وزبەكستان ازاماتىنان پسيحوتروپتىق زاتتار تاركىلەندى

مالىمەت بويىنشا، تۇركىستان وبلىسىنىڭ سارىاعاش اۋداندىق پوليتسيا ءبولىمىنىڭ 102 ارناسىنا قر ۇقك شەكارا قىزمەتىنەن ەسىرتكى تاسىمالداۋ دەرەگى بويىنشا حابارلاما كەلىپ تۇسكەن.

«جىبەك جولى» وتكىزۋ پۋنكتىندە قىزمەتتىك ءيتتى پايدالانعان شەكارالىق نارياد وزبەكستان ازاماتىن ۇستاعان. تەكسەرۋ كەزىندە ازامات كيىمىنىڭ قالتاسىندا شامامەن 2 گرامم بولاتىن ەسىرتكى زاتى بار ەكەنىن مويىندايدى.

ال ءتىنتۋ جۇرگىزگەن پوليتسەيلەر كۇدىكتىنىڭ سىرت كيىمىنىڭ قالتاسىنان ىشىندە ەسىرتكىگە ۇقساس زاتى بار ەكى پاكەتتى تاپتى. زەرتتەۋ قورىتىندىسىنا سايكەس پاكەتتىڭ بىرىندە سالماعى 0،2 گرامنان اساتىن پسيحوتروپتىق زاتى بار ەكەندىگى انىقتالدى. ال كەلەسىسىندە سالماعى شامامەن 0،04 گرامم بولاتىن گەروين ەكەنى راستالدى.

قازىرگى ۋاقىتتا وسى جايت بويىنشا قر قك-ءنىڭ 286-بابىنىڭ 2-بولىگى «اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى» بويىنشا سوتقا دەيىنگى تەرگەۋ امالدارى جۇرگىزىلىپ جاتىر. كۇدىكتى قاماۋعا الىندى.

وقيعانىڭ تولىق ءمان-جايى انىقتالىپ جاتىر.