كامەلەتكە تولماعان جاسوسپىرىمدەر قانداي جۇمىس ىستەي الادى؟

كامەلەتكە تولماعاندار نەشە جاستان باستاپ جۇمىس ىستەي الادى؟ 

ەڭبەك كودەكسىنىڭ 31-بابىنا سايكەس، ەڭبەك كەلىسىمشارتى 16 جاسقا تولعان ازاماتتارمەن جاسالادى. دەگەنمەن ەڭبەك كەلىسىمشارتىن 14-15 جاستاعى جاسوسپىرىمدەر دە جاساسۋعا قۇقىلى، الايدا بۇعان قاتىستى بىرنەشە تالاپ بار:

• نەگىزگى ورتا جانە جالپى ورتا ءبىلىم الىپ جاتقان 15 جاستاعى جاسوسپىرىمدەر وقۋدان بوس ۋاقىتتا، دەنساۋلىعىنا زيان كەلتىرمەيتىن، وقۋ پروتسەسىن بۇزبايتىن جەرلەردە جۇمىس ىستەي الادى;
• 14 جاسقا تولعان وقۋشىلار كينەماتوگرافيا ۇيىمدارى، تەاتر، كونتسەرت ۇيىمدارى، تسيركتە دەنساۋلىعىنا جانە يماندىلىق تۇرعىسىنان دامۋىنا نۇقسان كەلتىرمەيتىن بولسا، جۇمىس ىستەي الادى. 

14-15 جاستاعى جاسوسپىرىمدەر جۇمىسقا تۇرعان كەزدە ەڭبەك شارتىنا وزىمەن بىرگە زاڭدى وكىلىنىڭ بىرەۋى قول قويۋى ءتيىس. 

جاسوسپىرىمدەر اپتاسىنا نەشە ساعات جۇمىس ىستەي الادى؟

ەڭبەك كودەكسىنىڭ 69-بابىنا سايكەس:

• 14-15 جاستاعى ازاماتتار اپتاسىنا 24 ساعات;
• 16-17 جاستاعى ازاماتتار اپتاسىنا 36 ساعات جۇمىس ىستەي الادى. 

مۇنىمەن قاتار، ەڭبەك كودەكسىنىڭ 26-بابىنىڭ 2-تارماعىنىڭ بەسىنشى تارماقشاسىنا سايكەس 18 جاسقا تولماعان جۇمىسكەرلەردى ەڭبەك جاعدايلارى زياندى جانە (نەمەسە) قاۋىپتى جۇمىستارعا ورنالاستىرۋعا جول بەرىلمەيدى.

جاسوسپىرىمدەر زەينەتاقى قورىنا قالاي جارنا اۋدارادى؟ 

«قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنىڭ 24-بابىنىڭ 6-تارماعىنا سايكەس، مىندەتتى زەينەتاقى جارنالارىن، مىندەتتى كاسىپتىك زەينەتاقى جارنالارىن ەسەپتەۋ ۇشىن تابىسقا سالىمشىنىڭ جاسىنا جانە مارتەبەسىنە قاراماستان اقشالاي ماندە ەڭبەكاقى تولەۋدىڭ بارلىق تۇرلەرى جانە وزگە دە كىرىستەر ەنگىزىلەدى.  

بىرىڭعاي جيناقتاۋشى زەينەتاقى قورىنا تولەنۋگە جاتاتىن مىندەتتى زەينەتاقى جارناسى اتالعان زاڭنىڭ 25-تارماعىنىڭ 1-تارماقشاسىنا سايكەس، جارنانى ەسەپتەۋ ءۇشىن قابىلداناتىن اي سايىنعى تابىستىڭ 10 پايىزى مولشەرىندە بەلگىلەنەدى.

بۇل رەتتە مىندەتتى زەينەتاقى جارناسىن ەسەپتەۋ ءۇشىن قابىلداناتىن اي سايىنعى تابىس رەسپۋبليكالىق بيۋدجەت تۋرالى زاڭدا ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 50 ەسەلەنگەن مولشەرىنەن اسپاۋى ءتيىس. 

