رىباكينانىڭ جارقىن جەڭىسى وسى سپورت ءتۇرىن سەرىك ەتكەندەردى جىگەرلەندىرۋگە ءتيىس

سۇلۋ دا، سىمباتتى ەلەناعا دەيىن قازاقستاننىڭ بىردە-ءبىر تەننيسشىسى ەش­ۋاقىتتا «ۇلكەن دۋلىعا» ساناتىندا­عى تۋرنيرلەردىڭ جەكەلەگەن سايىسىندا جارتىلاي فينالعا دەيىن جەتكەن ەمەس. ءتۇرلى ءدۇبىرلى دودالاردا ياروسلاۆا شۆەدوۆا، يۋليا پۋتينتسەۆا جانە ەلەنا رىباكينانىڭ بىرنەشە مارتە شيرەك فينالدا ونەر كورسەتكەنى ەسىمىزدە. مىنە، ەڭ ۇزدىك ناتيجەمىز وسى عانا ەدى. شىنى كەرەك، بىلتىرعى ماۋسىمعا دەيىن الىسقا «شابا المادىق». سول سەڭدى رىباكينا بۇزدى. 1999 جىلدىڭ 17 ماۋسىمىندا ماسكەۋدە دۇنيەگە كەلگەن ول ءاۋ باستا جاس­وسپىرىمدەر مەن جاستار اراسىنداعى جارىستاردا ءوزىن جاقسى قىرىنان كورسەتتى. 2015 جىلى ەرەسەكتەردىڭ دۋىنا قوسىلدى. بىراق ەلەنانىڭ جولى بىردەن وڭعارىلا قويمادى. رەسەي تەننيس فەدەراتسياسى ­تاراپىنان قاجەتتى جاعداي جاسالىپ، ءتيىستى قامقورلىق كورسەتىلمەگەننەن كە­يىن رىباكينا 2018 جىلى قازاقستاننىڭ ازاماتتىعىن الۋعا نيەت ءبىلدىردى. ول ءبىز­دىڭ ەلگە كەلگەننەن كەيىن عانا ءوزىن مىق­تى تەننيسشى رەتىندە مويىنداتا باس­تادى. ءسوزىمىز دالەلدى بولۋ ءۇشىن مىنا دەرەكتەرگە نازار اۋدارايىق: 2017 جىل­دىڭ سوڭىندا WTA رەيتينگىندە ەلەنا 425-ورىندى قاناعات تۇتتى. ول كەزدە تەن­نيسشى رەسەيدىڭ نامىسىن قورعاپ جۇرگەن. قازاق ەلىنە قونىس اۋدارعان سوڭ بىردەن 243 ساتىعا جوعارىلاپ، 182-ورىنعا تۇراقتادى. سودان كەيىن-اق ونىڭ تاسى ورگە دومالادى. 2019 جىلى 37، 2020 جىلى 19-ورىنداردى يەلەندى. 2021 جىلدىڭ سوڭىندا ۇزدىكتەر تىزىمىندە 14-ساتىعا جايعاستى. بىلتىرعى ماۋسىمدى ول 22-ورىنمەن قو­رىتىندىلادى. ال كۇنى كەشە عانا وتاندا­سىمىز توپ-10 ويىنشىنىڭ قاتارىنا قوسىلدى. مىنە، پروگرەسس دەپ وسىنى ايت!

قازاقستاننىڭ نامىسىن قورعاعان بەس جىلعا جۋىق ۋاقىت ارالىعىندا رىبا­كينانىڭ سپورتتىق مانسابىندا جار­قىن جەڭىستەر از بولعان جوق. ول WTA تۋر­نيرلەرىن ءۇش رەت ۇتىپ، بىرنەشە رەت فينالدا وينادى. بىلتىر ۋيمبلدون دوداسىندا دارا شىقتى. «ۇلكەن دۋلىعا» ساناتىنداعى جارىستاردىڭ جۇلدە قورى وتە قوماقتى ەكەنى بارشاعا ءمالىم. بىلتىر لوندونداعى جارىستا ول 40 350 000 فۋنت ستەرلينگتى قۇرادى. جەكەلەگەن سايىستا باس جۇلدەنى ولجالاعان ويىنشىلار ­2 ميل­ليونعا يەلىك ەتتى. سول سومانىڭ قو­ماقتى ءبىر بولىگىن ەلەنا قازاقستاننىڭ جاستار تەننيسىنىڭ دامۋىنا جۇمساپ، حالىقتىڭ اق العىسىنا بولەندى.

