«اق جول» ۇمىتكەرلەرىن انىقتادى

سونىمەن قاتار بارلىق دەڭگەيدەگى جەرگىلىكتى ءماسليحاتتار دەپۋتاتتارىن ساي­لاۋعا «اق جول» پارتياسىنىڭ اتىنان – 174، ال ما­جوريتارلىق جۇيەمەن 652 كانديدات ۇسىنىل­ماق. سونداي-اق سەزدە پارتيانىڭ سايلاۋال­دى باعدارلاماسى قابىلداندى. جالپى، قۇرىل­تايدا پارتيانىڭ پارلامەنت ءماجىلىسى مەن بار­لىق دەڭگەيدەگى ءماسليحاتتاردىڭ كەزەكتەن تىس سايلاۋىنا قاتىسۋ ماسەلەلەرى قارالىپ، پارتيانىڭ جاڭارتىلعان ساياسي باعدار­لاماسى، پارتيالىق تىزىمدەر مەن ءبىر ماندات­تى اۋماقتىق سايلاۋ وكرۋگتەرى بو­يىنشا ساي­لاناتىن كانديداتتاردىڭ تىزىمدەرى، بارلىق دەڭ­گەيدەگى جەرگىلىكتى ماسليحاتتارعا «اق جول» دە­مو­كراتيالىق پارتياسىنان كان­ديداتتار ۇسىنۋ تۋرالى وبلىستىق جانە قا­لا­لىق كونفەرەنتسيالاردىڭ شەشىمدەرىن بەكىتتى.

قۇرىلتايدا سويلەگەن سوزىندە پارتيا جەتەكشىسى ازات پەرۋاشەۆ قازاقستاننىڭ ەۋ­روپالىق دامۋ جولىمەن ءجۇرۋى كەرەك ەكەنىن العا تارتتى.

– ءبىزدىڭ تاڭداۋىمىز، ياعني «اق جول» دە­مو­كراتيالىق پارتياسىنىڭ تاڭداۋى – ەۋرو­پالىق دامۋ جولى، مەملەكەت پەن قوعام قاتى­ناس­تارىنداعى ەۋروپالىق تاسىلدەر، ءومىر ساپاسىنىڭ ەۋروپالىق ستاندارتتارى ەلىمىزگە اكەلۋ. سونىمەن قاتار «اق جول» پارتياسى بولاشاقتا قازاقستاننىڭ ەۋروپالىق وداققا كىرۋى ماسەلەسىن دە قاراستىرىپ وتىر، – دەدى ا.پەرۋاشەۆ.

پارتيا توراعاسى ەۋروپالىق دامۋ جولىنىڭ مىسالى رەتىندە ءادىل سايلاۋ وتكىزۋ، ەلەكتروندى داۋىس بەرۋدى جۇزەگە اسىرۋ، تاۋەلسىز جانە ءادىل سوت جۇيەسىن قۇرۋ جانە دەموكراتيا مەن پارلامەنتاريزمدى دامىتۋ قاجەتتىلىگىن ايتتى. وسى ايتىلعان ماسەلەنىڭ ءبارى پارتيانىڭ سايلاۋ­الدى باعدارلاماسىنىڭ جوباسىنا ەنگىزىلگەن. «بيىلعى ءماجىلىس جانە ءماسليحاتتار سايلاۋى ەرەكشە وتەدى. مەملەكەت باسشىسى بۇل سايلاۋدىڭ بولاتىنىن جارتى جىل بۇرىن جاريالادى. سوندىقتان بۇكىل ساياسي كۇشتەرگە، پارتيالارعا، ونىڭ ىشىندە ءبىزدىڭ پارتيامىزعا دايىندالۋعا تولىق مۇمكىندىك بەرىلدى. كەز كەلگەن بيلەۋشى پارتيا بيلىگىن ەرتە مە، كەش پە جوعالتادى. بۇل – زاڭ. ماڭگىلىك بيلىكتە بولاتىن بىردە-ءبىر ەل، بىردە-ءبىر پارتيا جوق. ەرتە مە، كەش پە ولار ۇتىلادى، ولاردىڭ ورنىنا باسقا پارتيالار كەلەدى. ول ءبىز بولۋىمىز كەرەك»، دەدى ازات پەرۋاشەۆ.

جيىندا پارتيانىڭ ساياسي باعدارلاماسى تانىستىرىلدى. قۇجات تاۋەلسىزدىك جانە «الاش» ۇلتتىق يدەياسى; دەموكراتيا جانە پارلامەنتاريزم; جەمقورلىقپەن كۇرەس جانە دەوفشوريزاتسيا; الەۋمەتتىك ادىلەتتىلىك; نارىقتىق ەكونوميكا مەن كاسىپكەرلىكتى قولداۋ جانە سىرتقى ساياسات دەگەن 6 بولىمنەن تۇرادى.

– ءبىز «الاشتىڭ» ساياسي مۇرالارىن قازاق­ستاندى جاڭعىرتۋدىڭ ۇلتتىق يدەياسى رەتىندە قارايمىز جانە ولاردىڭ مۇراتىن مەملە­كەتتىك قۇرىلىستا، ەكونوميكا جانە قوعامدا تاباندىلىقپەن جىلجىتاتىن بولامىز. ول ءۇشىن تابيعي بايلىق پەن ەگەمەندىك قانا ەمەس، پارلامەنتاريزم، ادال باسەكەلەستىك، رەسۋرستىق ۇلتشىلدىق، جاڭعىرۋ، اشىق جانە زايىرلى مەملەكەت سياقتى تۇپكىلىكتى قاعيداتتارعا سۇيەنە وتىرىپ وزگەرتۋگە جانە ءوزىمىز وزگەرۋ ءۇشىن سايا­سي جىگەر كەرەك. «الاش» قايراتكەرلەرىنىڭ «جەرىمىزدىڭ ءاربىر ءتۇيىر تاسى قازاقتىڭ كەۋدەسىنە تۇيمە بولىپ تاعىلىپ، ءاربىر ۋىس ءجۇنى – يىعىنا توقىما بولىپ كيىلۋگە ءتيىس دەگەن ۇرانى ءالى دە وزەكتى، – دەدى ازات پەرۋاشەۆ.

باعدارلامانىڭ جاڭا نۇسقاسىنىڭ تانىس­تىرىلىمىنان كەيىن تالقىلاۋ ءوتىپ، ونىڭ بارىسىندا سپيكەرلەر وي-پىكىرلەرىن ورتاعا سالدى. بايانداماشىلار مەن دەلەگاتتار قۇجاتتى قولدايتىندىقتارىن ءبىلدىرىپ، ءوز ۇسىنىستارىن ايتتى. قۇرىلتاي كەلىپ تۇسكەن ۇسىنىستاردى ەسكەرە وتىرىپ، ءماتىننىڭ سوڭعى نۇسقاسىن دا­يىندايتىن رەداكتسيالىق كوميسسيانى تاڭداۋعا داۋىس بەردى.