الدىمەن جەڭىلىستىڭ كەرمەك ءدامىن تاتىپ, ءوز جانكۇيەرلەرىن جەرگە قاراتقاندار جايىندا اڭگىمەلەيىك. 60 كيلو سالماقتاعى تالعات سىرىمبەتوۆ پحۋتحانەت رودسۋكتى ءبىرىنشى راۋندتا نوكداۋنعا جىبەردى. الايدا ودان كەيىن تايلاندتىڭ تاستۇلەگى قارقىنىن كۇرت كۇشەيتىپ, قانداسىمىزدى ءبىراز ابىگەرگە سالدى. تالعات تا ايانىپ قالعان جوق. دەسەك تە باسەكە اياقتالعاننان كەيىن تورەشىلەر ءبىراز ويلانا-تولعانا كەلە, جەرگىلىكتى بىلعارى قولعاپ شەبەرىنىڭ قولىن كوتەردى. 63,5 كيلوداعى مۇحاممەدسابىر بازارباي ۇلى قانشا تىرىسسا دا, موڭعوليالىق تۋلگا ويۋنبااتاردىڭ وسال تۇسىن تابا المادى.
ەڭ سوڭعى بولىپ رينگكە كوتەرىلگەن ءۇش بوكسشىمىزدىڭ ۇشەۋى دە ۇلكەن سىناقتارعا ءالى دە دايار ەمەس ەكەندەرىنەن بايقاتتى. ەڭ وكىنىشتىسى, ولاردىڭ بارلىعى دا وزبەكستاننىڭ ورەندەرىنەن ۇتىلدى. اتاپ ايتساق, ەراسىل جاقپەكوۆ (80 كيلو) جاسۋربەك يۋلدوشەۆكە, ەرحات بەكزات (92 كيلو) نۋسراتبەك توحيروۆقا, ال امانات سابىرعالي (+92 كيلو) جاحونگير زوكيروۆقا ەسە جىبەردى. وسى جايتتىڭ ءوزى-اق قازىرگى كەزدە قازاقتارعا قاراعاندا وزبەك بوكسىنىڭ كوشى ءبىرشاما ىلگەرى ەكەنىن اڭعارتسا كەرەك. ارينە, رەسپۋبليكالىق فەدەراتسيانىڭ باسشىلارى مەن ۇلتتىق قۇراما باپكەرلەرى ءبىزدىڭ بۇل پىكىرىمىزدى تەرىسكە شىعارۋعا تىرىساتىنى انىق. بىراق جارتىلاي فينالدا قازاقستان مەن وزبەكستاننىڭ بىلعارى قولعاپ شەبەرلەرى ءوزارا ءۇش رەت كەزدەسىپ, بۇل باسەكەلەردىڭ بارلىعى «الا تاقيالىلاردىڭ» جەڭىسىمەن اياقتالعانىن ولار قالاي تۇسىندىرەر ەكەن؟ سونىڭ الدىندا عانا ءدال وسى مەجەدە وزبەكتىڭ بۇرىمدىلارى قازاقتىڭ ءۇش قىزىن وڭدىرماي ساباپ تاستاعانى تاعى بار. سوعان قالاي نامىستانبايسىڭ؟! ەلگە كەلگەن سوڭ ءبىزدىڭ «مايتالماندار» ادەتتەگىدەي بارلىق كىنانى تورەشىلەرگە ارتىپ, وزدەرىن اقتاپ الۋعا تىرىسا ما؟ الدە بۇل جولى باسقا ءۋاج ايتا ما؟ وسىنداي سانسىز ساۋالداردىڭ جاۋابىن ساناۋلى كۇندەردەن كەيىن قازاقستاننىڭ جاستار قۇراماسى تاي ەلى ساپارىنان ورالعاننان كەيىن بىلەتىن بولامىز.
