كەزدەسۋ بارىسىندا سەنات سپيكەرى ءبىزدىڭ ەلىمىز قىرعىز رەسپۋبليكاسىمەن جان-جاقتى ىنتىماقتاستىقتى ودان ءارى نىعايتۋعا مۇددەلى ەكەنىن اتاپ ءوتتى. ماۋلەن اشىمباەۆ ءوزارا بايلانىستى ارتتىرۋعا بارلىق دەڭگەيدەگى, ءبىرىنشى كەزەكتە, ەكى ەلدىڭ مەملەكەت باسشىلارى اراسىنداعى بەلسەندى جانە سەنىمدى ساياسي ديالوگتىڭ ىقپالى زور ەكەنىن ايتتى.
ءوز كەزەگىندە سادىر جاپاروۆ قازاقستان مەن قىرعىزستان اراسىنداعى ءتۇرلى الاڭداعى ەكىجاقتى جانە كوپجاقتى ىنتىماقتاستىقتىڭ جوعارى دەڭگەيىن تىلگە تيەك ەتتى.
سونىمەن قاتار قازاقستاندىق سەناتورلار شىڭعىس ايتماتوۆتىڭ 95 جىلدىعىنا ارنالعان VII قازاق-قىرعىز فورۋمىنا قاتىستى. اۋقىمدى ءىس-شاراعا قاتىسۋشىلار قاتارىندا قازاقستان مەن قىرعىزستاننىڭ اقىن-جازۋشىلارى, تاريحشىلارى جانە ايتماتوۆتىڭ شىعارماشىلىعىن زەرتتەۋشى عالىمدار بار.
ءوز سوزىندە سەنات سپيكەرى باۋىرلاس حالىقتاردىڭ مادەني-گۋمانيتارلىق بايلانىسىن دامىتۋدا ەكى ەلدىڭ زيالى قاۋىم وكىلدەرى ماڭىزدى ءرول اتقاراتىنىن اتاپ ءوتتى.
«قازاق-قىرعىز قارىم-قاتىناسىنىڭ تاريحى تەرەڭنەن تامىر تارتادى. ءبىز ەجەلدەن ىرگەلەس قونعان, تاريحىمىز دا, ءداستۇرىمىز دە ءبىر باۋىرلاس حالىقپىز. ءبىزدىڭ مادەنيەتىمىز دە, ءتىلىمىز دە, ءدىنىمىز دە ورتاق. شىن مانىندە, قازاققا قىرعىزدان جاقىن حالىق جوق. وسىنداي دوستىعىمىز بەن باۋىرلاستىعىمىزدى ودان ءارى ارتتىرۋ اسا ماڭىزدى. ەكى ەلدىڭ پرەزيدەنتتەرى قاسىم-جومارت كەمەل ۇلى توقاەۆ پەن سادىر نۇرعوجا ۇلى جاپاروۆتىڭ تاپسىرمالارىنا سايكەس ەكونوميكالىق, الەۋمەتتىك, مادەني-گۋمانيتارلىق جانە باسقا دا سالالار بويىنشا ىنتىماقتاستىقتى نىعايتۋعا ارنالعان ناقتى شارالار قولعا الىنۋدا», دەدى ماۋلەن اشىمباەۆ.
سەنات توراعاسى قازاق پەن قىرعىزعا بىردەي ورتاق تۇلعا, ۇلى جازۋشى شىڭعىس ايتماتوۆتىڭ شىعارماشىلىعىنا دا ەرەكشە توقتالدى. ايگىلى قالامگەرگە «قازاقستاننىڭ حالىق جازۋشىسى» اتاعى بەرىلگەنىن جانە قازاقستاندا بىرقاتار كوشە ونىڭ ەسىمىمەن اتالعانىن اڭگىمەگە ارقاۋ ەتتى. قايراتكەردىڭ عيبراتتى عۇمىرىن دارىپتەۋ ماقساتىمەن باسقا دا اۋقىمدى مادەني ءىس-شارالار مەن شىعارماشىلىق كەشتەر وتكىزىلىپ تۇراتىنىن جەتكىزدى.
«ادامزاتتىڭ ايتماتوۆى اتانعان قالامگەر ءوز شىعارمالارىنا قازاقتىڭ كەڭ دالاسىن جانە وندا وتكەن وقيعالاردى دا ارقاۋ ەتكەنىن بىلەمىز. جازۋشىنىڭ قالامىنان تۋعان «اق كەمە», «جانپيدا», «عاسىردان دا ۇزاق كۇن» سياقتى شىعارمالار الەمدىك ادەبيەتتىڭ التىن قورىنا قوسىلعان قۇندى قازىنا ەكەنى داۋسىز. اتالعان تۋىندىلاردا ادامي قۇندىلىق كەڭىنەن كورىنىس تاپقان. شىن مانىندە, ايتماتوۆ تۇلعاسى مەن شىعارماشىلىعى – قازاق-قىرعىز بايلانىسىنىڭ رۋحاني كوپىرى», دەدى ماۋلەن اشىمباەۆ.
سەنات توراعاسى فورۋم بارىسىندا ايتىلعان پىكىرلەر مەن ۇسىنىستار الداعى جۇمىستا ەسكەرىلەتىنىن دە نازاردان تىس قالدىرمادى. بىرتۋعان ەكى ەلدىڭ قارىم-قاتىناسىن نىعايتۋعا ۇلكەن ۇلەس قوسقان جانە قوسىپ جۇرەن قىرعىز زيالىلارىنا قازاقستان پرەزيدەنتى قاسىم-جومارت توقاەۆتىڭ اتىنان العىس بىلدىرە وتىرىپ, قىرعىزستاندىق بىرقاتار قايراتكەرگە ءبىزدىڭ ەلىمىزدىڭ مەملەكەتتىك ناگرادالارىن تاپسىردى.
قىرعىز ەلىنە ساپار اياسىندا سەناتورلار قازاقتىڭ ۇلى ويشىلى, اقىن اباي قۇنانباي ۇلىنىڭ ەسكەرتكىشىنە ارنايى بارىپ, عۇلامانىڭ رۋحىنا تاعزىم ەتتى.
