قازاقستان ەلشىسى ليتۆا پرەزيدەنتىنە سەنىم گراموتالارىن تاپسىردى

سالتاناتتى راسىمنەن كەيىن وتكەن كەزدەسۋ بارىسىندا ەلشى ليتۆا كوشباسشىسىنا قازاقستان پرەزيدەنتى قاسىم-جومارت توقاەۆتىڭ جىلى لەبىزدەرىن جانە ىزگى تىلەكتەرىن جەتكىزدى.

قازاقستاندىق ديپلومات ءوز سۇحباتتاسىن استانانىڭ ۆيلنيۋسپەن ەكىجاقتى ىنتىماقتاستىقتى، ونىڭ ىشىندە ساۋدا-ەكونوميكالىق، كولىك-لوگيستيكالىق ىنتىماقتاستىق سالالارىندا ودان ءارى نىعايتۋعا ۇلكەن ءمان بەرەتىنىنە سەندىردى.

ت. ورازاەۆ سۇحباتتاسىن ەلىمىزدە جۇرگىزىلىپ جاتقان ساياسي جانە الەۋمەتتىك-ەكونوميكالىق رەفورمالارمەن، سونداي-اق الداعى قازاقستان پارلامەنتى ءماجىلىسى دەپۋتاتتارى سايلاۋىنىڭ نەگىزگى جاڭالىقتارىمەن تانىستىردى.

ءوز كەزەگىندە ليتۆا كوشباسشىسى ەلىمىزدە جۇرگىزىلىپ جاتقان ساياسي جاڭعىرۋدى جوعارى باعالاپ، تىعىز جانە كوپقىرلى قازاقستان-ليتۆا ىنتىماقتاستىعى ەكى ەل حالىقتارىنىڭ يگىلىگى ءۇشىن ودان ءارى دامي بەرەتىنىنە سەنىم ءبىلدىردى.

ليتۆا پرەزيدەنتى قازاقستان پرەزيدەنتى ق. توقاەۆپەن وتكەن جىلدىڭ قىركۇيەگىندە نيۋ-يورك قالاسىندا وتكەن كەزدەسۋدى جىلى لەبىزبەن ەسكە الىپ، قازاقستان باسشىسىن ۆيلنيۋسكە رەسمي ساپارمەن كەلۋگە شاقىردى.

كەزدەسۋ بارىسىندا تاراپتار ەكىجاقتى قارىم-قاتىناستاردىڭ بىرقاتار وزەكتى ماسەلەلەرىن تالقىلاپ، كولىك باعىتتارىنىڭ، ونىڭ ىشىندە ورتا ءدالىز باعىتى بويىنشا ترانسكاسپيلىك باعىتتىڭ ترانزيتتىك الەۋەتىن ودان ءارى ىسكە اسىرۋعا باسا نازار اۋداردى.

سۇحباتتاستار ينۆەستيتسيالار، اۋىل شارۋاشىلىعى، ءبىلىم بەرۋ جانە مەديتسينا سالاسىنداعى ءوزارا ءىس-قيمىلدىڭ كەڭ پەرسپەكتيۆالارىنىڭ بار ەكەنىن اتاپ ءوتتى.

كەزدەسۋ سوڭىندا ليتۆا پرەزيدەنتى ەلشىنى رەسمي قىزمەتكە كىرىسۋىمەن قۇتتىقتاپ، قازاقستان-ليتۆا قاتىناستارىن ودان ءارى نىعايتۋ ىسىنە تابىس تىلەدى.