قانداي جۇمىستاردى ىستەۋگە تىيىم سالىنعان؟ 

18 جاسقا تولماعان جۇمىسكەرلەردىڭ ەڭبەگىن پايدالانۋعا تىيىم سالىناتىن جۇمىستاردىڭ تىزىمى دەنساۋلىق ساقتاۋ جانە الەۋمەتتىك دامۋ ءمينيسترىنىڭ 2015 جىلعى 8 جەلتوقسانداعى № 944 بۇيرىعىمەن بەكىتىلگەن.

اتالعان تىزىمدە دەنساۋلىققا زيان جانە ادام ءومىرى ءۇشىن اسا قاۋىپتى سالالار مەن جۇمىستاردىڭ ءتىزىمى جازىلعان.

مىسالى، جاسوسپىرىمدەرگە اتوم ەلەكتر ستانتسيالارى، كوكسحيميا ءوندiرiسى، تسەمەنت ءوندiرiسi، ەلەكتر ەنەرگەتيكاسى سالالارىندا جانە سۇڭگۋىر، گازشى، جانار-جاعارماي قۇيۋشى، قۇتقارۋشى بولىپ جۇمىس ىستەۋگە بولمايدى. 

جاسوسپىرىمدەر قوعامدىق جۇمىستاردى قالاي ىستەيدى؟

قازىر جاستاردى جۇمىسپەن قامتۋ ءۇشىن 2021-2025 جىلدارعا باعىتتالعان كاسىپكەرلىكتى دامىتۋ ۇلتتىق جوباسى جۇزەگە اسىپ جاتىر. 

«قر «حالىقتى جۇمىسپەن قامتۋ تۋرالى» زاڭىنىڭ 22-بابىنا سايكەس، ستۋدەنتتەر مەن جالپى ءبىلىم بەرەتىن مەكتەپتەردىڭ جوعارى سىنىپ وقۋشىلارى (16-18 جاستاعى) دەنساۋلىعىنا زيان كەلتىرمەيتىن جانە وقۋ پروتسەسىن بۇزبايتىن جۇمىستارعا وقۋدان بوس ۋاقىتتا قوعامدىق جۇمىستارعا قاتىسا الادى. ۇلتتىق جوبا شەڭبەرىندە ۇيىمداستىرىلاتىن قوعامدىق جۇمىستار الدىن الا كاسىپتىك دايارلاۋدان ءوتۋدى تالاپ ەتپەيدى، سونداي-اق جەرگىلىكتى بيۋدجەت قاراجاتى جانە جۇمىس بەرۋشىلەردىڭ وتىنىمدەرى بويىنشا ولاردىڭ قاراجاتى شەگىندە قارجىلاندىرىلادى»، دەلىنگەن مينيسترلىك جاۋابىندا. 

جالپى ءبىلىم بەرەتىن مەكتەپتىڭ 16-18 جاستاعى وقۋشىسى نەمەسە ستۋدەنت قوعامدىق جۇمىستارعا قاتىسۋ ءۇشىن:

• ءوتىنىش;
• اتا-اناسى نەمەسە زاڭدى وكىلدەرىنىڭ ءبىرىنىڭ جازباشا كەلىسىمىن;
• ءبىلىم بەرۋ ۇيىمىنىڭ وقۋ پروتسەسىنەن تىس قوعامدىق جۇمىستارعا قاتىسۋعا جازباشا كەلىسىمىن وتكىزۋى كەرەك.

سونىمەن قاتار ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى جاسوسپىرىمدەر ءوز بەتىنشە جۇمىس ىزدەۋ جانە جۇمىسقا ورنالاسۋ ءۇشىن بوس جۇمىس ورنىنا ورنالاسۋعا كونكۋرس جاريالاعان جۇمىس بەرۋشىگە تىكەلەي جۇگىنە الاتىنى، سونداي-اق  www.enbek.kz ەلەكتروندىق ەڭبەك بيرجاسىندا ۇيىمدار مەن مەكەمەلەردىڭ ۇسىنعان بوس لاۋازىمدارىن ىزدەي الاتىنىن ەسكە سالدى.

گۇلشاحرا سانسىزباي