قازاقستان كاسىپكەرلەر قاۋىمداستىعى «قازاقستان تەمىر جولى» اق-نىڭ باق-تا تەرگەپ-تەكسەرۋسىز كاسىپكەرلەردى ايىپتاۋىنا نارازى. وعان قوسا قاۋىمداستىقتىڭ مالىمدەۋىنشە, اپاتتان سوڭ ىلە-شالا تەكسەرەتىن ارنايى كوميسسيا قۇرىلماعان. كوميسسيا تەك 10 كۇننەن كەيىن عانا جۇمىسىن باستاعان. «بۇل – ۆاگون يەسى جانە بيداي تاسىمالداۋشىلار قۇقىعىن ورەسكەل بۇزۋ», دەيدى «اق جول» قازاقستان-دەموكراتيالىق پارتياسى قاراعاندى وبلىستىق فيليالىنىڭ توراعاسى, قازاقستان كاسىپكەرلەر قاۋىمداستىعىنىڭ باسشىسى ەرمەك ءابىلدين. كاسىپكەرلەردىڭ ايتۋىنشا, اپاتقا «قازاقستان تەمىر جولىنىڭ» توزىعى جەتكەن ينفراقۇرىلىمى سەبەپ بولعان. سوندىقتان ولار اپاتتىڭ تولىق تەرگەلىپ, ءادىل شەشىمى شىعۋىن سۇرايدى.
اپات بولعان كۇنى «قازاقستان تەمىر جولى» اق مالىمدەمە جاساعان ەدى. «الدىن الا مالىمەتتەر بويىنشا ۆاگونداردىڭ جولدان شىعىپ كەتۋىنە جەكە مەنشىككە تيەسىلى ءبىرىنشى استىق تاسىمالداۋشى دوڭعالاق جۇبىنىڭ كەپتەلىپ قالۋى سەبەپ بولعان. بۇل جاعدايدى تەكسەرۋ ءۇشىن «قازاقستان تەمىر جولى» ۇك» اق-دا ارنايى كوميسسيا قۇرىلدى», دەپ مالىمدەدى ۇلتتىق كومپانيانىڭ ءباسپاسوز قىزمەتى.
قازاقستان كاسىپكەرلەر قاۋىمداستىعىنىڭ باسشىسى ەرمەك تولەۋ ۇلى قتج-نىڭ جۇك ۆاگوندارىن تاسىمالداۋعا قابىلداردا ونى تەكسەرىپ الاتىندىعىن ايتادى. سول ۋاقىتتا ەشقانداي ەسكەرتۋ جاسالماعان, اقاۋ تابىلماعان.
«قتج تەكسەرىپ, رۇقسات بەرگەن. ەندى كەلىپ, كاسىپكەرلەردى ايىپتاپ وتىر. ەڭ سوراقىسى, بۇل ۋچاسكەدە اپات وسىمەن ەكىنشى رەت تىركەلىپ وتىر. ءبىر اي بۇرىن اعاش تيەلگەن 14 ۆاگون جولدان شىعىپ كەتكەن بولاتىن. ءتىپتى بيىل 8 قاڭتاردا تاعى ءبىر اپات بولدى. ەگەر مۇنداي جاعداي ون جىلدا ءبىر كەزدەسسە, ۇندەمەس ەدىك. بىراق مۇنىڭ ءجيى ەكەنىن كورىپ وتىرمىز. دەمەك پروبلەما بار», دەيدى ەرمەك تولەۋ ۇلى. كاسىپكەرلەردىڭ قۇقىن قورعاپ جۇرگەن قاۋىمداستىق كاسىپكەرلەردى ايىپتى ەتۋگە ءۇزىلدى-كەسىلدى قارسى.
وسى ورايدا «اق جول» دەموكراتيالىق پارتياسىنىڭ مۇشەسى, ءماجىلىستىڭ بۇرىنعى دەپۋتاتى ەرلىك ومىرعالي پرەمەر-مينيستر ءا.سمايىلوۆ پەن باس پروكۋرور ب.اسىلوۆقا دەپۋتاتتىق ساۋال دا جولدادى.
«قازاقستان تەمىر جولى» ۇلتتىق كومپانياسىنىڭ ۆاگوندار جولدان شىعىپ كەتكەن العاشقى ساعاتتاردا-اق ۆاگون يەلەرىن كىنالى رەتىندە تاۋىپ, باق وكىلدەرىنە ەشبىر دالەلسىز سونداي مالىمدەمە بەرۋى – ورەسكەلدىك.
وسى ارادا اتالعان ۆاگونداردى «قتج» ۇك-نىڭ جۇك تيەلگەن ۆاگونداردى تاسىمالداۋعا (كوممەرتسيالىق جانە تەحنيكالىق جاعدايىنا) جانە ۆاگونداردىڭ جۇك كوتەرۋ شەگىنە قاتىستى ەش ەسكەرتۋ جاساماي قابىلداعانىن اتاپ وتكەن ءجون. ونىڭ ۇستىنە ۆاگوندار تولىقتاي جاڭا. زاۋىتتىڭ كەپىلدىك مەرزىمى ءالى وتپەگەن. العاشقى دەپولىق جوندەۋگە دە جەتكەن جوق. ونداي جوندەۋ ءۇش جىلدان سوڭ جاسالادى.
