مەملەكەت باسشىسىنىڭ 1993 جىلعى 19 قاڭتارداعى جارلىعىمەن قورعانىس مينيسترلىگىنىڭ, رەسپۋبليكالىق ۇلاننىڭ, شەكارا جانە ىشكى اسكەرلەردىڭ باسقارۋ ورگاندارى مەن اسكەري بولىمدەرىندە كومانديرلەردىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارلارى لاۋازىمدارى ەنگىزىلگەن بولاتىن.
30 جىل ىشىندە تاربيە قۇرىلىمدارى ايتارلىقتاي دامىدى. بۇگىنگى تاڭدا تاربيە جانە يدەولوگيالىق جۇمىس ورگاندارى پسيحولوگيالىق, الەۋمەتتىك جانە اسكەري-الەۋمەتتىك سالالاردى, اسكەري قىزمەتشىلەردىڭ وتباسىلارىمەن جۇمىستى ۇيىمداستىرۋدى قامتيتىن كوپفۋنكتسيالى قۇرىلىمعا اينالدى.
2022 جىلى قازاقستان رەسپۋبليكاسى ۇكىمەتىنىڭ قاۋلىسىمەن ازاماتتاردى اسكەري-پاتريوتتىق تاربيەلەۋ قاعيدالارى ازىرلەنىپ, بەكىتىلدى. ونىڭ نەگىزىندە جاستاردى وتاندى قورعاۋ ىسىنە تارتۋ جونىندەگى ءىس-شارالاردىڭ تۇتاس كەشەنى ۇيىمداستىرىلدى. بۇل باعىتتا 250 مىڭنان استام وسكەلەڭ ۇرپاقتى بىرىكتىرەتىن «جاس سارباز» رەسپۋبليكالىق بالالار-جاسوسپىرىمدەر قوزعالىسى جەتەكشى ءرول اتقارادى.
تاربيە جانە يدەولوگيالىق جۇمىس ورگاندارى قۇقىقتىق ءتارتىپ پەن اسكەري ءتارتىپتى ساقتاۋعا ەلەۋلى ۇلەس قوسىپ كەلەدى. سوڭعى جىلدارى قارۋلى كۇشتەردەگى جاعىمسىز قۇبىلىستاردىڭ سانى ايتارلىقتاي ازايدى. ەل پرەزيدەنتىنىڭ تاپسىرمالارىن ىسكە اسىرۋ شەڭبەرىندە اسكەري قىزمەتشىلەردىڭ قازا بولۋى مەن جاراقاتتانۋىن بارىنشا ازايتۋعا باعىتتالعان ء«ومىرىڭدى ساقتا» باعدارلاماسى قابىلدانىپ, ىسكە اسىرىلىپ جاتىر.
تاربيە قۇرىلىمدارىنىڭ قوعامدىق ۇيىمدارمەن ءوزارا ءىس-قيمىلى جانداندىرىلىپ, ول قوعامنىڭ اسكەرگە دەگەن سەنىمىن ارتتىرۋعا مۇمكىندىك بەردى. قارۋلى كۇشتەر ارداگەرلەرىنىڭ جاستارمەن جۇمىس جاساۋداعى جانە ارميانى ودان ءارى دامىتۋ باعىتتارىن ازىرلەۋدەگى الەۋەتى دە جۇمىس ىستەپ جاتىر.
وفيتسەر-تاربيەشىلەردىڭ اسكەرلەردىڭ وقۋ-جاۋىنگەرلىك قىزمەتىن, جاۋىنگەرلىك كەزەكشىلىكتى, قاراۋىلدىق جانە ىشكى قىزمەتتى مورالدىق-پسيحولوگيالىق قامتاماسىز ەتۋدى ۇيىمداستىرۋداعى قىزمەتى اسا ماڭىزدى. وقۋ-جاتتىعۋ بارىسىندا جەكە قۇرامدا قاجەتتى قاسيەتتەردى قالىپتاستىرۋ جانە قولداۋ, قارسىلاستىڭ اقپاراتتىق-پسيحولوگيالىق اسەرىنەن قورعاۋ ماسەلەلەرى دە پىسىقتالادى.
بۇگىندە تاربيە قۇرىلىمدارى اسكەردىڭ بارلىق سالالارىندا ەلدىڭ قورعانىس قابىلەتىن نىعايتۋ ءۇشىن ءتيىمدى جۇمىس جۇرگىزەتىن قارۋلى كۇشتەردىڭ ماڭىزدى ينستيتۋتى دەسەك بولادى.
