ءوڭىر باسشىسى ەرماعانبەت بولەكپاەۆ قالالىق ءماسليحاتتىڭ كەزەكتەن تىس سەسسياسىنا قاتىسىپ, اكىمدىككە كانديداتتى تانىستىردى. دەپۋتاتتار ونى قولدادى.
«مەيرام مۇرات ۇلى ۇزاق جىلدار قاراعاندىدا قىزمەت ەتتى. بارلىق سۇراقتارمەن تانىس. ەڭ باستىسى, ونى قالا تۇرعىندارى جاقسى بىلەدى. جيناعان تاجىريبەسى مەن ءبىلىمى ونىڭ قالانىڭ الەۋمەتتىك-ەكونوميكالىق دامۋى ءۇشىن الەۋەتىن جۇزەگە اسىرۋعا كومەكتەسەدى دەپ ويلايمىن. سىزدەردىڭ باسىمدىقتارىڭىز قاراعاندىلىقتار ءۇشىن قولايلى جاعداي جاساۋ بولۋى ءتيىس», دەدى ايماق باسشىسى.
ەرماعانبەت بولەكپاەۆ جاڭا اكىمگە ينفراقۇرىلىمدى ودان ءارى دامىتۋ جانە جىلۋ بەرۋ ماۋسىمىنىڭ كەدەرگىسىز ءوتۋىن قامتاماسىز ەتۋ بويىنشا مىندەتتەردى تاپسىردى.
مەيرام قوجۋحوۆ 1972 جىلى دۇنيەگە كەلگەن. 2001 جىلدان باستاپ مەملەكەتتىك قىزمەتتە. ساران قالاسىنىڭ مادەنيەت, جاستار ساياساتى, سپورت جانە تۋريزم ءبولىمىنىڭ باس مامانى بولدى. اقتاس اۋىلىنىڭ اكىمى, ساران قالاسى اكىمىنىڭ ورىنباسارى, قاراعاندى قالاسى وكتيابر اۋدانىنىڭ اكىمى قىزمەتتەرىن اتقارعان.
2022 جىلدىڭ ساۋىرىنەن وسى ۋاقىتقا دەيىن قاراعاندى قالاسى اكىمىنىڭ ورىنباسارى قىزمەتىن اتقاردى.
