ءاليحان سمايىلوۆ شىمكەنتتى جىلۋمەن جابدىقتاۋداعى كەمشىلىكتەردى اتادى

قالا اكىمى مۇرات ايتەنوۆ، يندۋستريا جانە ينفراقۇرىلىمدىق دامۋ ءمينيسترى مارات قاراباەۆ، وقۋ-اعارتۋ ءبىرىنشى ۆيتسە-ءمينيسترى شولپان كارينوۆا، سونداي-اق ۇلتتىق ەكونوميكا ۆيتسە-ءمينيسترى باۋىرجان وماربەكوۆ، ەنەرگەتيكا ۆيتسە-ءمينيسترى اسەت ماعاۋوۆ جانە دەنساۋلىق ساقتاۋ ۆيتسە-ءمينيسترى جاندوس بۇركىتباەۆ ءتۇرلى سالالارداعى كورسەتكىشتەر مەن قابىلدانىپ جاتقان شارالار تۋرالى باياندادى.

بايانداماشىلاردى تىڭداعان پرەمەر-مينيستر ۇكىمەت مەملەكەت باسشىسىنىڭ سايلاۋالدى باعدارلاماسىندا ۇسىنىلعان كەڭ اۋقىمدى رەفورمالاردى ىسكە اسىرۋعا كىرىسكەنىن اتاپ ءوتتى.

«وندا حالىقتىڭ تۇرمىس ساپاسى مەن ءال-اۋقاتىن ارتتىرۋعا ەرەكشە ماڭىز بەرىلىپ وتىر. وسى مىندەتتەرگە قول جەتكىزۋ ءۇشىن ەگجەي-تەگجەيلى ءىس-قيمىل جوسپارى ازىرلەنىپ، بەكىتىلدى»، دەدى ءاليحان سمايىلوۆ.

ونىڭ ايتۋىنشا، قالا اكىمدىگى ينجەنەرلىك ينفراقۇرىلىمدى، اتاپ ايتقاندا جىلۋ، ەلەكتر، گاز، سۋمەن جابدىقتاۋ جەلىلەرىن جانە ت. ب. جاڭعىرتۋعا باسىمدىق بەرۋى كەرەك.

«شىمكەنت ەلدىڭ وڭتۇستىگىندە ورنالاسقاننان كەيىن، مۇندا قاقاعان اياز سيرەك بولادى. سونىڭ وزىندە، قالا تۇرعىندارىنىڭ شاعىمدارى ازايماي وتىر. مىسالى، «جاڭا تالاپ»، «تۇران» شاعىن اۋداندارىنداعى كوپقاباتتى ۇيلەر جىلۋسىز قالعان. بۇعان جول بەرۋگە بولمايدى»، دەدى پرەمەر-مينيستر.

ۇكىمەت باسشىسى قالاداعى قۇرىلىس قارقىنىنا وڭ باعا بەردى. اتاپ ايتقاندا، سوڭعى ەكى جىلدا 2 ملن شارشى مەتردەن استام تۇرعىن ءۇي پايدالانۋعا بەرىلدى. سونىمەن قاتار ۇكىمەت باسشىسى وسى ورايدا مەگاپوليستە كولىك جەلىسىنە جۇكتەمە ارتىپ كەلە جاتقانىن، بۇل جۇرگىزىلىپ جاتقان جوندەۋ جۇمىستارىنىڭ ساپاسىن، سونداي-اق الەۋمەتتىك ينفراقۇرىلىمدى ەداۋىر جاقسارتۋدى تالاپ ەتەتىنىن، وسىعان بايلانىستى جاڭا مەكتەپتەر، اۋرۋحانالار مەن باسقا دا الەۋمەتتىك نىسانداردى ۋاقىتىلى اشۋ قاجەتتىگىن ايتتى.

«الداعى ءۇش جىلدا قالادا 68 مىڭ وقۋشىعا ارنالعان 54 مەكتەپ سالۋ جوسپارلانىپ وتىر. بۇل شىمكەنتتەگى ءۇش اۋىسىمدى وقىتۋ ماسەلەسىن شەشۋگە سەپتىگىن تيگىزەدى»، دەدى ءاليحان سمايىلوۆ. 

پرەمەر-مينيستر ەكونوميكالىق بلوكتىڭ ماسەلەلەرىنە توقتالا كەلە، اكىمدىككە ەكونوميكانى ءارتاراپتاندىرۋ جانە يمپورتتى الماستىرۋ بويىنشا جوسپارلى جۇمىستى جالعاستىرۋ قاجەتتىگىن اتاپ ءوتتى. بۇل جاعدايدا نەگىزىنەن وڭدەۋ سەكتورىنا نازار اۋدارۋ كەرەك. وسىعان بايلانىستى ۇكىمەت باسشىسى تيىمدىلىكتى ارتتىرۋدىڭ جانە قولدانىستاعى يندۋستريالىق ايماقتاردى كەڭەيتۋدىڭ، سونداي-اق جاڭا ءوندىرىس الاڭدارىن اشۋدىڭ ماڭىزدىلىعىن اتاپ ءوتتى.

«جالپى قالانىڭ 2022-2026 جىلدارعا ارنالعان ينۆەستيتسيالىق پورتفەلى قۇنى 2 ترلن تەڭگە بولاتىن 283 جوبانى قامتيدى. قالا اكىمدىگى ىسكە اسىرىلىپ جاتقان جوبالاردىڭ مەرزىمىندە ىسكە قوسىلۋىن، سونداي-اق جوسپارلانعان جوبالاردى پىسىقتاۋدى قامتاماسىز ەتۋى قاجەت»، دەدى ۇكىمەت باسشىسى. 

سونىمەن قاتار ءاليحان سمايىلوۆ الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ ءوسۋىن تەجەۋ بويىنشا جۇيەلى جۇمىستى جالعاستىرۋ قاجەتتىگىن ايتتى. بۇل – سونىڭ ىشىندە نارىقتىڭ قولجەتىمدى تەتىكتەرىن قولدانۋعا، دەلدالدىق تىزبەكتەردى انىقتاۋ جونىندەگى وڭىرلىك كوميسسيانىڭ جۇمىسىنا جانە اگرارلىق سەكتوردى دامىتۋعا قاتىستى دا ماسەلە.

وتىرىستى قورىتىندىلاي كەلە، پرەمەر-مينيستر «سايرام» تۇرعىن الابىن سۋمەن قامتاماسىز ەتۋ، «تۇران» شاعىن اۋدانىندا ماگيسترالدىق كارىز كوللەكتورى مەن وقۋشىلار سارايىن سالۋ، جالپى شىمكەنتتە جول ينفراقۇرىلىمىن سالۋدى قارجىلاندىرۋ كولەمىن ۇلعايتۋ ماسەلەلەرىن پىسىقتاۋدى تاپسىردى.

سونىمەن قاتار ءاليحان سمايىلوۆ جىلۋ جەلىلەرىن، سورعى ستانتسيالارىن قايتا جاڭارتۋ، قازاندىقتاردى جاڭعىرتۋ جانە «قايناربۇلاق» تۇرعىن الابىن گازبەن جابدىقتاۋ قاجەتتىگىن اتاپ ءوتتى.