مەملەكەت باسشىسى استانا قالاسىنىڭ اكىمىن قابىلدادى

مەملەكەت باسشىسىنىڭ تاپسىرماسى بويىنشا ەلوردا اكىمدىگى الەۋمەتتىك نىساندار سالۋعا، ەلدى مەكەندەردى دامىتۋعا، ۇزاققا سوزىلعان قۇرىلىستاردى اياقتاۋعا، جەكە ينۆەستيتسيالار تارتۋعا، شاعىن جانە ورتا بيزنەستى قولداۋعا باعىتتالعان جۇيەلى جۇمىس جۇرگىزىپ جاتىر.

جەڭىس قاسىمبەك «جايلى مەكتەپ» جوباسىنىڭ ىسكە اسىرىلۋ بارىسى تۋرالى ەسەپ بەردى. ۇلتتىق جوبا اياسىندا جاڭا فورماتتاعى 100 مىڭ ورىندىق 25 مەكتەپتىڭ جوباسى جاسالىپ جاتىر. مەكتەپتەردىڭ قۇرىلىسى بيىل باستالادى.

سونىمەن قاتار مەملەكەت باسشىسىنا اۋىزسۋ ستانتسياسى (سسس-3)، جىلۋ ەلەكتر ورتالىقتارى، گاز جىلۋ ستانتسيالارى قۇرىلىستارىنىڭ بارىسى تۋرالى مالىمەت بەرىلدى. مىسالى، سسس-3 ستانتسياسىنىڭ قۋاتى تاۋلىگىنە 100 مىڭ تەكشە مەتردەن استام سۋدى تازالاپ، جەتكىزۋگە جەتەدى. «تۇران» گاز جىلۋ ستانتسياسى 8 ميلليون شارشى مەتر تۇرعىن ءۇيدى جىلىتۋعا قاۋقارلى. تۇرعىندارىنىڭ تۇرمىس-تىرشىلىگىن قامتاماسىز ەتەتىن نىسانداردىڭ قۇرىلىسىن 2023 جىلى اياقتاۋ جوسپارلانىپ وتىر.

كەزدەسۋ سوڭىندا قاسىم-جومارت توقاەۆ استانانىڭ الەۋمەتتىك جانە ينجەنەرلىك ينفراقۇرىلىمىن ودان ءارى دامىتۋ، قالانى اباتتاندىرۋ جانە كوگالداندىرۋ جونىندە بىرقاتار تاپسىرما بەردى.