ء«بىز بۇعان دەيىن وتاندىق مەديا يندۋستريانى دامىتۋ, ىسكەرلىك قاتىناستاردى كوبەيتۋ ماقساتىندا Astana Media Week حالىقارالىق مەديا اپتالىعىن ۇيىمداستىردىق. سونداي-اق ايماقتاعى وزەكتى ماسەلەلەردى ورتاعا سالىپ, ورتاق اقپاراتتىق كەڭىستىك قۇرۋ ماسەلەلەسى كوتەرىلگەن «ورتالىق ازيا» مەديافورۋمىن دا وتكىزگەنبىز. وعان وزگە مەملەكەتتەردەن ەكس-پرەزيدەنتتەر, ەكس-پرەمەرلەر, الەمدىك مەديا سالاسىنىڭ بەلگىلى ماماندارى, پۋليتتسەر سىيلىعىنىڭ يەگەرلەرى باستاعان 300-دەن استام دەلەگاتسيا قاتىسقان. سونىمەن قاتار تاياۋدا وتكەن القا ماجىلىسىندە اقپارات جانە باق ماسەلەسىن كوتەردىك. ەندى, مىنە, مەرزىمدى باسىلىمداردىڭ حال احۋالىن اڭداپ, جاعدايىن تالداپ, باعىت-باعدارىن سارالاۋدىڭ كەزەگى كەلىپ وتىر. مەملەكەت باسشىسى قاسىم-جومارت توقاەۆ «جۋرناليستەر ءوز ەلىنە جانە ازاماتتارىنا شىنايىلىق جاناشىر بولۋى ءتيىس. بۇقارالىق اقپارات قۇرالدارى بەكەر ءتورتىنشى بيلىك اتانباسا كەرەك. سول سەبەپتى سىزدەر جۇرتتىڭ ساناسى مەن سەزىمىنە ىقپال ەتۋ ماسەلەسىنە مۇقيات قاراعاندارىڭىز ءجون» دەپ اتاپ وتكەنى بەلگىلى. مەرزىمدى باسىلىمدار, ونىڭ ىشىندە وڭىرلىك باق جۋرناليستيكانىڭ العاشقى مەكتەبى, العى شەبى ىسپەتتى. اۋدان, ايماقتارىمىزدىڭ ارداقتى ازاماتتارى, زيالىلار قاۋىمى توپتاساتىن ونەگەلى ورتا. قازاقتىڭ كوپتەگەن كورنەكتى تۇلعالارى تىرناقالدى تۋىندىلارىن سوندا جاريالاپ, ەلگە تانىلدى. وتكەن جىلى وڭىرلەرگە ساپارلار كەزىندە كوپتەگەن باسىلىمداردىڭ رەداكتسياسىنا ارنايى بارىپ, جاي-كۇيىمەن جاقىن تانىسقان ەدىك. سول كەزەڭدە وڭىرلەردەگى وزەكتى ماسەلەلەردى استانادا ويلاسامىز دەپ ۋادە بەرگەنبىز. سونىڭ ورايى بۇگىن كەلىپ وتىر», دەدى مينيستر.
سونداي-اق ول بۇگىنگى باسقوسۋ وڭىرلەردەگى باسىلىمداردىڭ ءتۇيىندى ماسەلەلەرىن تالقىعا سالىپ, بولاشاقتى باعامداۋعا پايدالى بولاتىنىنا سەنىم ءبىلدىردى. بۇدان بولەك وڭىردەگى باسىلىمداردى دامىتۋ ماقساتىندا اتقارىلىپ جاتقان جانە ىستەلۋى كەرەك جۇمىستار تۋرالى ويىن ورتاعا سالدى.
ء«بىز جۋرناليستەردىڭ قۇقىقتىق مارتەبەسىن كوتەرىپ, الەۋمەتتىك جاعدايىن جاقسارتۋ ماقساتىندا «ماسس-مەديا تۋرالى» زاڭ قابىلداۋدى كوزدەپ وتىرمىز. جاڭا زاڭ جۇرتشىلىقتىڭ تالقىلاۋىنا شىعارىلدى. قازىر ول كەڭىنەن تالقىلانىپ جاتىر. سونىمەن قاتار اقپاراتقا قول جەتكىزۋ ماسەلەلەرى جونىندەگى زاڭعا دا تۇزەتۋلەر ازىرلەنەدى. اقپاراتتىق دوكترينا تالقىلاۋدان ءوتتى. سونداي-اق اقپارات سالاسىن دامىتۋدىڭ 2023-2030 جىلدارعا ارنالعان تۇجىرىمداماسىن دايىنداۋعا كىرىستىك. ايماقتاعى باسىلىمداردى قارجىلاندىرۋ تەتىگى مەن ەرەجەلەرىن قايتا قاراستىرىپ جاتىرمىز. باق-قا بەرىلەتىن مەملەكەتتىك تاپسىرىستىڭ تالاپتارىن جەڭىلدەتۋگە مۇددەلىمىز», دەدى ۆەدومستۆو باسشىسى.
