نەگىزى, قاراعاندى وبلىسى ەلىمىزدەگى جوعارى ۋرباندالعان ايماق ەكەنى ءمالىم. دەگەنمەن اۋىل دەگەن اتاجۇرتتى تاستاپ كەتپەي, سوندا قۇرتىن قايناتىپ, قوزىسىن قوزداتقان اعايىن «اۋىل ءالى-اق وركەندەيدى» دەگەن ارمانىنان كۇدەر ۇزبەگەندەر. ونىڭ ۇستىنە مەملەكەت باسشىسى قاسىم جومارت توقاەۆتىڭ الداعى بەس جىلدىقتا اۋىل-ايماقتى دامىتۋعا باسىمدىق بەرۋى وشكەلى تۇرعان ءۇمىتتى ۇرلەدى. پرەزيدەنتتىڭ «قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسى تۋرالى» جارلىققا قول قويۋى اۋىلدىڭ ەڭكىش تارتقان ەڭسەسىن تىكتەرىنە اۋىلداعى اعايىننىڭ سەنىمىن وياتقانداي.
– مەن سايلاۋالدى سوزدەرىمدە اۋىلدى وركەندەتۋ ىسىنە باسا نازار اۋداردىم. بۇگىندە قازاقستان حالقىنىڭ 40 پايىزعا جۋىعى اۋىلدا تۇرادى. «اۋىل – ەل بەسىگى» دەپ حالقىمىز بەكەر ايتقان جوق. سوندىقتان اۋىلداعى جاعدايدى جاقسارتا الماساق, بارىمىزگە سىن. سول ءۇشىن مەن بۇگىن اۋىلدى دامىتۋ ماسەلەسى تۋرالى جارلىققا قول قويامىن. وسى قۇجات ارقىلى ۇكىمەتكە اۋىلدى دامىتۋدىڭ 5 جىلعا ارنالعان ناقتى جوسپارىن ازىرلەۋدى تاپسىرامىن. بۇل مەنىڭ جاڭا پرەزيدەنتتىك مەرزىمدەگى ءبىرىنشى جارلىعىم بولادى. ۇكىمەت اۋىلدى دامىتۋعا ارنالعان بارلىق جوبانى جۇيەلى تۇردە رەتتەپ, جيناقتاۋعا ءتيىس. سودان كەيىن ماقساتتى تۇردە ءتيىمدى جۇمىس جۇرگىزەمىز, – دەگەن ەدى قاسىم-جومارت توقاەۆ ۇلىقتاۋ راسىمىندە.
بارشاعا ايان, جىلدار بويى اۋىلدىڭ قوردالانعان ماسەلەسى ءبىر-بىرىنە بايلاۋلى. ءبىرىن قوزعاساڭىز, ەكىنشى, ءۇشىنشى, ءتورتىنشى بولىپ, تىزبەكتەلىپ جۇرە بەرەدى. ويتكەنى اۋىلدىڭ كوشەسىنەن ءار, جولىنان ءسان, ءبىلىم مەن مادەنيەت وشاعىنان ءمان كەتكەلى كوپ جىل بولدى. ينجەنەرلىك جەلىسى تۋرالى ءسوز قوزعاۋدىڭ ءوزى ۇيات-تى.
بىرنەشە جىل بۇرىن قولعا الىنعان «اۋىل – ەل بەسىگى» جوباسى ارقىلى ءبىراز اۋىلدىڭ ينفراقۇرىلىمى جاڭعىردى. اۋىلداردىڭ تامىرىنا قان جۇگىرە باستادى. توتى قۇستاي تۇلەپ شىقپاسا دا, تۇرمىستى تۇزەۋگە بولاتىنىن اڭعاردى اعايىن. وسىلايشا 2025 جىلعا دەيىن ەلىمىزدە 5,5 ملن-نان اسا ادام تۇراتىن 1,8 مىڭ اۋىلدىق ەلدى مەكەندى جاڭعىرتۋ كوزدەلدى.
بيىل كەنشىلەر مەكەنىندە «اۋىل – ەل بەسىگى» جوباسىنىڭ يگىلىگىن 32 اۋىل كورمەكشى. بۇل اۋىلداردا 33 الەۋمەتتىك ماڭىزعا يە جوبا جۇزەگە اساتىن بولادى. اتاپ ايتقاندا, 22 اۋىلدىڭ جولى جوندەلەدى. بىلتىر 60 مىڭعا جۋىق حالىق تۇراتىن 21 اۋىلدىڭ جاعدايى جاقساردى. جاڭا سپورت كەشەندەرى سالىنىپ, مەكتەپتەر, مادەني ورتالىقتار جاڭعىردى. اۋىل جولدارى دا نازاردان تىس قالعان جوق.
– بيىل «اۋىل – ەل بەسىگى» جوباسىمەن 43 924 ادام تۇراتىن 32 اۋىلدىق ەلدى مەكەندى قامتۋ جوسپارلانعان. بۇقار جىراۋ اۋدانى گاگارين اتىنداعى اۋىلدا مەكتەپكە قوسىمشا قۇرىلىس جالعاسادى. ەكى دەنە شىنىقتىرۋ-ساۋىقتىرۋ كەشەنى سالىنۋدا, – دەيدى وبلىستىق ەكونوميكا باسقارماسىنىڭ باسشىسى تاتيانا ابلاەۆا.
سونىڭ ىشىندە وساكاروۆ اۋدانى اقبۇلاق اۋىلىنداعى ورتا مەكتەپ قايتا جاڭارتىلادى. وساكاروۆ اۋدانى باتپاق, سادوۆوە, وزەرنوە, شەت اۋدانىنا قاراستى مويىنتى جانە بوساعا اۋىلدارىنداعى بەس مادەنيەت ۇيىنە كۇردەلى جوندەۋ جۇمىستارى باستالادى. اباي, وساكاروۆ, نۇرا جانە بۇقار جىراۋ اۋداندارىنىڭ 22 ەلدى مەكەنىندە 134 شاقىرىم كەنتىشىلىك جولدار جوندەلەدى.
وسى ورايدا وبلىس باسشىلىعى ءبىر جىلدا – ءبىر اۋىلدىق ەلدى مەكەن دەگەن قاعيداتتى ۇستانۋعا مۇددەلى. ياعني باعدارلاماعا كىرگەن اۋىلدا سول جىلى بارلىق قاجەتتىلىك جاسالىپ, توزعان ينفراقۇرىلىم جوندەلۋگە ءتيىس. تۇيتكىلدى ماسەلەسى تۇگەل دەرلىك شەشىمىن تابۋى كەرەك. ءبىر جىلى سۋىن جوندەپ, كەلەسى جىلى جولىن دەيتىندەي شاشىلىپ-توگىلگەن ماسەلەلەر تۋىنداماۋعا ءتيىس. وسىعان بايلانىستى اۋىل اكىمدەرىنە «اۋىل – ەل بەسىگى» جوباسى اياسىندا اۋىلدى كەشەندى دامىتۋ جوسپارىن دايىنداۋ جۇكتەلىپ وتىر. جوسپارعا ەنگەن ءىستىڭ بەرەكەلى بولۋى ونىڭ دەر كەزىندە ۇيىمداستىرۋ ءىس-شارالارىنىڭ جۇزەگە اسۋىنا دا بايلانىستى. سول سەبەپتى ايماق باسشىلىعى تاراپىنان اۋدان, اۋىل اكىمدەرىنە جۇكتەلگەن ناقتى تاپسىرمالار دا بار. ال ونىڭ ناتيجەسىن ۋاقىت كورسەتەدى.
قاراعاندى وبلىسى
