ۇكىمەت مۇناي-حيميا سالاسىنا 3 ملرد. دوللار ينۆەستيتسيا تارتۋعا نيەتتى

استانا. 12 ماۋسىم.  ەلىمىزدە ۇدەمەلى يندۋستريالدى-يننوۆاتسيالىق دامۋ باعدارلاماسى اياسىندا مۇناي-حيميا سالاسىن دامىتۋ ماقساتىندا 3 ملرد. دوللار ينۆەستيتسيا تارتۋ كوزدەلىپ وتىر. ۇكىمەت باسشىسىنىڭ ورىنباسارى, يندۋستريا جانە جاڭا تەحنولوگيالار ءمينيسترى اسەت يسەكەشەۆ شەتەلىك ينۆەستورلار كەڭەسىنىڭ 27-ءشى جالپى وتىرىسىندا وسىلاي دەپ مالىمدەدى. بۇل تۋرالى «ينتەرفاكس-قازاقستان» حابارلادى. اسەت يسەكەشوۆ: «ۇدەمەلى يندۋستريالدى-يننوۆاتسيالىق دامۋ باعدارلاماسىنىڭ العاشقى 5 جىلدىعى بارىسىندا 10-نان استام باسىمدىقتى ءونىم تۇرلەرىنىڭ شىعارىلىمى جولعا قويىلدى. ال 2018 جىلعا دەيىن تاعى 15 ءونىم ءتۇرى يگەرىلمەك.  LG Chem, ەۆروحيم, Fosfa سىندى شەتەلدىك ينۆەستورلارمەن ءىرى جوبالار جۇزەگە اسىرىلدى», – دەدى. ونىڭ ايتۋىنشا الداعى ۋاقىتتا قولعا الىناتىن جاڭا ءىرى جوبالار شامامەن 3 ملرد. دوللار ينۆەستيتسيا تارتۋعا مۇمكىندىك بەرەدى. سونداي-اق, ول: «2019 جىلعا قاراي قازاقستاندا ەكسپورتتىق الەۋەتى 3 ملرد. اقش دوللارىنان اساتىن ونەركاسىپ ءوندىرىسىنىڭ جاڭا سالالارى قۇرىلىپ, ىشكى نارىقتى تىڭايتقىشتارمەن, گەربيتسيدتەرمەن تولىق قامتاماسىز ەتۋگە قول جەتكىزىلەدى, حيميكاتتار ءوندىرىسى داميدى», – دەدى. جولدىباي بازار. دەرەككوز: «ينتەرفاكس-قازاقستان». فوتو: primeminister.kz.