دوسبول مەن تۇگىسكەن اۋىلدارى تۇرعىندارىنىڭ ايتۋىنشا, ەلدى مەكەندەر تابيعي اپاتتىڭ الدىندا تۇر. ال اتقامىنەرلەر جۇرتتىڭ جانايقايىنا التى جىلدان بەرى قۇلاق اسپاي كەلەدى. قامىققان حالىق وسىلايشا جازدىڭ قامىن قىستا ويلاپ وتىر. وتكىر ماسەلەنىڭ وڭىنان شەشىلگەنىن قالايدى. ويتكەنى حالىق بۇل ماسەلەنى كوتەرە-كوتەرە مەزى بولعان.
«اۋىل جۇرتى اعىن سۋدىڭ ازابىن تارتۋداي تارتىپ كەلەدى. سونىڭ سالدارىنان ءشوپ تە شىقپاي قالعان. ءتورت ت ۇلىك مال وسىلايشا ازىقتان قاعىلىپ وتىر. سوندىقتان دا بۇل ماسەلەنىڭ دەر كەزىندە شەشىمىن تاپقانى ماقۇل بولماق», دەيدى دوسبول اۋىلىنىڭ تۇرعىنى پەرنەبەك التىنبەكوۆ اشىنىپ.
ەلدى مەكەن تۇرعىندارى اۋىل شارۋاشىلىعى جانە ەكولوگيا مينيسترلەرىنىڭ اۋدانعا ارنايى ات باسىن بۇرىپ, جاعدايمەن تولىق تانىسقانىن قالايدى. سول ءۇشىن دە سالاعا جاۋاپتى ۆەدومستۆو باسشىلارىن اۋىلدارىنا شاقىرىپ وتىر. مينيسترلەر كەلسە, ماسەلە وزدىگىنەن شەشىمىن تابارداي ۇمىتتەرى باسىم.
سارىسۋ اۋدانىنىڭ سارتاپ دالاسىن قونىس ەتكەن جۇرتشىلىق ءتورت ت ۇلىك مالدىڭ قىرىلۋىنان ابدەن شارشاعان, مەزى بولعان. سۋدىڭ تاپشىلىعىنان بىرنەشە اۋىلدىق وكرۋگتە جايىلىم جەرلەر جارامسىز بولىپ قالعان كورىنەدى. سالدارىنان ديقاندار ەگىن سالۋدان, شوپاندار ءشوپ شابۋدان قاعىلعان ەكەن. قىسقاسى, اۋدانداعى بىرنەشە ەلدى مەكەننىڭ احۋالى دابىل قاعارلىقتاي-اق بولىپ تۇر.
«بىرنەشە جىلدىڭ بەدەرىندە 300-400-گە جۋىق ءىرى قارا مال شىعىن بولدى. سەبەبى ءمالىم عوي. سۋدىڭ جوقتىعى مالدىڭ توقتىعىنا تىكەلەي اسەر ەتىپ تۇرعانى تۇسىنىكتى. تىرشىلىك ءنارى بولماعاننان كەيىن مال اتاۋلىدا نەشە ءتۇرلى اۋرۋ تىركەلۋى ىقتيمال ەكەنىن قاپەردەن شىعارماعان ابزال. ءتىپتى ءتورت ت ۇلىك پارازيت اۋرۋىنان ولەكسەگە اينالۋى دا مۇمكىن. قىسقاسى, ماسەلەمىز تەزىرەك شەشىمىن تاپقانى دۇرىس», دەيدى دوسبول اۋىلىنىڭ تۇرعىنى تالعات ماحانوۆ.
اعىن سۋعا سۋساعان سارىسۋلىق شارۋالار كورشى تالاس اۋدانىنا كىرىپتار بولىپ وتىرعاندارىنا كۇيىنەدى. اتالعان اۋداننىڭ اتقامىنەرلەرى اعىن سۋ وزدەرىنە جەتپەي جاتقاندىقتان, كورشىلەرىنە وتە از مولشەردە جىبەرىپ وتىر ەكەن. وسىلايشا, كورشىنىڭ قاباعىن باققان شارۋالاردىڭ جۇزىنەن ىزانىڭ تابى ايقىن اڭعارىلىپ تۇر.
اۋدانداعى جەرگىلىكتى اتقارۋشى بيلىكتىڭ وكىلدەرى بىرنەشە اۋىلدىق وكرۋگتە ءتورت ت ۇلىك مال قىرىلدى دەگەندى جوققا شىعارىپ وتىر. ايتكەنمەن اعىن سۋ ماسەلەسىنىڭ وتكىر ەكەنىن بىلەدى. ايتۋلارىنشا, سۋ جەتكىزۋدە ماسەلەسى وتكىر بولىپ تۇرعان نۇراباي كانالىن كەڭەيتۋ جۇمىستارى الداعى جىلى قولعا الىنباق. سوعان قاراعاندا شارۋالاردىڭ جانايقايى جاقىن بىرنەشە ايدىڭ بەدەرىندە شەشىمىن تابا قويۋى ەكىتالاي سياقتى. كىم ءبىلسىن, جاۋاپتى مينيسترلەر كەلىپ, ىسكە جەدەل كىرىسسە, بالكىم جەرگىلىكتى جۇرتشىلىقتىڭ العىسىن ارقالاپ تا قالار.
«انىعىراق ايتار بولساق, تالاس وزەنى بويىنداعى ويىق سۋ تورابىنان كەيىنگى ورنالاسقان سۋ رەتتەگىش قۇرالداردى سارىسۋ اۋدانىنا دەيىنگى ارالىقتا «قازسۋشار» رەسپۋبليكالىق مەملەكەتتىك كاسىپورىنىنىڭ جامبىل فيليالى تەڭگەرىمىنە بەرۋ بويىنشا قۇجاتتار دايىندالىپ جاتىر. وسى باعىتتا جۇمىستار جۇرگىزىلمەك», دەدى سارىسۋ اۋدانى اكىمىنىڭ ورىنباسارى قايرات امانوۆ ماسەلەنىڭ مانىسىنە ءۇڭىلىپ.
سالى سۋعا كەتكەن سارىسۋلىقتار بولسىن, باسقا اۋداننىڭ شارۋالارى بولسىن, قىسى-جازى اعىن سۋدىڭ ماسەلەسىن كوتەرۋدەن شارشاعان ەمەس.
باق وكىلدەرىن ءجيى شاقىرىپ, كوكەيكەستى ماسەلەلەرىن كوتەرىپ جاتادى. وتكىر پروبلەمالار باق بەتتەرىندە قوزعالۋداي قوزعالىپ كەلەدى. الايدا وڭىردە بۇل ماسەلە ءورشي تۇسپەسە, باسىلاتىن ءتۇرى جوق. سارىسۋلىقتاردىڭ ماسەلەسىن جەدەل شەشۋگە كىمنىڭ قۇزىرەتى مەن قاۋقارى جەتەدى ەكەن؟ كىم ءبىلسىن... ءبارىن ۋاقىت كورسەتە جاتار...
جامبىل وبلىسى,
سارىسۋ اۋدانى
