پوليتسەيلەرگە بەلگىلى ءبىر ازاماتتار وبلىس اۋماعىندا اكتسيزدىك ماركالارمەن الكوگول ءونىمىنىڭ ەسەپكە الۋ-باقىلاۋ ماركالارىن پايدالانۋ ارقىلى زاڭسىز ىشىمدىك ونىمدەرىن ساتۋمەن اينالىسىپ جاتقانى تۋرالى اقپارات ءتۇستى. سونىمەن قاتار ازاماتتار جاۋاپكەرشىلىگى شەكتەۋلى سەرىكتەستىكتەردىڭ ءبىرىنىڭ تاۋار تاڭباسىن زاڭسىز پايدالانىپ, اكتسيزدەلەتىن تاۋارلاردى اكتسيزدىك تاڭبالارمەن تاڭبالاۋ ءتارتىبى مەن ەرەجەلەرىن بۇزعانى انىقتالدى.
ءتارتىپ ساقشىلارى ارنايى ماقساتتاعى جاساق جانە ەكونوميكالىق تەرگەۋ دەپارتامەنتى قىزمەتكەرلەرىمەن بىرلەسىپ, قالاداعى ەكى مەكەنجايدا ءتىنتۋ جۇمىستارىن جۇرگىزدى. جۇرگىزىلگەن كەشەندى ءتىنتۋ جۇمىستارى بارىسىندا 35 مىڭنان استام جالعان ەسەپكە الۋ-باقىلاۋ تاڭبالارىمەن بەلگىلەنگەن كونتروفاكتىلى الكوگولدىك ءونىم تاركىلەندى. سونداي-اق پوليتسيا قىزمەتكەرلەرىمەن ءار رۋلوندا 1000 جاپسىرمادان تۇراتىن جەتى رۋلون جاپسىرىلاتىن اكتسيزدىك ماركالار تاركىلەندى.
ناتيجەسىندە بۇل ىسكە قاتىسى بار جەتى كۇدىكتى انىقتالدى. ولاردىڭ ىشىندە 28 بەن 57 جاس ارالىعىنداعى بەس ەر ازامات, 30 بەن 59 جاس ارالىعىنداعى ەكى ايەل بار.
اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 233-بابىنا سايكەس قىلمىستىق ءىس قوزعالدى.