كۇنى كەشە عانا اياقتالعان اۋسترا­ليانىڭ اشىق بىرىنشىلىگىنىڭ جۇلدە قورى 51 384 291 اقش دوللارىن قۇرادى. فينال­عا شىققانى ءۇشىن وتانداسىمىزدىڭ ەسەپشوتىنا 1 120 000 دوللار اۋدارىلدى. مەلبۋرندە رەسەيلىك اناستاسيا پاۆ­ليۋچەنكوۆا ەكەۋى جۇپتىق باسەكەدە ءۇشىن­شى كەزەڭگە دەيىن جەتتى. سول ءۇشىن ول تاعى
46 408 دوللاردى ءوز ءاميانىنا سالدى. مىنە، ۇلدە مەن بۇلدەگە وراندى دەگەن وسى ەمەس پە؟!

ەلەنا رىباكيناعا دەيىن «ۇلكەن دۋ­لىعا» تۋرنيرلەرىنىڭ جەكەلەگەن سايىسىندا بىردە-ءبىر جەرلەسىمىزدىڭ شيرەك فينالدىق مەجەدەن اسا الماعانى جايىن­دا جوعارىدا ايتتىق. دەسەك تە جۇپتىق باسەكەلەردە اۋىز تولتىرىپ ايتارلىق­تاي تابىستارعا قول جەتكىزگەنىمىزگە ەش­كىمنىڭ ءشۇبا كەلتىرمەسى انىق. ماسەلەن ياروسلاۆا شۆەدوۆا امەريكالىق ۆانيا كينگپەن بىرگە 2010 جىلى US open جانە ۋيمبلدوندا بارلىق قارسىلاسىن سىپىرا ۇتىپ، باس جۇلدەنى ولجالادى. 2015 جىلى اۋستراليالىق كەيسي دەللاكۆا ەكەۋى رولان گارروستىڭ فينالىندا كۇش سىناستى. 2021 جىلى پاريجدە اندرەي گولۋبەۆ پەن الەكساندر بۋبليك جۇبى اقتىق سىنعا دەيىن القىنباي جەتتى. ەلى­مىزدىڭ قوس مىقتى تەننيسشىسى نەبىر دۇل­دۇلدەردى جولىنان ىعىستىردى. الاي­دا شەشۋشى تۇستا ولار فرانتسيالىق نيكوليا مايۋ مەن پەر-يۋگ ەربەرگە ەسە جىبەرىپ، رولان گارروستى ەكىنشى ورىن­­مەن قورىتىندىلادى. 2020 جىلى الەكساندر بۋبليك پەن ميحايل كۋكۋشكين اۋستراليانىڭ اشىق بىرىنشىلىگىنىڭ جارتىلاي فينالىندا وينادى.

ءسوز ورايى كەلگەندە، قازاقستانعا قا­تىسى بار تاعى بىرنەشە تەننيسشى جا­يىندا ايتا كەتسەك، ەش ايىبى جوق دەپ ويلايمىز. سولاردىڭ اراسىنان ەلەنا ليحوۆتسەۆانى بولە-جارا اتاپ وتۋگە بولادى. 1975 جىلى الماتىدا دۇنيەگە كەلگەن ول 20 جاسىنا دەيىن قازاقستاننىڭ تۋى استىندا ونەر كورسەتتى. سودان كەيىن رەسەيگە قونىس اۋداردى. سول ەلدىڭ نامىسىن قورعاعان كەزدە ميكس­تە «ۇلكەن دۋلىعا» دودالارىنىڭ ەكى دۇركىن جەڭىمپازى، جۇپتىق سايىستا ءتورت دۇركىن ءفيناليسى اتانىپ، جەكەلەگەن باسەكەدە رولان گارروستا ۇزدىك تورتتىكتىڭ قاتارىنان كورىندى. 1999 جىلدىڭ كۇزىندە ول توپ-15 ويىنشىنىڭ ساناتىنا قو­سىلدى. تانىمال تەننيسشىلەر اراسىنان بول­گاريالىق سەسيل كاراتانچەۆا مەن رەسەيلىك كسەنيا پەرۆاك تا بىرەر جىل قازاقستاننىڭ اتىنان ءتۇرلى جارىستا باق سىنادى. الايدا بۇل ويىنشىلار ەلدى ەلەڭ ەتكىزەتىندەي تابىستارعا قول جەتكىزە العان جوق.

سونىمەن، قازىرگى كەزدەگى جاڭارتىلعان الەمدىك رەيتينگتە جەرلەستەرىمىز مىناداي ورىنداردى يەلەنىپ وتىر: اتر: الەكساندر بۋبليك – 36 ورىن، تيموفەي سكاتوۆ – 129، ميحايل كۋكۋشكين – 214، بەيبىت جۇقاەۆ – 305، دەنيس ەۆسەەۆ – 335 جانە دميتري پوپكو – 384. WTA: ەلەنا رىباكينا – 10، يۋليا پۋتينتسەۆا – 44، جىبەك قۇلامباەۆا – 449، گوزال اينۋتدينوۆا – 506 جانە اننا دانيلينا – 542.