كوكسايدىڭ تابانىنان سۋ جۇرەتىن كۇن جاقىن
اۋىل-ايماعى نەگىزىنەن الاتاۋدىڭ ەتەگىن جايلاعان جۋالى قىستا قارى قالىڭ, كوكتەمى كەش شىعاتىن اۋدان بولعانىمەن جازدا كۇنى اعىن سۋعا قاراپ تۇر. «جەتى كۇن جاۋعان جاڭبىردان, جەلىپ وتكەن سۋ ارتىق» دەگەن, تاۋ توپىراعى قانشا ىلعالدى بولسا دا كوكونىس, جەمىس-جيدەك ەگىلگەن القاپقا شىلدەنىڭ ىستىعىندا ارقىراپ اققان سۋ اۋاداي قاجەت. ايتسە دە, سوڭعى ەكى جىلدا جۋالى جۇرتىن اعىن سۋ ماسەلەسى قاتتى الاڭداتىپ تۇر. ناقتىراق ايتساق, وسى اۋداندى سوناۋ 1964 جىلدان بەرى نۋلاندىرىپ وتىرعان كوكساي (بىستروتوك) كانالىنىڭ باس جاعى ءبىزدىڭ جەردەن باستاۋ العانىمەن, ورتاسىنىڭ 11 شاقىرىمىنان استام بولىگى قىردىڭ ارعى جاعىنداعى قىرعىز اعايىنداردىڭ اۋماعى ارقىلى وتەدى. بىلتىر ايىرقالپاقتى اعايىندار اشۋعا ءمىنىپ, باۋ-باقشا, ەگىستىك ناعىز قاتالاپ تۇرعان شاقتا ارىقتى جاۋىپ تاستاعانىن اقپارات قۇرالدارىنىڭ ءبارى جازدى. «كورشى ەلدىڭ سۋ بەرمەۋىنە بايلانىستى 2012-2013 جىلدارى وسى ماڭداعى شارۋالار وتە كوپ قيىندىق كوردى. سۋ دەر كەزىندە جەتپەي, ونىمدىلىك ازايىپ كەتتى», دەيدى وسىنداعى شارۋا قوجالىعىنىڭ توراعاسى كەرىمقۇل بەگاليەۆ.
ارىققا بولا ات توبەلىندەي اعايىن اراز بولىپ, كورشىمەن ءوستىپ كەلىسە الماي جۇرگەندە اققان سۋ مەن ەككەن ەگىندە بەرەكە بولا ما؟ سوندىقتان ەل ۇكىمەتى وتكەن جىلى كوكساي كانالىنىڭ قىرعىزستان جاعىنداعى بولىگىن جاۋىپ, ارىقتى بەرگى جاقتان سالۋعا شەشىم قابىلداعان ەدى. ءدال قازىر ۇزىندىعى 24,5 شاقىرىمدى قۇرايتىن وسىناۋ قۇرىلىسپەن «سۇڭقار» جانە «جىگەر 2004» جشس-لەر اينالىسۋدا. وعان 5 ميلليارد 800 ميلليونداي تەڭگە بولىنگەن. قۇرىلىس 3 كەزەڭ بويىنشا جۇرگىزىلەدى. ەرىگەن مۇزداقتاردىڭ سۋىن جينايتىن قۇز ىشىندەگى باستى قۇرىلىمنىڭ قۇرىلىسى اياقتالدى. سونداي-اق, 1240 مەتر تەمىر-بەتون قۇبىردىڭ 1 شاقىرىمى سالىنىپ قويىلدى. تومەندەگى تەمىر قۇبىردىڭ 16 شاقىرىمى دا دايىن. «قازسۋشار» رمك جامبىل وبلىستىق فيليالى ديرەكتورىنىڭ ورىنباسارى قوڭىرباي شاكارىم بۇل كانالدىڭ سەكۋندىنا 3,5 تەكشە مەتر سۋ وتكىزۋگە لايىقتالىپ جاسالىپ جاتقانىن ايتادى. باستى ماقسات – 1 شىلدەگە دەيىن وسى كانال ارقىلى جۋالىعا سۋ جەتكىزۋ. الايدا, بيىل كوكتەم جاڭبىرلى بولىپ, جۇمىس ەداۋىر كەش باستالىپتى. جارىلىس جاساپ, بۇزىلۋى ءتيىس تۇمسىقتاعى جۇمىس ەكى اۋىسىمدا جۇرگىزىلىپ جاتىر. الدا-جالدا جاڭا كانالدى مەرزىمىندە تاپسىرۋ مۇمكىن بولماي جاتسا, شىلدەدە سۋدى ەسكى ارنا ارقىلى بەرۋ جولدارى قاراستىرىلۋدا ەكەن.
«بۇگىندە كوكساي ارقىلى جۋالى اۋدانىنىڭ 2,2 مىڭ گەكتار جەرىنە سۋ جەتەدى. ال جاڭا كانال ىسكە قوسىلعاندا سۋارمالى اۋماق بۇدان 5 ەسەگە كوبەيەدى. بۇل, ارينە, اۋداننىڭ اۋىل شارۋاشىلىعى سالاسىنىڭ دامۋىنا ۇلكەن ۇلەس قوسادى», دەيدى جامبىل وبلىسىنىڭ اكىمى كارىم كوكىرەكباەۆ.
قازىر قۇرىلىس باسىنداعى 10 بريگادا, ياعني 190 جۇمىسشى مەن 60 تەحنيكا «كوكسايدى» مەرزىمىندە پايدالانۋعا بەرۋگە بار كۇشتەرىن سالۋدا.
ورالحان ءداۋىت,
«ەگەمەن قازاقستان».
جامبىل وبلىسى.
سۋرەتتەردى تۇسىرگەن
اقادىل رىسماحان.
