استانادا بالاباقشا كەزەگىندە 45 مىڭ بالا تۇر

«قالامىز دارىندى جانە زيالى ازاماتتار شوعىرلانعان ورتالىققا اينالۋعا ءتيىس. بىراق بۇعان كەدەرگى بولىپ وتىرعان جايتتار بار. سونىڭ ءبىرى – بالاباقشاداعى جانە مەكتەپتەگى ورىن تاپشىلىعى. قازىر استانادا بالاباقشا كەزەگىندە 45 مىڭ بالا تۇر. كەزىندە وسى ماسەلە ارنايى مەملەكەتتىك تاپسىرىس ارقىلى شەشىلۋى كەرەك ەدى. بىراق جەكەمەنشىك بالاباقشالارعا قارجى بولىنسە دە، احۋال تۇزەلمەي وتىر. ارينە، ولاردىڭ قىزمەت ساپاسىنا قاتىستى تالاپ بولۋعا ءتيىس. دەگەنمەن ورىنسىز تەكسەرۋ جاساپ، جەكەمەنشىك بالاباقشالاردىڭ جۇمىسىنا كەدەرگى كەلتىرمەۋ كەرەك. قالادا كەيبىر مەكتەپتەر ءالى كۇنگە دەيىن ءۇش اۋىسىممەن وقىتادى»، دەدى مەملەكەت باسشىسى كەڭەس وتىرىسى بارىسىندا.

پرەزيدەنت اتاپ وتكەندەي، ەلوردادا ءبىلىم وشاقتارىنىڭ قۇرىلىسى وتە باياۋ ءجۇرىپ جاتىر. ماسەلەن، وتكەن جىلى قالادا نەبارى 3 مەكتەپ سالىنعان. وعان قوسا 8 مەكتەپ دەر كەزىندە پايدالانۋعا بەرىلمەدى. سونىڭ كەسىرىنەن بالا سانى ارتىق جانە ءۇش اۋىسىممەن وقىتاتىن مەكتەپتەر كوبەيگەن.

«كەي سىنىپتاردا 30-دان استام بالا وقيدى. بۇل، ارينە، ءبىلىم ساپاسىنا كەرى اسەرىن تيگىزەدى. سونىمەن قاتار ەرەكشە قاجەتتىلىگى بار بالالارعا ارنالعان ارنايى مەكتەپتەردە ورىن جەتىسپەيدى. اكىمدىك وقۋ-اعارتۋ مينيسترلىگىمەن بىرلەسىپ، مۇنىڭ ءبارىن شەشۋگە باسا ءمان بەرۋى قاجەت. جالپى، مەكتەپ سالۋ ماسەلەسى بۇل – ستراتەگيالىق مىندەت. ونى ورىنداۋ ءۇشىن مەملەكەت قانا ەمەس، قالتالى ازاماتتار دا بەلسەنە اتسالىسۋى كەرەك. مەن بۇل ماسەلەنى وسىعان دەيىن دە تالاي رەت ايتتىم. بىراق نيەتى بار ازاماتتاردى جانە ناقتى ءىس-ارەكەتتى ازىرگە كورىپ وتىرعان جوقپىز. جالپى، جەكە قارجىعا مەكتەپ سالۋدىڭ جولدارىن ويلاستىرعان ءجون»، دەپ تۇيىندەدى قاسىم-جومارت توقاەۆ.