايمىز. سول سياقتى بىرقاتار الەۋمەتتىك نىساننىڭ قۇرىلىسىن جۇرگىزىپ جاتىرمىز. ماسەلەن، مەردىگەرلەرگە بيىل دەنە شىنىقتىرۋ-ساۋىقتىرۋ كەشەنى مەن ءورت ءسوندىرۋ دەپوسىنىڭ قۇرىلىسىن اياقتاۋ مىندەتى تاپسىرىلدى»، دەپ جازدى اكىم.

سونداي-اق اكىمنىڭ ايتۋىنشا، وسى ەلدى مەكەندە ەكى مەكتەپ (2024 جىلى جانە 2025 جىلى پايدالانۋعا بەرىلەدى) سالىنادى. قالادا كەلەسى وقۋ جىلىنا 13 مەكتەپ سالۋ جوسپاردا بار. مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا 100 مىڭ وقۋشى ورنىنا ارنالعان 25 مەكتەپ (2 اۋىسىمدى) سالىنادى. ولاردىڭ قۇرىلىسى بيىلدان باستالادى.

«استانادا 16 ەلدى مەكەن بار. ەلوردانىڭ ءاربىر ءتورتىنشى تۇرعىنى ەلدى مەكەندە تۇرادى. ءاربىر ەلدى مەكەننىڭ تۇرعىندارىمەن جەكە كەزدەسەمىن. اۋداندار مەن ەلدى مەكەندەردى دامىتۋ جوسپارىن بىرلەسىپ انىقتايمىز»، دەپ جازدى ەلوردا اكىمى.