كەشەگى كۇننىڭ كەشىنە دەيىن برازيليادا ماۋسىمنىڭ 12-ءسى كۇنى باستالعان الەم چەمپيوناتىندا 11 ويىن وينالىپ قويدى. ءبىر قىزىعى, تولاسسىز تارتىسپەن ورنەكتەلگەن وسى كەزدەسۋلەردىڭ بىردە-بىرىندە تەڭ ناتيجە تىركەلگەن جوق. مۇنىڭ ءوزى بۇل جولعى جاھاندىق جارىستىڭ ەش ىمىراسىز ءوتىپ جاتقانىن, الاڭ تورىندە ويقاستاعان ويىنشىلاردىڭ ەشبىرىنىڭ مامىلەگە كەلۋگە ىقىلاستى ەمەس ەكەندىكتەرىن كورسەتىپ وتىر. ەندى ءبىز ماۋسىمنىڭ 14-16-سى كۇندەرى وينالعان ويىندارعا قىسقاشا شولۋ جاساپ وتەيىك.
ازىرگە الەم دوپ دوداسىنىڭ بارلىق ماتچتارى قىزىقتى دا ەستە قالاتىنداي بولىپ ءوتىپ جاتىر. بۇدان ءبىز مۇنىڭ الدىنداعى حاباردا وينالاتىنىن ايتىپ وتكەن چيلي مەن اۆستراليا اراسىنداعى كەزدەسۋ دە شەت قالعان جوق. بۇعان قوسا, وسىنىڭ الدىنداعى ماتچتاردىڭ بارىندە كورىنىس كورسەتكەن تورەشىلەردىڭ جۇگەنسىزدىگى مۇندا بايقالا قويمادى. سوندىقتان كوت-د`يۆۋار ەلىنىڭ نۋماندەز دۋە باستاعان قازىلارىنىڭ وسى ونەگەلى ىستەرى كەيىنگىلەرگە جۇعىستى بولاتىن شىعار دەگەن ۇمىتتەمىز. ال ادىلدىك سالتانات قۇرعان كەزدەسۋ 3:1 دەگەن ناتيجە اكەلدى. البەتتە, وندا كۇشى دە, تاجىريبەسى دە باسىم چيليلىكتەر جەڭىسكە جەتتى. ايتكەنمەن, «لا روحا» ارال-كونتينەنت جاساعىن ەشبىر قيىندىقسىز ۇتىپ شىقتى دەپ تاعى ايتا الماساق كەرەك.
كەزدەسۋدىڭ باسىندا حورحە ءسامپاوليدىڭ شاكىرتتەرى قارسىلاستارىن تاپتاپ وتە شىعاتىنداي بولىپ كورىنگەن. ولار وسى باسىمدىلىقتارىن ەكى مينۋتتىڭ ىشىندە ەكى گولعا اينالدىرىپ, بىردەن العا كەتكەن. گولداردى 12-مينۋتتا الەكسيس سانچەس جانە 14-مينۋتتا حورحە ۆالديۆيا سالدى. راس, اۆستراليالىقتار ءبىرىنشى تايمدا-اق مۇنىڭ ءبىر دوبىنىڭ قارىمتاسىن قايتارىپ ۇلگەرگەن (تيم كەحيلل, 35-مينۋت). بىراق ولاردىڭ قارقىنى سونىمەن ءبىتتى. ال ەكىنشى تايمدا وسى ەسەپ ويىن سوڭىنا دەيىن وزگەرمەگەن كۇيى تۇردى. مۇنىڭ الەتىندە اۆستراليا فۋتبولشىلارى شابۋىلدى ۇدەتتى. ەگەر ولاردىڭ تيم كەحيلل مەن مارك برەشيانو سەكىلدى فورۆاردتارىنىڭ سوڭعى سوققىلارى دۇرىس شىققاندا, ويىننىڭ قالاي اياقتالارىن كىم ءبىلسىن! دەگەنمەن, چيليلىكتەر وسى ەسەپتى ۇستاپ قالدى. بۇعان قوسا, قوسىمشا ەكىنشى مينۋتتا ولار تاعى ءبىر گول سوعىپ (جان بوسەجۋر) جەڭىستىڭ جۇگىن جەڭىلدەتە ءتۇستى.
