نەگىزى الەم چەمپيونى اتاعى ماگنۋس كارلسەنگە تيەسىلى. 32 جاستاعى نورۆەگيانىڭ ماقتانىشى 2013 جىلى ءۇندىستاننىڭ چەنناي قالاسىندا جەرگىلىكتى شاحماتشى ۆيشۆاناتان اناندتى ۇتىپ, باس جۇلدەنى ولجالاعان ەدى. سودان كەيىنگى 10 جىل ارالىعىندا قارسىلاس شاق كەلتىرمەگەن ول ءوز اتاعىن ءتورت مارتە ءساتتى قورعادى. تارقاتىپ ايتساق, 2014 جىلى سوچيدە اناندتان (6½:4½), 2016 جىلى نيۋ-يوركتە رەسەيلىك سەرگەي كارياكيننەن (6:6, تاي-برەيك 3:1), 2018 جىلى لوندوندا امەريكالىق فابيانو كارۋانادان (6:6, تاي-برەيك 3:0) جانە 2021 جىلى دۋبايدا يان نەپومنياششيدەن (7½:3½) باسىم ءتۇستى. بىراق بىلتىر جازدا كارلسەن ءوز اتاعىن قورعاۋدان باس تارتاتىنىن رەسمي تۇردە جاريا ەتتى. سول سەبەپتى دە چەمپيوندىق اتاق ءۇشىن تارتىس بيىل وزگە ويىنشىلار اراسىندا وتەدى.
چەمپيوندىق اتاق ءۇشىن كىمدەردىڭ تالاساتىنى بىلتىر 16 ماۋسىم مەن 5 شىلدە ارالىعىندا يسپانيانىڭ استاناسى مادريدتە وتكەن ۇمىتكەرلەر تۋرنيرىندە انىقتالدى. بۇل جارىستا تەيمۋر رادجابوۆ (ازەربايجان), حيكارۋ ناكامۋرا مەن فابيانو كارۋانا (اقش), يان-كشيشتوف دۋدا (پولشا), يان نەپومنياششي مەن سەرگەي كارياكين (رەسەي), اليرەزا فيرۋزدجا (فرانتسيا) جانە ريحارد راپپورت (ماجارستان) باق سىناۋعا ءتيىس ەدى. الايدا رەسەيدىڭ ۋكرايناعا باسا-كوكتەپ كىرۋىن اشىق تۇردە قولداعانى ءۇشىن كارياكين اتالعان تۋرنيردەن شەتتەتىلدى. ونى قىتايلىق دين ليجەن الماستىردى. ناتيجەسىندە, پيرەنەي تۇبەگىندەگى تارتىس يان نەپومنياششيدىڭ جەڭىسىمەن اياقتالىپ, ول چەمپيوندىق ءتاج ءۇشىن تالاسۋ مۇمكىندىگىنە يە بولدى. ال ماگنۋس كارلسەن باسەكەگە تۇسۋدەن باس تارتقاننان كەيىن تاڭداۋ ۇمىتكەرلەر تۋرنيرىندە ەكىنشى ورىندى ولجالاعان دين ليجەنگە ءتۇستى.
استاناداعى جارىستىڭ جۇلدە قورى 2 ميلليون ەۋرونى قۇرايدى. سول سوممانىڭ 60 پايىزى جەڭىمپازعا تيەسىلى بولسا, 40 پايىزى جەڭىلگەن ويىنشىعا تابىس ەتىلەدى. تاعى ءبىر ايتا كەتەرلىگى, كۇنى كەشە عانا تانىمال كاسىپكەر, مەتسەنات تيمۋر تۋرلوۆ قازاقستان شاحمات فەدەراتسياسىنىڭ پرەزيدەنتى بولىپ سايلاندى. FIDE-ءنىڭ رەسمي سايتىندا جاريالانعان مالىمەتتەرگە سەنسەك, ەلىمىزدە وسىنداي اسا جاۋاپتى جارىستىڭ وتۋىنە ءدال سول ازامات سۇبەلى ۇلەس قوسقان ەكەن.
