رىباكينا تاعى دا شەبەرلىگىن مويىنداتتى

ەلەنا رىباكينانىڭ مەلبۋرندەگى جارىستاعى ءمىنسىز ونەرىنە تامسانباعان جانكۇيەر جوق-اۋ، ءسىرا! جاسىل قۇرلىقتا ول نەبىر اتاقتى تەننيسشىلەردى جولىنان ىعىستىرىپ، باس جۇلدە ءۇشىن تالاسۋ مۇمكىندىگىنە يە بولدى. جەرلەسىمىز باستاپقى ەكى باسەكەدە ورتاڭقول ويىنشىلار – يتاليالىق ەليزابەتتا كوچچيارەتتو (7:5، 6:3) مەن سلوۆەنيالىق كايۋ يۋۆاننان (6:2، 6:1) ىمباس ءتۇستى. ال ودان كەيىن رىبانىكينڭ جولى كىل مىقتىلارمەن ءتۇيىستى. ءۇشىنشى اينىلىمدا ول ۇزدىكتەر تىزىمىندە 11-ورىنعا تۇراقتاعان امەريكانىق دانيەل كوللينزدى (6:2، 5:7، 6:2) قاپى قالدىردى. ءتورتىنشى كەزەڭدە الەمنىڭ ءبىرىنشى راكەتكاسى، 2020 جانە 2022 جىلدارى رولان گارروستا توپ جارىپ، بىلتىر US Open دوداسىندا باس جۇلدەنى ولجالاعان پولشالىق يگا شۆەنتەكتى ەكى سەتتە (6:4، 6:4) شاڭ قاپتىر . شيرەك فينالا لاتۆيالىق ەلەنا وستاپەنكودان (6:2، 6:4) باسىم ءتۇستى.

جارتىلاي فينالدا ەلەنانىڭ جولى ۆيك­توريا ازارەنكومەن قيىس­تى. بە­لارۋس­تىڭ 33 جاستاعى بەتكە ۇس­تار­لارى­نىڭ ءبىرى وسىدان 10 جىل بۇرىن الەمدىك رەيتينگتە كوش باستاعان. سول كەزدەرى ول قاتارىنان ەكى رەت Australian Open تۋرنيرىندە الدىنا جان سالماي، 2012، 2013، 2020 جىلدارى اقش-تىڭ اشىق بىرىنشىلىگىنىڭ فينالىندا ونەر كورسەتتى. ەكى رەت ۋيمبلدوننىڭ جانە ءبىر مارتە رولان گارروستىڭ جارتىلاي فينالىندا كۇش سىناس­تى. WTA تۋرنيرلەرىندە 21 رەت توپ جاردى. سونىمەن قاتار ازا­رەنكو جۇپتىق باسەكەدە دە جاقسى وينايدى. ول «ۇلكەن دۋلىعا» ساناتىنداعى ءتورت ءتۋر­نيردىڭ ۇشەۋىنىڭ فينا­لىندا كۇش سىناس­تى. ۆيكتوريانىڭ قور­جى­نىندا وليمپيا ويىندارىنىڭ دا جۇلدەسى بار. 2012 جىلى لوندونداعى جارىستىڭ جەكەلە­ي باسەكەسىندە قولا مەدال يەلەنسە، ميكستە ماكسيم ميرنىيمەن بىرگە التىننان القا تاقتى. دەسەك تە ازارەنكوداي ازۋلى ويىن­شىنىڭ ءوزى جەرلەسىمىزدىڭ قارقىنىنا شى­داي المادى. بۇل باسەكە 7:6، 6:3 ەسەبىمەن اياقتالدى.

فينالدا جولىققان ارينا سوبولەنكو­نىڭ دا باعىندىرعان بەلەستەرى ءبىر توبە. ول – WTA تۋرنيرلەرىنىڭ 11 دۇركىن جە­ڭىم­پازى، US Open مەن ۋيمبلدوننىڭ جار­تىلاي فينالىندا وينادى. جۇپتىق سايىستا مەلبۋرن مەن نيۋ-يوركتەگى دودا­لاردا دارا شىقتى. بىلتىر اقش-تىڭ فورت-ۋەرت قالاسىندا ۇيىم­داستى­رىلعان قورىتىندى تۋرنيردە فينالعا دەيىن القىنباي جەتتى. بۇل جولى باس جۇلدە ءۇشىن تارتىستىڭ العاشقى سەتى رىباكينانىڭ پايداسىنا شەشىلگەنىمەن، قالعان ەكەۋىندە سوبولەنكونىڭ مىسى باسىم بولدى. اتالعان ماتچ 2 ساعات 29 مينۋتقا سوزىلدى. وسىلايشا، 24 جاستاعى مينسكىنىڭ تۋماسى «ۇلكەن دۋىلعا» ساناتىنداعى تۋرنيردە العاشقى جەڭىسىنە قول جەتكىزدى.