مۇنىڭ سوڭىن الا دۋمانى قىزعان كولۋمبيا – گرەكيا اراسىنداعى ويىندا بۇلاردىڭ الدىڭعىلارى ايتارلىقتاي الىمدىلىق تانىتتى. ولار چەمپيوناتتىڭ فينالدىق بولىگىنە ىرىكتەۋ جارىسىندا ءوز توبىندا ارگەنتينادان كەيىنگى ەكىنشى ورىن العاندارىنىڭ بەكەر ەمەس ەكەنىن كورسەتتى.
كولۋمبيالىقتار بۇل ويىندا ەسەپتى 6-مينۋتتا اشتى. ونى پابلو ارمەرو دەگەن قورعاۋشى ءتۇسىردى. كەلەسى تايمدا تەوفيلو گۋتەررەس (58) ەسەپتى 2:0-گە جەتكىزدى. ال ويىنعا قوسىلعان ءۇشىنشى مينۋتتا حامەس رودريگەس سوڭعى نۇكتەنى قويدى.
سودان كەيىن ۋرۋگۆاي مەن كوستا-ريكا قۇرامالارى كەزدەسۋىندە چەمپيوناتتاعى ەكىنشى سەنساتسيا ومىرگە كەلدى. وندا كوستاريكالىقتار 3:1 ەسەبىمەن جەڭىسكە جەتتى. بىراق ويىننىڭ باس جاعى مۇنداي ناتيجە اكەلەتىنگە ۇقسامادى. الاڭدا بارىنشا باياۋ دا تەپە-تەڭ كۇرەس ءجۇرىپ جاتتى. ۋرۋگۆايلىقتار ايرىقشا باسىمدىلىق تا تانىتا قويعان جوق. ال كوستا-ريكا مەيلىنشە قاتقىل وينادى. ونىڭ قورعاۋشىلارى قارسى جاقتىڭ شابۋىلشىلارىن ءوز شەپتەرىنە قاراي كوپ اسا اسىرمادى. سوندىقتان قارسى جاق ولاردى شەبەرلىكتەرى دەڭگەيىمەن الۋعا ۇمتىلدى. وسى شەبەرلىك اقىرىندا ءبىرىنشى گولعا دا اپاردى. ۋرۋگۆاي شابۋىلشىلارى كەزەكتى بۇرىشتاما سوعۋ قۇقىعىنا قول جەتكىزدى. ال دوپ ايىپ الاڭىنا تاستالعاندا, قارسىلاستار قورعاۋشىلارى ءتارتىپ بۇزدى. مىنە, وسىعان وراي بەلگىلەنگەن پەنالتيدى ەديسون كاۆاني 24-مينۋتتا ءدال ءتۇسىردى. وسىمەن ءبىرىنشى تايمنىڭ ناتيجەسى دە وزگەرمەدى.
كوستا-ريكا جىگىتتەرىنىڭ ءۇيىرىپ سوققان داۋىلدارى ەكىنشى تايمدا تۇردى. ونىڭ باسىن شابۋىلشى جوەل كەمپبەلل باستاپ بەردى. كەيىن كەزدەسۋ سوڭىندا ۇزدىك ويىنشى اتاعىنا يە بولاتىن وسى فورۆارد بۇدان كەيىن دە جاسىنداي جارقىلدادى. سوڭعى گول دا ونىڭ تىكەلەي ارالاسۋىمەن سوعىلدى. دەگەنمەن, وسى ارادا تاعى ءبىر گول سالىنعان ەدى. الدىمەن 54-مينۋتتا ەسەپ تەڭەستىرىلسە, ارادا 3 مينۋت وتكەندە, وسكار دۋارتە كۇتپەگەن جەردەن كوستا-ريكانى العا شىعاردى. ول ايىپ الاڭىندا قۇلاپ بارا جاتىپ, دوپتى قاقپاعا قاراي باعىتتاپ ۇلگەردى. ال ءۇشىنشى گولدى ماركوس ۋرەنيا 84-مينۋتتا كەمپبەللدىڭ جەكە-دارا العا شىعارۋى ارقىلى ءتۇسىردى. بۇدان كەيىن ۋرۋگۆاي فۋتبولشىلارى قارسىلاسۋلارىن قويدى. ىزادان جارىلارداي بولعان ولار ءتارتىپ بۇزۋشىلىقتى دا جيىلەتتى. سونىڭ ءبىرى ماكسي پەرەيرانىڭ جوەلدىڭ اياعىن قىرقا تەبۋىنە اپارىپ سوقتىردى. وسى قاساقانا جاساعان ارەكەتى ءۇشىن ۋرۋگۆايلىق فۋتبولشى الاڭنان قۋىلدى.
