بۇل باستاماعا بىردەن ءۇن قوسىپ, جالعاستىرىپ اكەتكەن جامبىل وبلىسىنداعى مويىنقۇم اۋدانى ەكەنى دە ءمالىم. ءيا, قۇمدى ولكەدە جالىندى جاستىقتىڭ وتىن الاۋلاتا جاعىپ, جارقىراپ شىققان, ەكى مارتە سوتسياليستىك ەڭبەك ەرى اتانعان جازىلبەك قۋانىشباەۆ سالعان سارا جولدى ءارى قاراي ابىرويمەن جالاستىرعان «سۇڭقار», «شالقار», «تۇلپار», «قارلىعاش», «شۇعىلا» بريگادالارىنىڭ اتى الىسقا كەتىپ, ولاردىڭ ەڭبەگى جايىندا ءباسپاسوز بەتتەرىندە تالاي جازىلعان.
ارينە, مەكتەپ بىتىرە سالا جاس ورەندەردى مال سوڭىنا سالىپ قويۋ قازىرگى كۇننىڭ بيىگىنەن قاراعاندا دۇرىس ەمەس بولار. بىراق بۇل كەشەگى كەڭەس وكىمەتى كەزىندەگى ءومىر شىندىعىنىڭ كورىنىسى عوي. دەگەنمەن سول جاستاردىڭ بىرقاتارىنىڭ, بريگاداداعى ەكى-ءۇش جىل جۇمىسىنان كەيىن ينستيتۋت, ۋنيۆەرسيتەتتەرگە وقۋعا جەڭىلدىكپەن تۇسكەنى دە شىندىق.
«ايدارلى» كەڭشارىنداعى «سۇڭقار» مويىنقۇمداعى وسىنداي ۇجىمنىڭ وزىعىنىڭ ساناتىندا بولعاندىقتان, وعان جوعارى جاقتان قوناقتار ءجيى-ءجيى ات ءىزىن سالاتىن. جەتپىسىنشى جىلداردىڭ ورتاسىندا تۇسىرىلگەن مىنا سۋرەتتە سونداي ءساتتىڭ ءبىرى بەينەلەنگەن: قازاقستان كومپارتياسى ورتالىق كوميتەتىنىڭ ەكىنشى حاتشىسى ۆالەنتين كارپوۆيچ مەسياتس ء(بىرىنشى قاتاردا وڭ جاقتان ءتورتىنشى, 1976 جىلدان باستاپ كسرو اۋىل شارۋاشىلىعى ءمينيسترى بولعان, ول كىسىنىڭ وڭ جاعىندا جامبىل وبلىستىق پارتيا كوميتەتىنىڭ ءبىرىنشى حاتشىسى حاسەن بەكتۇرعانوۆ, سول جاعىندا مويىنقۇم اۋداندىق پارتيا كوميتەتىنىڭ ءبىرىنشى حاتشىسى ايتباي نازاربەكوۆ) حانتاۋى بوكتەرىندەگى «سۇڭقار» كومسومول-جاستار شوپاندار بريگاداسى مۇشەلەرى, سونداي-اق باسقا دا اۋداندىق دەڭگەيدەگى جەتەكشىلەر مەن اتالعان كەڭشار باسشىلارىنىڭ اراسىندا.
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