جارتىلاي فينالدا قارسىلاستارىن قاپى قالدىرىپ, فينالعا شىققان التى جىگىتكە العىستان باسقا ايتارىمىز جوق. 48 كيلو سالماق دارەجەسىندەگى سانجار تاشكەنباي ناتتحاپحونگ تحۋامچاروەندى تىزە بۇكتىردى. تورەشىلەر رينگ قوجايىنىنا بولىسقىلارى كەلگەنىمەن, قازاق بوكسشىسىنا كيلىگۋگە ەش ىلىك تاپپادى. بۇل جەكپە-جەكتە سانجار كۇمانسىز جەڭىسكە جەتتى. 54 كيلوداعى نۇرسۇلتان التىنبەك قىرعىزستاندىق يسلام توروباەۆتان باسىم تۇسسە, 57 كيلوداعى ماحمۇد سابىرحان فيليپپيندىك دجەريچو اكايلاردى ەش قينالماي ەڭسەردى. 67 كيلو سالماقتاعى ابزال سەرىك پەنح ۆانتحۋنگپەن كۇش سىناستى. قانداسىمىزدىڭ شەبەرلىك دەڭگەيى كامبودجانىڭ وكىلىنەن الدەقايدا جوعارى ەكەنى بىردەن بايقالدى. ابزال ونى الداپ تا, ارباپ تا ۇردى. ءۇشىنشى راۋندتا ءبىر رەت ەسەڭگىرەتىپ تە الدى.
71 كيلو سالماقتاعى سابىرجان اققالىقوۆتىڭ تاجىكستاندىق دوۆۋد ماحكاموۆتى جەڭەتىنىنە ەشكىمنىڭ كۇمانى بولعان جوق. جاستار اراسىندا الەم چەمپيونى دەگەن اتاعى بار قازاق بوكسشىسى ەرەسەكتەر دۋىنا دا ەركىن قوسىلىپ, ءبىراز ۋاقىتتان بەرى ورەلى ونەرىمەن كوزگە ءتۇسىپ ءجۇر. جارتىلاي فينالدا ول قارسىلاسىن سان سوقتىردى. 75 كيلوداعى دياس مولجىگىتوۆتىڭ قىتايلىق ايليكۋتي كاحاەردەن مىسى باسىم بولدى.
جارتىلاي فينالعا دەيىن جەتكەن بوكسشىلاردىڭ سانى بويىنشا قازاقستان مەن وزبەكستان وزگەلەردەن كوشى ىلگەرى تۇر. ولاردىڭ ارقايسىسىنىڭ 11 ورەنى جەڭىس تۇعىرىنا كوتەرىلدى. ءۇشىنشى ورىندا – قىرعىزستان. قىرعىزدىڭ جەتى سپورتشىسى ءدال سونداي قۇرمەتكە بولەندى. سونداي-اق وسى مەجەدە ونەر كورسەتكەن باسقا مەملەكەت وكىلدەرىنىڭ سانى مىناداي: تايلاند پەن فيليپپين – 4, موڭعوليا, تاجىكستان, قىتاي – 3, يندونەزيا مەن كامبودجا – 2 جانە مالايزيا مەن نەپال – 1. ەندى سولاردىڭ اراسىنان كىمدەردىڭ وزىپ شىعىپ, ازيا چەمپيونى اتاناتىنىن 26 قاڭتاردا بىلەتىن بولامىز. ال قىزداردىڭ فينالدىق سايىسى بۇگىن وتەدى.
ەرتەڭ وتەتىن اقتىق سىندا سانجار تاشكەنباي شوديەرجون مەلكۋزيەۆپەن, ابزال سەرىك بەكزود حاميدوۆپەن, سابىرجان اققالىقوۆ نۋريسلام يسمويلوۆپەن جانە دياس مولجىگىتوۆ الوحون ابدۋللاەۆپەن ايقاسادى. بۇل بوكسشىلاردىڭ بارلىعى دا – وزبەكستاننان. ياعني كورشىلەس قوس مەملەكەتتىڭ ءوزارا «قاقتىعىسى» قايتا جالعاساتىن بولادى. وسى جولى جىگىتتەرىمىز نامىسقا تىرىسادى دەپ ۇمىتتەنەمىز. ال نۇرسۇلتان التىنبەك فيليپپيندىك فلينت دجارامەن جۇدىرىقتاسسا, ماحمۇت سابىرحان تايلاندتىق ساراۆۋت سۋكتحەتپەن سايىسقا تۇسەدى.