ماۋسىمنىڭ 15-ىندەگى ويىنداردى انگليا جانە يتاليا قۇرامالارى باستادى. تارتىستى وتكەن ويىن 2:1 ەسەبىمەن يتاليانداردىڭ پايداسىنا شەشىلدى. كەزدەسۋدى اعىلشىندار ەكپىندى باستادى. الايدا, ۋاقىت ۇزاعان سايىن يتاليانداردىڭ ۇستەمدىگى ارتا ءتۇسىپ, اقىرىندا ولار ويىن تىزگىنىن تۇگەل قولدارىنا الىپ قويدى. سول ەكپىندەرىمەن اپەننين تۇبەگىنىڭ جىگىتتەرى بۇرىشتامادان گول سوعىپ كەتتى. ونى 35-مينۋتتا كلاۋديو ماركيزيو سالدى. ايتكەنمەن, يتاليانىڭ بۇل باسىمدىلىعى ەكى مينۋتتان ارتىققا بارعان جوق. اعىلشىندار ۋەين رۋني مەن دانيەل ءستارريدجدىڭ قاتىسۋىمەن جاسالعان كومبيناتسيانىڭ اقىرىندا ەسەپتى تەڭەستىرىپ تە ۇلگەردى. ال تايمنىڭ سوڭىندا ماريو بالوتەللي مەن انتونيو كاندرەۆا ەكى مۇمكىندىكتى بوسقا جىبەرىپ الدى.
بۇل تاندەم وسى قاتەلىكتەرىن ەكىنشى تايمنىڭ باسىندا بىرلەسىپ قايتاردى. اتاپ ايتقاندا, كاندرەۆانىڭ جەتكىزگەن پاسىن بالوتەللي گولعا اينالدىرا ءبىلدى.
رەسيفي قالاسىنداعى ستاديوندا شايقاسقان كوت-د`يۆۋار جانە جاپونيا قۇرامالارى اراسىنداعى ويىن شيەلەنىسى مولدىعىمەن ەستە قالدى. دەگەنمەن, بۇل ماتچتى ءبىر-بىرىنە ۇقسامايتىن ەكى بولىككە ءبولىپ قاراستىرۋعا بولادى. ونىڭ العاشقى ءبىر ساعاتتىق كولەمىندە «سامۋرايلار» قارسىلاستارىنان الدەقايدا الەۋەتتى كورىندى. ولار 16-مينۋتتا كەيسۋكە حوندانىڭ كومەگىمەن العاشقى بولىپ ەسەپتى دە اشتى. وسىدان كەيىن دە البەرتو دزاككەرونيدىڭ شاكىرتتەرى ويىن تىزگىنىن ۋىستارىنان شىعارا قويمادى. «قارا قۇرلىقتىڭ» وكىلدەرى وسى تۇستا دوپقا كوبىرەك ەگەلىك ەتكەندەرىمەن, قاقپاعا قاراي سوققى جاساۋدا ازيالىقتاردان كوپ قالىپ قويدى. الايدا, سوڭعى جارتى ساعاتتىڭ ىشىندە ءبارى تۇبەگەيلى وزگەرىپ كەتتى. ول سابري ءليامۋشيدىڭ 62-مينۋتتا شايقاسقا ديدە دروگبانى قوسىپ جىبەرۋىنەن باستالدى. ونىڭ كەلۋىمەن «پىلدەر» كۇرت وزگەرىپ سالا بەردى. سونىڭ ارقاسىندا ولار بار-جوعى ەكى مينۋتتىڭ ىشىندە ەسەپتى تەڭەستىرىپ قانا قويماي, العا دا شىعۋعا مۇمكىندىك الدى. الدىمەن 64-مينۋتتا ۆيلفريد بوني ءبىرىنشى جاۋاپ دوپتى سوقسا, ارتىنشا جەرۆينو ءپىل سۇيەگى جاعالاۋى ەلىنىڭ قۇراماسىن جەڭىسكە باستادى.
