ەلىمىزدە تۋريزم سالاسىنا 6 ملرد. دوللارعا دەيىن ينۆەستيتسيا قۇيىلۋى مۇمكىن

استانا. 16 ماۋسىم. ەلىمىزدە تۋريزم سالاسىن دامىتۋعا 2020 جىلعا قاراي 6 ملرد. دوللارعا دەيىن جەكە ينۆەستيتسيالار تارتۋعا مۇمكىندىك بار. ۇكىمەت باسشىسىنىڭ ورىنباسارى,  يندۋستريا جانە جاڭا تەحنولوگيالار ءمينيسترى اسەت يسەكەشەۆ وسىلاي دەدى. بۇل تۋرالى primeminister.kz. پارلامەنت ماجىلىسىندەگى ۇكىمەت ساعاتىندا اسەت يسەكەشەۆ: «ارينە, ءبىز تۋريزم سالاسىن دامىتۋدىڭ جاعىمدى نۇسقاسىنا ۇمتىلامىز. وسى ستسەناري بويىنشا سالانىڭ جالپى ىشكى ونىمىندەگى ۇلەسى 3 پايىزعا, جەكە ينۆەستيتسيالار 6 ملرد. دوللارعا جەتۋى جانە 300 مىڭعا دەيىن جاڭا جۇمىس ورنى قۇرىلۋى مۇمكىن», – دەدى ءا. يسەكەشەۆ. سونداي-اق, ۇكىمەت باسشىسىنىڭ ورىنباسارى,  يندۋستريا جانە جاڭا تەحنولوگيالار ءمينيسترى تۋريزم سالاسىن 2020 جىلعا دەيىن دامىتۋدىڭ ءۇش ستسەناريى جاسالىپ جاتقانىن ايتتى. بۇدان بولەك, ول ءتۋريزمدى دامىتۋعا بايلانىستى بىرقاتار زاڭنامالىق وزگەرىستەر جوسپارلانعانىن مالىمدەدى. اسەت يسەكەشەۆ: «تاياۋ ارادا زاڭنامالىق اكتىلەرگە وزگەرىستەرمەن پارلامەنتكە كەلەمىز. مۇنداعى ماقسات – شەتەلدىك تۋريستەر ۆيزالىق ءتارتىپتى جەڭىلدەتۋ, ىشكى, الەۋمەتتىك ءتۋريزمدى دامىتۋ», – دەدى. ونىڭ ايتۋىنشا, جاعىمدى ستسەناري بويىنشا 2020 جىلعا قاراي ەلىمىزگە جىل سايىن كەلەتىن تۋريستەر سانىن 8-9 ملن. كورسەتكىشكە جەتكىزۋ كۇتىلۋدە. جولدىباي بازار. دەرەككوز: primeminister.kz. فوتو: Dmk.