ولاردىڭ بارىسىندا كاسىپورىنداردىڭ بىلتىرعى وندىرىستىك جەتىستىكتەرى مەن 2023 جىلعا ارنالعان جوسپارلارى قارالىپ جاتىر.
يدم كومىر ونەركاسىبى باسقارماسىنىڭ باسشىسى جانات يگىسىنوۆتىڭ ايتۋىنشا, 2022 جىلى كومىر ءوندىرۋشى كومپانيالار 113,9 ملن توننا قاتتى وتىن ءوندىردى, بۇل 2021 جىلمەن سالىستىرعاندا 1,9%-عا كوپ.
«2022 جىلدىڭ قورىتىندىسى بويىنشا كومىر ەكسپورتى 32,5 ملن تونناعا جەتتى. كوممۋنالدىق-تۇرمىستىق قاجەتتىلىكتەر مەن حالىققا 11,03 ملن توننا, ەنەرگەتيكالىق كەشەندەرگە 64,4 ملن توننا, سونداي-اق ونەركاسىپتىك كاسىپورىندارعا 5,97 ملن توننا كومىر جونەلتىلدى», دەدى ج.يگىسىنوۆ.
مينيسترلىك جەرگىلىكتى اتقارۋشى ورگانداردىڭ دەرەكتەرى نەگىزىندە 2022-2023 جىلدارعا ارنالعان كوممۋنالدىق-تۇرمىستىق سەكتور مەن حالىقتىڭ قاجەتتىلىگىنە بايلانىستى كومىر ونىمدەرى كولەمىنىڭ جوسپارىن دايىندادى. سوعان سايكەس تۇتىنۋ كولەمى – 9 ملن تونناعا جەتپەك. ونىڭ ىشىندە كوممۋنالدىق تۇرمىستىق سەكتور 2,2 ملن توننانى پايدالانسا, حالىق تۇتىناتىن قاتتى وتىننىڭ كولەمى 6,8 ملن تونناعا جەتەدى دەپ بولجانىپ وتىر.
بيىل (23 قاڭتارداعى جاعداي بويىنشا) وڭىرلەرگە 7,6 ملن توننا كومىر جەتكىزىلدى, بۇل قاجەتتىلىكتىڭ 84,1%-نا تەڭ.
«بيىلعى جىلىتۋ ماۋسىمى كەزەڭىندە قاتتى وتىننىڭ تاپشىلىعىن بولدىرماۋ ماقساتىندا 2022 جىلدىڭ 30-شى قىركۇيەگىنەن باستاپ ەلىمىزدەن كومىردى اۆتوموبيل كولىگىمەن شىعارۋ 6 ايعا شەكتەلدى, مينيسترلىك ارنايى بۇيرىق شىعاردى», دەدى ج.يگىسىنوۆ.
سونىمەن قاتار ۆەدومستۆو بىلتىر ەلىمىزدەگى ەكىنشى دەڭگەيلى بانكتەرمەن بىرلەسىپ, قارجى جانە ساۋدا ۇيىمدارىنىڭ ءموبيلدى قوسىمشالارى ارقىلى الەۋمەتتىك كومىردى ساتۋ بويىنشا جوبانى قولعا العانىن ايتا كەتەيىك. قازىر اتالعان تەتىك ارقىلى ەلىمىزدىڭ 9 وڭىرىندە 17 وپەراتور كومىر ساتىپ كەلەدى.