كەلەسى كەزەكتە شۆەيتساريا ەكۆادوردى 2:1 ەتىپ تىزە بۇكتىردى. بۇلاردىڭ سوڭىنان فرانتسيا گوندۋراستى 3:0 ەتىپ ويسىراتا ۇتتى. وندا كاريم بەنزەما ءبىرىن پەنالتيدەن, ءبىرىن ويىننان سوعىپ, دۋبل جاسادى. ال 16 ماۋسىم كۇنگى ارگەنتينا – بوسنيا كەزدەسۋىندە بۇلاردىڭ الدىڭعىلارى 2:1 ەسەبىمەن باسىم ءتۇستى.
بەت قاتتالىپ جاتقاندا گەرمانيا كومانداسى پورتۋگاليا قۇراماسىن 4:0 ەسەبىمەن ۇتىپ كەتكەنى بەلگىلى بولدى. وسى ماتچتا چەمپيوناتتاعى ەڭ العاشقى حەت-تريك ومىرگە كەلدى. ونى 11-مينۋتتا پەنالتيدەن, 45 جانە 78-مينۋتتاردا ويىننان گول سوققان توماس ميۋللەر جاسادى. ءتورتىنشى دوپتى 32-ءشى مينۋتتا ماتس حۋممەلس ءتۇسىردى.
P.S. وقىرمان قاۋىم «ەگەمەن قازاقستاننىڭ» برازيلياداعى الەم بىرىنشىلىگىنەن بەرىپ جاتقان ماتەريالدارىنىڭ اراسىنان ءبىزدىڭ ەلىمىزدە ۋاقىت تاڭعى ساعات 4-كە جاقىنداعاندا اياقتالاتىن ويىنداردان دا رەپورتاجدار جاريالانعانىنا نازار اۋدارعانى انىق. ولاردا سول ماتچتاردىڭ گول سوعۋ ساتتەرىن كورسەتەتىن فوتولار دا قوسا بەرىلىپ ءجۇردى. بۇل ءۇشىن تاڭعى ساعات 5-كە دەيىن گازەتكە ماتەريال جازۋ, گازەتتى قايتا بەتتەۋ قاجەت ەتىلەتىنىن ءبىزدىڭ ارىپتەستەرىمىز جاقسى بىلەدى. الايدا, گازەت باسىپ شىعارۋ دا وندىرىستىك پروتسەسس ەكەنىن, باسپاحانالارعا جىبەرىلەتىن بەتتەر وبلىس ورتالىقتارىنا جولدانىپ, باسىلىپ شىعىپ, «قازپوشتا» مەكەمەلەرىنە ۋاقتىلى جەتكىزىلۋى كەرەكتىگىن, ايتپەسە گازەت جازىلۋشىلار قولىنا كەشىگىپ تۇسەتىنىن ەسكەرمەي تاعى تۇرا المايمىز. سوندىقتان, فۋتبول سۇيەر قاۋىمنىڭ برازيلياداعى دۇنيەنىڭ دوپ دوداسىنان جازىلاتىن شۇعىل رەپورتاجداردى ەندى گازەت سايتىنان (egemen.kz) وقىپ وتىرۋىنا تۋرا كەلەتىنىن ايتامىز.
سايتتى اشىڭىزدار, رەپورتاجدارعا ءۇن قوسىڭىزدار, ويىنداردىڭ ناتيجەسى تۋرالى بولجامدارىڭىزدى ايتىڭىزدار, چەمپيونات تۋرالى پىكىر بىلدىرىڭىزدەر!
سەرىك ءپىرنازار,
«ەگەمەن قازاقستان».