وسى ارادا 2-3 ساعاتتا ارنايى تەرگەۋ جۇرگىزىپ, ايىپتى جاقتى انىقتاۋ قالاي مۇمكىن بولدى دەگەن اقىلعا قونىمدى سۇراق تۋىندايدى. ونىڭ ۇستىنە تەرگەيتىن كوميسسيا ءالى قۇرىلماعان, بارلىق تاراپتىڭ وكىلدەرى اپات ورنىنا جەتىپ ۇلگەرمەگەن. وسىدان سوڭ «قتج» ۇك قىزمەتكەرلەرىنىڭ ارەكەتى جانە وبەكتيۆتىلىگى, اتاپ ايتقاندا, ۆاگونداردىڭ جولدان شىعۋىنىڭ ناقتى سەبەپتەرىن جاسىرىپ جابۋى كۇمان تۋدىرادى», دەيدى دەپۋتات ساۋالىندا.
جاريا ەتىلگەن مالىمەتتەرگە سۇيەنسەك, جۇك ۆاگوندارى جولدان شىققان كۇنى ەكسپورتتاۋشى «نوۆويشيم» بيداي كومپانياسى وكىلدەرى قاراباس ستانساسىنا دەرەۋ جەتكەن. سول كەزدىڭ وزىندە تەمىرجول رەلسىندەگى اقاۋلاردى بەينە, فوتوعا ءتۇسىرىپ العان ەكەن. اتاپ ايتقاندا, بەكىتۋلەردىڭ السىزدىگى, بولتتاردىڭ باسى, بالداقتاردىڭ, رەلستەر تۇيىسەتىن ساڭىلاۋلاردىڭ جوقتىعى, جولداردى نورمادان تىس كەڭەيتۋ سەكىلدى اقاۋلار كوزدەرىنە ءتۇسىپتى.
«مەن جاعدايدى ەستىسىمەن وقيعا ورنىنا بىردەن جەتتىم. شاشىلعان بيداي, اۋدارىلعان ۆاگوندار, ىستەن شىققان رەلستەر. سول جەردە قتج جۇمىسكەرلەرى بولۋى كەرەك, رەلستەردى, ۆاگونداردى, شپالداردى الىپ, قالپىنا كەلتىرۋ جۇمىستارىن جۇرگىزىپ جاتتى. تەكسەرىس جۇرگىزگەنشە, ولاردى ورنىنا قوزعاماۋعا ءتيىس ەدى. قوزعالتقان سوڭ اپاتتىڭ سەبەپتەرىن انىقتاۋ قيىنداي تۇسەدى. ال ۆاگوندارىمىز جاڭا», دەيدى ۆاگون يەسىنىڭ وكىلى سەرىك قوجاحمەتوۆ. ونىڭ ايتۋىنشا, جوعارىداعى مالىمدەمەدەن سوڭ ۆاگون زاۋىت وكىلدەرىن شاقىرتقان. ۆاگون يەلەرى كىنارات ۆاگوننان دەگەنگە يلانبايدى.
وسىلايشا, كاسىپكەرلەر ۆاگوننىڭ رەلستەن شىعىپ كەتۋىن ينفراقۇرىلىمنىڭ توزۋى مەن ونىڭ دۇرىس پايدالانباۋىندا دەسەدى. سوندىقتان دا «قازاقستان تەمىر جولى» ەكسپورتتاۋشىعا كەلگەن شىعىندى تولىق وتەۋگە ءتيىس دەپ سانايدى.
استىعى ىسىراپ بولعان «نوۆويشيم» بيداي كومپانياسىنا كەلگەن زيان ءبىر ميلليارد تەڭگە كولەمىندە دەپ بولجانىپ وتىر. بۇگىندە تاۋەلسىز ساراپشىلاردان قۇرالعان كوميسسيا تەرگەۋ جۇمىستارىن جۇرگىزىپ جاتىر. اشىق رەسۋرستاعى اقپاراتتار ونىڭ ناتيجەسى وتىز كۇننەن سوڭ شىعاتىنىن ايتادى.
ال قاۋىمداستىق جاريا ەتكەن دەرەكتەرگە جۇگىنسەك, 2022 جىلى ەلىمىزدە جۇك ۆاگوندارىنىڭ رەلستەن شىعىپ كەتۋى بىرنەشە رەت تىركەلگەن. ماسەلەن, شىعىس قازاقستان جۇك تاسىمالى بولىمشەسىندە وتكەن جىلى 3 ساۋىردە 18 ۆاگون رەلستەن شىعىپ كەتىپ, ونىڭ بەسەۋى بۇقتىرما وزەنىنە قۇلاعان. ەكىنشى رەت 18 تامىزدا التى جۇك ۆاگونى رەلستەن شىعىپ كەتكەن.
قاراعاندى وبلىسى
