تۇركىستان وبلىسىندا كوشەلەر مەن اۋلالاردى سۋ باستى

توتەنشە جاعدايلار مينيسترلىگىنىڭ مالىمەتىنشە، 8:00-دەن باستاپ تاۋلى ايماقتاردا جاۋعان جاۋىن-شاشىن مەن قاردىڭ ەرۋى اۋلالار مەن كوشەلەردەگى اپاتتىڭ سەبەبى بولعان. سونىڭ سالدارىنان سۋ دەڭگەيى كوتەرىلىپ، كەيىننەن تاسىپ كەتكەن.

«توتەنشە جاعدايلار دەپارتامەنتى مەن جەرگىلىكتى اتقارۋشى ورگانداردىڭ كۇشتەرىمەن ۇيلەردى سۋ باسۋدىڭ الدىن الۋ ماقساتىندا جاڭبىر سۋىن سورىپ، اعىزۋ جۇمىستارى جۇرگىزىلىپ جاتىر»، دەپ حابارلادى توتەنشە جاعدايلار مينيسترلىگىنىڭ ءباسپاسوز قىزمەتىنەن. 

جۇمىسقا 50-دەن استام قۇتقارۋشى، 10 تەحنيكا جانە 20 موتوپومپا جۇمىلدىرىلعان.

2023 جىلدىڭ 24 قاڭتارىندا ۇكىمەت وتىرىسىندا قازاقستان رەسپۋبليكاسىنىڭ توتەنشە جاعدايلار ءمينيسترى يۋري يلين ەلىمىزدىڭ 255 ەلدى مەكەنىن، ياعني 127 مىڭنان استام جانە ودان دا كوپ ۇيلەردى سۋ باسۋ قاۋپى بار ەكەنىن ايتقان ەدى. ول قاۋپى جوعارى وڭىرلەرگە اقمولا، اقتوبە، الماتى، اتىراۋ، شىعىس قازاقستان، جامبىل، باتىس قازاقستان، قاراعاندى، قوستاناي، سولتۇستىك قازاقستان، تۇركىستان، اباي جانە جەتىسۋ وبلىستارى كىرەتىنىن اتاپ ءوتتى. ال ورتاشا قاۋىپتە ۇلىتاۋ جانە پاۆلودار وبلىستارى تۇر.