رەجيسسەر قاناعات مۇستافين باستاعان شىعارماشىلىق توپ 4 بولىمنەن تۇراتىن تاريحي تەلەحيكايانىڭ ءتۇسىرىلىم جۇمىستارىن وتكەن جىلدىڭ قىركۇيەك ايىندا باستاعان. وزبەكستاننىڭ حيۋا قالاسىنداعى تاريحي كادرلار قاڭتار ايىندا ءتۇسىرىلدى.
جوبانىڭ تاريحي كەڭەسشىسى – ەتنوگراف بەرىك ءجۇسىپ. رەداكتورى - بولات جەتەكباي. پروديۋسەرى – شولپان باتىرباەۆا. قورقىتتىڭ ءار كەزەڭدەگى رولدەرىن ءدىنيسلام نۇرماعامبەت, ءادىل احمەتوۆ جانە ايدوس بەكتەمىر سومدايدى. سونىمەن قوسا نەگىزگى تاريحي رولدەردى ەركەبۇلان دايىروۆ, زارينا كارمەن, مەدعات ءومىرالى وينايدى. سەريالدا قىرعىزدىڭ اتاقتى ماناسشىسى رىسباي يساقوۆ پەن تانىمال اكتەر اسكات سۋلايمانوۆتىڭ رولدەرى بار.
تەلەحيكايا سيۋجەتىندە قورقىتتىڭ دۇنيەگە كەلۋى, بالالىق شاعى, جەتكىنشەك كەزىنەن ساۋەگەي, ابىز رەتىندە قالىپتاسۋ جولى كورسەتىلەدى. تەلەحيكايا ستسەناريى الەمدىك دەڭگەيدە زەرتتەلگەن «قورقىت اتا» كىتابىنا جانە حالىق اراسىنداعى اڭىزدارعا نەگىزدەلگەن.
«قورقىت اتا» تاريحي بيوگرافيالىق دراماسى - «قازاقستان» تەلەراديوكورپوراتسياسىنىڭ وزگە مەملەكەتپەن بىرلەسە تۇسىرگەن العاشقى تەلەحيكاياسى. سەريالدىڭ ەكرانيزاتسياسى 2023 جىلدىڭ سوڭىنا جوسپارلانعان.
جوبا پروديۋسەرى شولپان باتىرباەۆا بۇعان دەيىن «Qazaqstan» ۇلتتىق تەلەارناسىنداعى جوعارى رەيتينگتى «اۋىل مۇعالىمى», «شىراعىم», «شابدالى18» تەلەحيكايالارىنا جەتەكشىلىك ەتكەن, رەجيسسەر ق.مۇستافين العاشقى وتاندىق 100 ءبولىمدى تەلەحيكايا «قارا شاڭىراق» سەريالىنىڭ رەجيسسەرى رەتىندە تانىمال.
