ەلىمىزدە 10 مەملەكەتتىڭ ازاماتتارى ءۇشىن ۆيزاسىز رەجىم 15 شىلدەدە ەنگىزىلەدى

استانا, 13 ماۋسىم. ۇكىمەت ەلىمىزگە ينۆەستيتسيا قۇيۋدا سەنىمدى سەرىكتەس بولىپ كەلە جاتقان 10 ەلدىڭ ازاماتتارىنا ۆيزاسىز رەجىمدى ءارى قاراي ۇزارتۋ ماسەلەسىن شەشەدى. بۇل تۋرالى egemen.kz ءتىلشىسى حابارلادى. ەلىمىزدەگى ديپلوماتيالىق كورپۋستىڭ وكىلدەرىمەن كەزدەسكەن سىرتقى ىستەر ءمينيسترىنىڭ ءبىرىنشى ورىنباسارى ءراپىل جوشىباەۆ: «10 مەملەكەتتىڭ ازاماتتارى ءۇشىن ۆيزاسىز رەجىمدى ءبىز بيىلعى جىلدىڭ 15 شىلدەسىنەن باستايمىز. بۇل ءتارتىپ 2014 جىلدىڭ 15 شىلدەسىنەن 2015 جىلدىڭ 15 شىلدەسىنە دەيىن ەنگىزىلەدى. ناقتىلاي ايتقاندا, اقش, نيدەرلاندى, ۇلىبريتانيا, فرانتسيا, گەرمانيا, يتاليا, مالايزيا, بىرىككەن اراب امىرلىكتەرى, وڭتۇستىك كورەيا جانە جاپونيا ازاماتتارى قازاقستاندا ۆيزاسىز 15 كۇنتىزبەلىك كۇنگە دەيىن بولا الادى. ال ەگەر 15 كۇننەن اسسا, وندا شەتەلدىكتەر زاڭدا بەلگىلەنگەن تارتىپپەن ۆيزا راسىمدەي الادى», – دەدى. ر.جولشىباەۆتىڭ ايتۋىنشا, اتالعان شارانىڭ ماقساتى – ەلگە ينۆەستيتسيا تارتۋ جانە تۋريستىك سالانى جەتىلدىرۋ. EXPO-2017 كورمەسى قارساڭىندا مۇنداي شارالار ماڭىزدى. ەستەرىڭىزگە سالا كەتەيىك,  مەملەكەت باسشىسى نۇرسۇلتان نازارباەۆ شەتەلدىك ينۆەستورلار كەڭەسىنىڭ 27-ءشى وتىرىسىندا اتالعان 10 ەلدىڭ ازاماتتارى ءۇشىن بىرجاقتى ۆيزاسىز رەجىمنىڭ ورناتىلاتىنىن مالىمدەگەن بولاتىن. جولدىباي بازار. دەرەككوز: egemen.kz. فوتو: ortcom.kz.