«اكىمدىك جالپى قۋاتتىلىعى 700 مەگاۆاتت بولاتىن قوسالقى ستانسالاردىڭ قۇرىلىسىن جەدەلدەتۋ قاجەت. بيۋدجەتتەن قوماقتى قارجى بولىنگەن قالانى گازداندىرۋ جۇمىستارى دا قارقىنمەن ءجۇرىپ جاتىر.
2019 جىلى «سارىارقا» گاز قۇبىرىنىڭ ءبىرىنشى كەزەگى اياقتالدى. اكىمدىكتىڭ مىندەتى – 300 مىڭنان استام ادام تۇراتىن ەلدى مەكەندەرگە گاز تارتۋ. قازىر تەك 8 مىڭ ابونەنت قانا گازبەن قامتاماسىز ەتىلدى. گازداندىرۋدىڭ باياۋ قارقىنىنا بايلانىستى ەكولوگيا ناشارلاپ جاتىر - ايازدى كۇندەرى قالانى قالىڭ ءتۇتىن باسادى», دەدى مەملەكەت باسشىسى.
سونداي-اق ول بۇعان دەيىن ەلوردانى گازداندىرۋدى اياقتاۋدى بىرنەشە رەت تاپسىرعانىن, بىراق ونى ورىنداۋ مەرزىمدەرى ۇنەمى كەيىنگە شەگەرىلىپ وتىراتىنىن اتاپ ءوتتى.
«بۇل جاعدايدى تەز ارادا وزگەرتۋ كەرەك. ۇكىمەت پەن اكىمدىك گازداندىرۋ جۇمىستارىن كۇشەيتىپ, مەرزىمىندە اياقتاۋى قاجەت. بۇل رەتتە ۇكىمەت «سامۇرىق-قازىنا» قورىمەن بىرلەسىپ, ەلوردانى قاجەتتى كولەمدەگى گازبەن قامتاماسىز ەتۋ ماسەلەسىن شەشۋى قاجەت.
سونىمەن قاتار ءبىزدىڭ ازاماتتار ءۇشىن گازدى قوسۋدىڭ ءوزى ارزان ەمەس (ەكى ميلليون تەڭگەگە دەيىن). ال بۇل جاعداي بارلىق ايماقتاردا قالىپتاسقان. باسەكەلەستىكتى قورعاۋ جانە دامىتۋ اگەنتتىگىنە ۇكىمەتپەن بىرلەسە وتىرىپ, حالىق ءۇشىن گازدى قوسۋ باعاسىنىڭ اشىق ءارى تۇسىنىكتى بولۋىن قامتاماسىز ەتۋ بويىنشا ناقتى ۇسىنىستار ەنگىزۋدى تاپسىرامىن», دەدى پرەزيدەنت.