شەشۋشى تۇستا ۇتىلسا دا، ەلەنا رى­باكيناعا دا ەش وكپە ايتا المايمىز. ونىڭ ونەرى كوپشىلىكتىڭ كوڭىلىنەن شىق­قانى انىق. ەلىمىزدىڭ ءبىرىنشى راكەتكاسى اۋستراليانىڭ اشىق بىرىنشىلىگىنە ناعىز بابىندا كەلگەن ەكەن. مايتالمان ماماندار مەن ساقا ساراپشىلار ونى بىردەن بايقادى. ەڭ ءبىرىنشى كەزەكتە، ولار قازاقستان تەننيسشىسىنىڭ فۋنكتسيونالدىق دايارلىعىنىڭ وتە جوعارى دەڭگەيدە ەكەنىن اتاپ ءوتتى. وعان ەش كۇمان جوق. ءبىر عانا مىسال، فينالعا دەيىنگى التى كەزدەسۋدىڭ بەسەۋىندە جەڭىسكە جەتۋ ءۇشىن ەلەناعا نەبارى ەكى سەت جەتكىلىكتى بولدى. ياعني مەل­­­بۋرندە وتانداسىمىز بەس بىردەي قارسى­­لاسىن 2:0 ەسەبىمەن قاپى قالدىردى. تەك كوللينزگە عانا ءبىر سەتتە ەسە جىبەردى. سونداي-اق كوچچيارەتتوعا قارسى ويىندا جەر­لەسىمىزدىڭ باعىتتاعان دوبى ساعاتىنا 195 شاقىرىمدىق جىلدامدىقپەن جۇيت­كىدى. بۇل – Australian Open ءتۋرنيرىنىڭ رەكوردى! جانە دە وسى تۋرنيردەگى تابىسىنان كەيىن رىباكينا الەمدەگى توپ-10 تەننيسشىنىڭ قاتارىنا قوسىلدى. بۇعان دەيىن قازاقستاننىڭ بىردە-ءبىر وكىلى وسىنداي بيىكتەن كورىنگەن جوق ەدى.

بيىل مەلبۋرندەگى تۋرنيردە بىرنەشە توسىن ناتيجەلەردىڭ تىركەلگەنىن دە ايتا كەتكەن ابزال. ماسەلەن، وسى جارىستىڭ بىل­­تىرعى جەڭىمپازى، «ۇلكەن دۋلىعا» ساناتىنداعى تۋرنيرلەردى 22 رەت ۇتقان رەكوردشى رافاەل نادال ەكىنشى كەزەڭدە اقش-تىڭ 11-ءشى جانە الەمنىڭ 65-ءشى راكەتكاسى ماككەنزي ماكدونالدتان جەڭى­لەدى دەپ ەشكىم ويلاعان جوق ەدى. بىراق داڭ­قى جەر جارعان جامپوزدىڭ 27 جاستاعى ورتاڭ­قول ويىنشىعا ءالى جەتپەدى. بۇل – وسى جارىستىڭ باستى سەنساتسياسى! ماكدونالد تا ۇزاق­قا شاپپادى. كەلەسى اينالىمدا ول جاپونيالىق يوسيحيتو نيسيوكاعا جول بەر­دى. بىلتىر عانا الەم­دىك رەيتينگتە كوش باستاپ، قازىرگى كەزدە سەگىزىنشى ساتىعا جاي­عاسقان رەسەيلىك دانيل مەدۆەدەۆ ءۇشىنشى كەزدەسۋىندە امەريكالىق سەباستيان كورداعا ەسە جىبەردى. الەمنىڭ ءۇشىنشى راكەتكاسى كاسپەر رۋدتىڭ دا اسىعى الشىسىنان تۇسپەدى. نورۆەگيانىڭ ماقتانىشى ەكىنشى كەزەڭدە اقش-تىڭ تاعى ءبىر وكىلى دجەنسون برۋكسبيدەن ايلاسىن اسىرا المادى.

ايەلدەر سايىسىندا مىسىرلىق ونس جابەر مەن گرەكيالىق ماريا ساككاري سىندى وتە مىقتى تەننيسشىلەردىڭ ەكىنشى جانە ءۇشىنشى اينالىمداردان اسا الماۋى دا كوپشىلىكتىڭ تاڭدانىسىن تۋدىردى. ولاردىڭ ەسىمدەرى كوپشىلىككە بەيمالىم ويىنشىلاردان ۇتىلۋى دا توسىن ناتيجە رەتىندە تىركەلدى. وسىلاي تىزبەكتەي بەرسەك، Australian Open تۋرنيرىندە سەنساتسيوننىەڭ كوپ بولعانىن بايقايمىز.

ال ەلەنا رىباكينانىڭ جەڭىستى جولى جالعاسادى دەپ ۇمىتتەنەمىز.