ۆەدومستۆو القاسىندا پرەمەر-مينيستر ءاليحان سمايىلوۆ قازاقستاندا ينتەرنەت ءالى دە ساپاسىز ەكەنىنە نازار اۋداردى.
«باعدات باتىربەك ۇلى, ەلىمىزدە ينتەرنەت پەن ۇيالى بايلانىس ساپاسىنا شاعىمدانىپ جاتقان ازاماتتاردىڭ سانى ءوسىپ كەلە جاتقانىن ءوزىڭىز دە كورىپ وتىرسىز. ءتىپتى ءىرى قالالار مەن مەگاپوليستەردىڭ وزىندە دە ينتەرنەت ءالسىز ەكەنىن بايقادىق. قازىر كەز كەلگەن جۇمىستى ۇيالى تەلەفوننىڭ كومەگىمەن جاساۋعا بولادى, بىراق كەيدە بايلانىس ۇستاماي, ينتەرنەت ىستەمەي قالادى. بۇل ماسەلەنى شەشۋ كەرەك», دەدى اليحان سمايىلوۆ.
ول مەملەكەت باسشىسىنىڭ تاپسىرماسى بويىنشا بارلىق قالالار مەن اۋدان ورتالىقتارى, سونداي-اق رەسپۋبليكالىق جانە نەگىزگى وبلىستىق اۆتوجولدار ساپالى ۇيالى بايلانىسپەن جانە ينتەرنەتپەن قامتاماسىز ەتىلۋى ءتيىس ەكەنىن ەسكە سالدى.
«ازىرلەنىپ جاتقان «قولجەتىمدى ينتەرنەت» ۇلتتىق جوباسى شەڭبەرىندە ءتيىستى شارالار قابىلدانعانى ءجون. سونىمەن قاتار ءبىرىنشى كەزەكتە رەسپۋبليكالىق ماڭىزى بار قالالار مەن وبلىس ورتالىقتارىندا 5G ۇيالى بايلانىسىن ەنگىزۋ جۇمىستارىن جالعاستىرۋ قاجەت. ءتيىستى جۇمىس 2027 جىلى اياقتالۋى كەرەك», دەپ ەسكەرتتى پرەمەر-مينيستر.