ونىڭ ايتۋىنشا, قازاقستاندىق قوعامدىق دامۋ ينستيتۋتى بازاسىندا جۋرناليستەردىڭ بىلىكتىلىگىن ارتتىرۋ جانە سالالىق جۋرناليستيكانى ارتتىرۋ ماقساتىندا ءتۇرلى شەبەرلىك سىنىپتارى وتكىزىلەدى. وڭىرلەرگە ساپارلار جانە وسى فورۋمعا دايىندىق كەزىندە ايماقتارداعى كەيبىر باسىلىمداردىڭ ءتىپتى سايتى دا جوق ەكەنى انىقتالدى.
«كەيبىر وڭىرلىك باسىلىمدار رەسپۋبليكالىق دەڭگەيدە تاراپ وتىرعانىن, سايتتارىنىڭ جاقسى جۇمىس ىستەيتىنىن كوردىك. وڭىرلىك باسىلىمداردىڭ سايتتارىن جاساۋ جانە قولداۋ, الەۋمەتتىك جەلىلەردى ءتيىمدى پايدالانۋ بويىنشا ادىستەمەلىك كومەك كورسەتىلدى. سايتتارى جوق كەيبىر اۋداندىق گازەتتەردىڭ سايتتارىن جاساپ بەرۋگە ءبىز قولداۋ كورسەتەمىز. پوستشىندىق كەزەڭىندە شىندىعىمىزدى جوعالتىپ الماس ءۇشىن بارشاعا ورتاق ەرەجەلەر مەن زاڭ تالاپتارىن باسشىلىققا العانىمىز ءجون. وسى ورايدا ونلاين پلاتفورمالار مەن ينتەرنەت جارنامانىڭ قىزمەتىن رەتتەيتىن جاڭا زاڭ جوباسى ازىرلەنىپ جاتىر. بۇل زاڭ جوباسى شەڭبەرىندە قولدانۋشىلاردىڭ جاۋاپكەرشىلىگى كۇشەيەدى. وسى رەتتە باسىلىمدار جارناما بەرۋشىلەرمەن جۇيەلى جۇمىس ىستەگەنى ابزال. اسىرەسە قازاق باسىلىمدارى جارنامامەن جۇيەلى جۇمىس ىستەمەيتىندىگىن ايتا كەتكەن ءجون», دەپ اتاپ ءوتتى دارحان قىدىرالى.
ۆەدومستۆو باسشىسىنىڭ ايتۋىنشا, مينيسترلىك «قازپوچتا» اق-مەن بىرلەسىپ, اقىلى جەتكىزۋ, جازىلۋعا وڭتايلى جاعداي جاساۋ جايلى مەموراندۋمعا قول قويدى.
«اقپاراتتىق قاۋىپسىزدىك ماسەلەسى دە نازاردان تىس قالماۋ كەرەك. وڭىرلىك باق-تى قولداۋ ءۇشىن ولاردا جارىق كورگەن مازمۇندى ماقالالاردى رەسپۋبليكالىق باسىلىمداردا جاريالاۋ تاجىريبەسىن جالعاستىرعان ءجون دەگەن ويدامىز. شالعاي ايماقتارداعى باسىلىمداردا شىندالىپ شىققان جاس جۋرناليستەردى ۇلكەن باسىلىمدارعا جۇمىسقا تارتۋ ماسەلەسىن دە نازاردا ۇستاۋ كەرەك. بۋىن الماسۋى, ءداستۇر ساباقتاستىعى ساتىمەن جالعاسۋ ءتيىس», دەپ قورىتىندىلادى دارحان قىدىرالى.
ايتا كەتەيىك, ءىس-شاراعا 70-تەن استام سپيكەر قاتىسىپ, ءسوز سويلەيدى. تاعىلىمدى كەزدەسۋگە ءار وڭىردەن 200 دەلەگات كەلگەن. ولاردىڭ قاتارىندا وڭىرلىك باسىلىم باسشىلارى, باس رەداكتورلار, جۋرناليستەر جانە رەداكتسيا قىزمەتكەرلەرى بار.
