سايلاۋ اعانى مەن بالا كۇنىمنەن بىلەمىن. ويتكەنى ءبىزدىڭ كىشكەنتاي كۇنىمىزدە اۋىلعا, اسىرەسە جاز كەزىندە وبلىستىق «شەرتەر» فولكلورلىق-ەتنوگرافيالىق ءانسامبلى ءجيى كەلىپ, كونتسەرت قوياتىن. سوندا شىبىقتى ات قىلىپ ءمىنىپ جۇرگەن بىزدەر «اۋىلعا كونتسەرت كەلدى», دەپ ءۇي اراسىنا شاپقىلاپ قۋاناتىنبىز. ءبىر جاعىنان, ول كىسى – جەرلەسىمىز. سوندىقتان اۋىلداستارى ونىڭ اسەم ءانىن عانا ەمەس, قازاقى كەڭ پىشىلگەن بولمىسى مەن اقكوڭىل مىنەزىن دە جاقسى كوردى. سودان كەشكە كونتسەرت باستالادى. شاعىن كلۋبتىڭ ءىشى كورەرمەنگە لىق تولادى. ساحنادا «شەرتەردىڭ» شەبەرلەرى كەزەكتەسىپ شىعىپ, ونەرلەرىن كورسەتەدى. ال ءبىز سايلاۋ اعانى تاعاتسىزدانا كۇتىپ وتىرامىز. ول شىققان كەزدە... كلۋبتىڭ ىشىنەن ماسانىڭ دا ىزىڭى ەستىلمەيدى. ءبارى قالت تىنا قالادى. اعامىز كەڭ قۇلاشتى داۋىسىمەن حالىق اندەرىمەن بىرگە, ەسترادالىق تۋىندىلاردى قاتار ورىنداپ, اۋىلداستارىنىڭ ىستىق ىقىلاسىنا بولەنەدى. اسىرەسە ول اقىن ايسۇلۋ قادىرباەۆانىڭ سوزىنە جازىلعان, كومپوزيتور تەمىرالى باقتىگەرەەۆتىڭ «بارىپ قايت, بالام, اۋىلعا» اتتى تۋىندىسىن كەرەمەت ورىنداۋشى ەدى. بۇل ءاندى تۇڭعىشباي جامانقۇلوۆتىڭ ورىنداۋىندا تەلەديداردان ەستىگەنبىز. سوندا دا سايلاۋ اعا وزگەشە ايتادى. مۇڭلى سازبەن ورىلگەن ءان جان دۇنيەڭدى قوزعاپ, وزگە ءبىر كۇيگە بولەيدى. سول كەزدە الدىڭعى قاتارداعى اتا-اجەلەرىمىز كوزدەرىنە جاس الىپ, كەشەگى وزدەرىنىڭ قولىندا وسكەن بالانىڭ ەلگە تانىلعان ءانشى بولعانىنا ريزا بولىپ, مارقايىپ وتىراتىن.
جاسى ۇلكەندەردىڭ ايتۋىنشا, ءانشىنىڭ اكەسى ورداباي اقساقال سوعىس جىلدارىندا ۇجىمشار باسقارىپ, ەلدىڭ العىسىن العان ازامات. سونىمەن بىرگە ول كىسى اتبەگى, سەرى مىنەزدى ادام بولعان. سودان دا بولار, ونىڭ بالالارىنىڭ ءبارى شەتىنەن ونەرلى. كەز كەلگەن مۋزىكالىق اسپاپتا شەبەر وينايدى. الايدا سولاردىڭ اراسىنان ونەر جولىن سايلاۋ اعا عانا قۋدى. وعان دا ءبىر سەبەپ بار. 1971 جىلى جاڭادان شاڭىراق كوتەرگەن وبلىستا «تورعاي اۋەندەرى» اتتى ايماقتىق فەستيۆال ۇيىمداستىرىلادى. سوندا وتان الدىنداعى ازاماتتىق بورىشىن ەندى وتەپ كەلگەن جيىرما ءبىر جاستاعى جىگىت العاش ءان ايتىپ, بايقاۋدىڭ باس جۇلدەسىن يەلەنەدى. سونىمەن بىرگە الماتىداعى رەسپۋبليكالىق فەستيۆالگە جولداما الدى. تورعاي وبلىسىنان جالعىز ءوزى بارعان ول سول كەزدەگى استانامىزدىڭ ەڭ ۇلكەن سارايىندا ءان سالىپ, كاۋكەن كەنجەتاەۆ, بەكەن جىلىسباەۆ سەكىلدى ونەر تارلاندارىنىڭ باتاسىنا يە بولدى. ولار تالاپتى جاستىڭ تابيعي داۋىسى زور ەكەنىن بايقاپ, كونسەرۆاتورياعا وقۋعا شاقىرادى. الايدا سول جىلدارى تورعاي وبلىستىق پارتيا كوميتەتىنىڭ ءۇشىنشى حاتشىسى بولىپ ىستەگەن, رۋحانيات جاناشىرى وزبەكالى جانىبەكوۆ وعان ونەرگە كەلۋگە باعىت سىلتەپ, 1972 جىلى ارقالىق قالاسىنداعى سەرالى قوجامقۇلوۆ اتىنداعى مۋزىكالىق دراما تەاترىنا ورنالاستىرادى.
