قوستاناي وبلىسى بويىنشا قارجى مونيتورينگى اگەنتتىگىنىڭ ءباسپاسوز قىزمەتىنىڭ حابارلاۋىنشا, «KZobmen.com», «1WM.KZ», «Kazobmen.ru», «WM007.KZ», «KZ-EXCHANGE.COM» كريپتو ايىرباستاۋ پۋنكتتەرى ارقىلى احقو الاڭىنان تىس, تسيفرلىق اكتيۆتەرمەن تىيىم سالىنعان, اسا ءىرى مولشەردە تابىس تابۋمەن ۇشتاسقان كاسىپكەرلىك قىزمەتتى جۇزەگە اسىرعان ازاماتتاردىڭ قىلمىستىق ارەكەتىنىڭ جولى كەسىلدى.
«جۇرگىزىلگەن ءجىش ناتيجەسىندە 6 مەكەنجاي بويىنشا سانكتسيالانعان ءتىنتۋ جۇرگىزىلدى, ونىڭ بارىسىندا جوعارىدا كورسەتىلگەن كريپتو ايىرباستاۋ پۋنكتتەرىنىڭ ۇيىمداستىرۋشىلارىن اشكەرەلەيتىن زاتتار: نوۋتبۋكتەر, مونوبلوكتار, ۇيالى تەلەفوندار, بانكتىك جانە بۋحگالتەرلىك قۇجاتتار, قىلمىستىق قىزمەتتى جۇزەگە اسىرۋ كەزىندە پايدالانىلاتىن كريپتواميان كىلتتەرى (فلەش-كارتالار) الىندى. Binance پلاتفورماسىندا 2 كريپتوامياندا 6 000 اقش دوللارى كولەمىندەگى كريپتواكتيۆتەر انىقتالىپ, ولارعا ۋاقىتشا شەكتەۋلەر ورناتىلدى. باسقا كريپتوبيرجالاردا ورنالاسقان تاعى 200 000 دوللاردان استام كريپتواكتيۆتەر تابىلدى», دەلىنگەن ۆەدومستۆو حابارلاماسىندا.
سوتقا دەيىنگى تەرگەپ-تەكسەرۋ جۇمىستارى جۇرگىزىلىپ جاتىر. وزگە اقپارات جاريا ەتۋگە جاتپايدى.
قارجىلىق مونيتورينگ اگەنتتىگى كورسەتىلگەن قىزمەت تۇرىنە ءتيىستى ليتسەنزيا بولعان جاعدايدا استانا قالاسىندا احقو اۋماعىندا عانا رۇقسات ەتىلگەنىن ەسكەرتەدى.
