فۋتبول. الەم چەمپيوناتى: ۋرۋگۆاي-كوستا-ريكا 1:3

استانا. 15 ماۋسىم. چەمپيوناتتىڭ فورتالەزا قالاسىندا D توبىنداعى ۋرۋگۆاي مەن كوستا-ريكا قۇرامالارى اراسىندا وتكەن ويىنىندا ەكىنشى سەنساتسيا تىركەلدى. وندا كوستاريكالىقتار 3:1 ەسەبىمەن جەڭىسكە جەتتى. بۇل تۋرالى egemen.kz حابارلادى. ماماندار وسى فينالدىق كەزەڭنىڭ جەرەبەسى تارتىلعان بويدا وسى D توبىن ولىسپەي بەرىسپەيتىندەردىڭ شوعىرلانعان جەرى رەتىندە اتاپ ەدى. مۇندا ولار توپتاعى انگليا, يتاليا جانە ۋرۋگۆاي كوماندالارىن ەسەپكە العان بولاتىن. ال كوستا-ريكا جاساعى ءتىپتى دە نازاردا بولعان جوق. سولاي بولا تۇرا, ناعىز توپالاڭدى كەشە وسى قۇراما كورسەتتى. ويىننىڭ باس جاعى مۇنداي ناتيجە اكەلەتىنگە ۇقسامادى. الاڭدا بارىنشا باياۋ دا تەپە-تەڭ كۇرەس ءجۇرىپ جاتتى. ۋرۋگۆايلىقتار ايرىقشا باسىمدىلىق تا تانىتا قويعان جوق. ال كوستا-ريكا مەيلىنشە قاتقىل وينادى. ونىڭ قورعاۋشىلارى قارسى جاقتىڭ شابۋىلشىلارىن ءوز شەپتەرىنە قاراي كوپ اسا اسىرمادى. سوندىقتان ۋرگۆايلىقتار شەبەرلىكتەرى دەڭگەيىمەن الۋعا ۇمتىلدى. وسى شەبەرلىك اقىرىندا ءبىرىنشى گولعا دا اپاردى. ۋرۋگۆاي شابۋىلشىلارى كەزەكتى بۇرىشتاما سوعۋ قۇقىعىنا قول جەتكىزدى. ال دوپ ايىپ الاڭىنا جەتكىزىلگەندە, قارسىلاستار قورعاۋشىلارى ءتارتىپ بۇزدى. مىنە, وسىعان وراي بەلگىلەنگەن پەنالتيدى ەديسون كاۆاني 24-مينۋتتا ءدال ءتۇسىردى. وسىمەن ءبىرىنشى تايمنىڭ ناتيجەسى دە وزگەرمەدى. كوستا-ريكا جىگىتتەرىنىڭ ءۇيىرىپ سوققان داۋىلدارى ەكىنشى تايمدا تۇردى. ونىڭ باسىن شابۋىلشى جوەل كەمپبەلل باستاپ بەردى. كەيىن كەزدەسۋ سوڭىندا ۇزدىك ويىنشى اتاعىنا يە بولاتىن وسى فورۆارد بۇدان كەيىن دە جاسىنداي جارقىلدادى. سوڭعى گول دا ونىڭ تىكەلەي ارالاسۋىمەن سوعىلدى. دەگەنمەن, وسى ارادا تاعى ءبىر گول سالىنعان ەدى. الدىمەن 54-مينۋتتا ەسەپ تەڭەستىرىلسە, ارادا 3 مينۋت وتكەندە, وسكار دۋارتە كۇتپەگەن جەردەن كوستا-ريكانى العا شىعاردى. ول ايىپ الاڭىندا قۇلاپ بارا جاتىپ, دوپتى قاقپاعا قاراي باعىتتاپ ۇلگەردى. ال ءۇشىنشى گولدى ماركوس ۋرەنيا 84-مينۋتتا كەمپبەللدىڭ جەكە-دارا العا شىعارۋى ارقىلى ءتۇسىردى. بۇدان كەيىن ۋرۋگۆاي فۋتبولشىلارى قارسىلاسۋلارىن قويدى. ىزادان جارىلارداي بولعان ولار ءتارتىپ بۇزۋشىلىقتى دا جيىلەتتى. سونىڭ ءبىرى ماكسي پەرەيرانىڭ جوەلدىڭ اياعىن قىرقا تەبۋىنە اپارىپ سوقتىردى. وسى قاساقانا جاساعان ارەكەتى ءۇشىن ۋرۋگۆايلىق فۋتبولشى الاڭنان قۋىلدى. دامير قوجامقۇل. دەرەككوز: چەمپيونات.رۋ. فوتو: چەمپيونات.رۋ.