سايلاۋ ورداباەۆتىڭ ونەردەگى جولى 1974 جىلى بۇرىنعى تورعاي وبلىسى فيلارمونياسى جانىنان قۇرىلعان «شەرتەر» فولكلورلىق-ەتنوگرافيالىق انسامبلىمەن تىكەلەي بايلانىستى. وسى ءانسامبلدىڭ قۇرامىندا ونەر كورسەتكەن ونىڭ داڭقى ەلگە بىردەن جايىلدى. بۇل ونەر ورداسى دا وزاعاڭنىڭ ىقپالىمەن قۇرىلعان.
«شەرتەردى» حالىق جاقسى كوردى. قازىردە فولكلورلىق انسامبلدەر جەتەرلىك, بىراق ولاردان تارسىل-گۇرسىل دىبىستار مەن مەتالدىڭ ءۇنى قۇلاق جارادى. «شەرتەردە» ونداي بوگدە دىبىس بولعان ەمەس. تازا مۋزىكالىق اسپاپتاردىڭ ءۇنى ەستىلەتىن. ونەرپازدار ۇرمالى اسپاپتاعى ىرعاقتى ۇستاپ, سۇيەمەلدەپ وتىراتىن. ءانسامبلدىڭ رەپەرتۋارى دا باي بولدى. ونى وزبەكالى اعانىڭ ءوزى قاداعالادى. اسىرەسە ول كىسى حالىق ءان-كۇيى مەن جەرگىلىكتى وڭىرگە ارنالعان تۋىندىلاردى ايتۋعا ءمان بەردى. كەيىن انسامبل بەلگىلى ءانشى سايلاۋ ورداباەۆ, كومپوزيتور قاليبەك دەرىپسالدين, كۇيشى ءابجان سارسەنباەۆپەن تولىقتى. اۋىلداردى ءجيى ارالايمىز. ەل ادامدارى ءبىزدى قۇراق ۇشىپ قارسى الىپ, جانى قالماي كۇتەدى. ءان-كۇيىمىزدى ۇيىپ تىڭدايدى. وسىلاي «شەرتەردىڭ» اتى تورعايعا عانا ەمەس, قازاقستانعا تانىلدى», دەپ ەدى ءبىر سۇحباتىندا وسى ءانسامبلدىڭ مۇشەسى, ءبيشى قازاقستاننىڭ ەڭبەك سىڭىرگەن ءارتىسى تويعان ءىزىم.
ايگىلى ءانشى «شەرتەر» انسامبلىمەن بىرگە قازاقستاندا عانا ەمەس, ءۇندىستان, يران, جاپونيا, ۆەتنام, فيليپپين, كورەيا, رەسەي جانە تاعى باسقا مەملەكەتتەردە گاسترولدىك ساپاردا بولىپ, ۇلتتىق ءان ونەرىنىڭ مەرەيىن اسىردى. 1980 جىلى ماسكەۋدە وتكەن بۇكىل دۇنيەجۇزىلىك جاستار فەستيۆالىنە قاتىسىپ, ديپلومانت اتاندى. 2004 جىلى قوستاناي وبلىستىق مەتسەناتتار كلۋبىنىڭ «قازىنا» سىيلىعىن يەلەندى. اعامىز ءومىرىنىڭ سوڭعى جىلدارىندا قاتتى ناۋقاستانىپ, ساحنادان قول ءۇزىپ قالسا دا, وزىنەن كەيىنگى شىققان جاستارعا قامقور بولدى. ارداقتى ازامات 2007 جىلى ومىردەن وزدى.
جاقىندا الەۋمەتتىك جەلىگە ءبىر جەرلەسىمىز سايلاۋ ورداباەۆ ورىنداعان «تورعايدى اڭساۋ» اتتى ءانىن جۇكتەپتى. بۇل تۋىندى قاي جىلدارى شىققانىن ناقتى بىلمەيمىن. بىراق وسى شىعارمانىڭ مۋزىكاسىن ۇزاق جىلدار بۇرىنعى تورعاي وبلىسىنىڭ مادەنيەت باسقارماسىن باسقارعان, ءوزى دە سان قىرلى ونەرلى ازامات جۇماعالي ومىربەكوۆ جازىپتى. وسى ءاندى تىڭداپ وتىرىپ, تۋعان جەرىن شەكسىز سۇيگەن ءبىرتۋار ءانشىنىڭ قايتالانباس داۋىسىن ەستىپ, كوڭىلىمدى مۇڭ باستى.
