اتالعان ءىس-شاراعا پرەمەر-مينيستر ءاليحان سمايىلوۆ, پارلامەنت سەناتى مەن ءماجىلىس دەپۋتاتتارى, مەملەكەتتىك ورگاندار مەن كومپانيالاردىڭ باسشىلارى, سونداي-اق قۇرىلىمدىق بولىمشەلەردىڭ, ۆەدومستۆولىق باعىنىستى ۇيىمداردىڭ جانە يدم قوعامدىق كەڭەسىنىڭ, «اتامەكەن» ۇكپ-نىڭ, كاسىپكەرلىك قوعامداستىق پەن بيزنەس-قاۋىمداستىقتاردىڭ وكىلدەرى قاتىسىپ جاتىر.
ءوز بايانداماسىندا يندۋستريا جانە ينفراقۇرىلىمدىق دامۋ ءمينيسترى مارات قاراباەۆ 2022 جىلداعى ۆەدومستۆونىڭ قىزمەتىندەگى نەگىزگى ناتيجەلەرگە قىسقاشا توقتالىپ, وسى جىلعا ارنالعان جوسپارلاردى تىزبەكتەپ شىقتى.
ءبىرىنشى كەزەكتە يدم-ءنىڭ باسشىسى بيىل ورتا جانە جوعارى بولىنىستەگى ونىمدەردى ءوندىرۋ ماقساتىندا ونەركاسىپتىك دامۋ سالاسىنداعى قولدانىستاعى زاڭنامانى جەتىلدىرۋ جونىندەگى جۇمىس جالعاستىرىلاتىنىن ايتتى. سونداي-اق سالالىق جوسپارلار مەن يمپورتتى الماستىرۋدىڭ وڭىرلىك باعدارلامالارى قابىلدانادى دەپ كۇتىلەدى. م.قاراباەۆتىڭ ايتۋىنشا, جىل سوڭىنا دەيىن 1,1 ترلن تەڭگەگە 16,3 مىڭ تۇراقتى جۇمىس ورنىن اشۋدى كوزدەيتىن 149 جاڭا جوبانى ىسكە اسىرۋ جوسپارلانعان.
مەملەكەت باسشىسىنىڭ تاپسىرماسىنا سايكەس بىلتىرعى جەلتوقسان ايىندا مينيسترلىك قازاقستان رەسپۋبليكاسىنىڭ كولىك-لوگيستيكالىق الەۋەتىن دامىتۋدىڭ 2030 جىلعا دەيىنگى تۇجىرىمداماسىن بەكىتتى. بۇل سالانى ودان ءارى دامىتىپ, الداعى ءىس-قيمىلدى ايقىندايتىن نەگىزگى قۇجات سانالادى.
ەلىمىزدىڭ ترانزيتتىك الەۋەتىن ارتتىرۋ ءۇشىن بىلتىر تەمىرجول سالاسىنداعى ءىرى ينفراقۇرىلىمدىق جوبالار جۇزەگە اسىرىلا باستاعانىن ايتا كەتەيىك. اتاپ ايتقاندا, 2022 جىلدىڭ قاراشا ايىندا تەمىرجول كولىگى سالاسىنداعى ءىرى جوبالاردىڭ ءبىرى – «دوستىق-مويىنتى» تەمىرجول ۋچاسكەسىنىڭ ەكىنشى تورابىنىڭ قۇرىلىسى باستالعان بولاتىن. اتالعان جوبانى ىسكە اسىرۋ وسى ۋچاسكەدەگى جىلجىمالى قۇرامدى وتكىزۋدى 5 ەسەگە ارتتىرۋعا مۇمكىندىك بەرەدى (12-دەن 60 جۇپ پويىزعا دەيىن).
«2023 جىلى الماتى ستانساسىن اينالىپ وتەتىن تەمىرجول جەلىسىنىڭ قۇرىلىسىن باستاپ, سونداي-اق ترانزيتتىك ۋچاسكەلەردەگى تار شەڭبەرلى جەرلەردى جويۋ جونىندەگى جۇمىستى جالعاستىرۋدى جوسپارلاپ وتىرمىز. وسى جىلدىڭ سوڭىنا دەيىن «داربازا–ماقتارال», «باقتى – اياگوز» سىندى جوبالاردىڭ تەحنيكالىق قۇجاتتامالارىن ازىرلەۋ جۇمىستارى اياقتالۋى ءتيىس. سودان كەيىن اتالعان جوبالاردى ىسكە اسىرۋدى باستايمىز», دەدى ۆەدومستۆو باسشىسى.
بيىل اۆتوجول سالاسىندا جالپى كولەمى 10,5 مىڭ شاقىرىم (ونىڭ ىشىندە رەسپۋبليكالىق جەلى بويىنشا - 7,3 مىڭ شاقىرىم, جەرگىلىكتى جەلى بويىنشا - 3,2 مىڭ شاقىرىم) جولدى قۇرىلىس جانە جاڭعىرتۋ جۇمىستارىمەن قامتۋ جالعاستىرىلادى.
ەلىمىزدىڭ پرەزيدەنتى قاسىم-جومارت توقاەۆتىڭ تاپسىرماسى بويىنشا سالىناتىن جولدىڭ ساپاسىن ارتتىرۋ ءۇشىن وسى جىلدىڭ سوڭىنا دەيىن FIDIC حالىقارالىق ەرەجەلەرىنىڭ شارتتارى ەنگىزىلمەك. نەگىزگى 50 ءنورماتيۆتى قۇرۋ ارقىلى قولدانىستاعى 1200-دەن استام سالالىق نورماتيۆ وڭتايلاندىرىلادى.
بۇدان باسقا EPCM-كەلىسىمشارت قاعيداسى بويىنشا اۆتوجول جوبالارىن ىسكە اسىرۋعا كوشۋ جۇزەگە اسىرىلىپ, بۇل ءبىر ورىنداۋشىعا جوبانىڭ تولىق ومىرلىك تسيكلىن, اتاپ ايتقاندا جوبالاۋ ساتىسىنان باستاپ وسى ۋچاسكەنى 10 جىل بويى كۇتىپ ۇستاۋعا مۇمكىندىك بەرەدى.
قۇرىلىس سالاسىندا 2023 جىلى 15,3 ملن شارشى مەتر تۇرعىن ءۇيدى نەمەسە 143,5 مىڭ باسپانانى پايدالانۋعا بەرۋ جوسپارلانىپ وتىر.
«مينيسترلىك ەكونوميكا سالالارىنىڭ تۇراقتى دامۋىن قامتاماسىز ەتۋ مەن حالىقتىڭ ءال-اۋقاتىن ارتتىرۋ جونىندەگى جۇمىستى جالعاستىرادى. پرەزيدەنت قاسىم-جومارت توقاەۆ الدىمىزعا قويعان مىندەتتەردى ساپالى ءارى ۋاقىتىلى ىسكە اسىرۋ ءۇشىن بارلىق قاجەتتى شارانى قابىلدايمىز», دەدى مارات قاراباەۆ.
ءمينيستردىڭ بايانداماسىنان كەيىن يندۋستريا جانە ينفراقۇرىلىمدىق دامۋ ۆيتسە-مينيسترلەرى ە.داۋىلباەۆ, ي.شارحان جانە ا.ىدىرىسوۆ وزدەرىنىڭ قۇزىرىنا كىرەتىن سالالار بويىنشا بىلتىر اتقارىلعان جۇمىستار جونىندە مۇقيات ايتىپ بەرەدى.
