مۇندا ول اننەنسكايا شاحتاسىنا ءتۇسىپ, مىس ءوندىرۋدىڭ تەحنولوگيالىق پروتسەستەرىمەن تانىسىپ, كەنشىلەرمەن اڭگىمەلەستى.
كەن ورنىندا 1780 ادام جۇمىس ىستەيدى. مۇنداعى ورتاشا جالاقى - 762 مىڭ تەڭگە.
سونداي-اق ۇەم باسشىسى «Kazakhmys Smelting» قۇرامىنا كىرەتىن جەزقازعان مىس بالقىتۋ زاۋىتىنىڭ جۇمىسىمەن تانىستى. كاسىپورىن 497 مىڭ توننا كولەمىندە مىس كونتسەنتراتىن وڭدەيدى جانە جىلىنا 178 مىڭ توننا كاتودتى مىس وندىرەدى.
جەزقازعان مىس بالقىتۋ زاۋىتىندا 2 مىڭنان استام ادام تۇراقتى جۇمىس ورىندارىمەن قامتاماسىز ەتىلگەن. مەتاللۋرگتەردىڭ ورتاشا جالاقىسى ايىنا 518 مىڭ تەڭگەنى قۇرايدى.
اتاپ ايتقاندا, مينيستر بىرنەشە تسەحتاردى ارالاپ, كاسىپورىننىڭ جۇمىس بارىسىمەن تانىستى. «Kazakhmys Smelting» كومپانياسىنىڭ باس ديرەكتورى جانىبەك بايعابەلوۆ زاۋىتتى جاڭعىرتۋ, ءوندىرىستىڭ كەلەسى كەزەڭدەرىن ىسكە قوسۋ تۋرالى جوسپارلارىمەن ءبولىستى. سونداي-اق ول پروبلەمالىق ماسەلەلەردى كوتەردى. ماسەلەن, بۇگىندە گاز جانە جابىق ۆاگونداردىڭ تاپشىلىعى ماسەلەسى وزەكتى بولىپ وتىر.
وڭىرلىك دامۋ ساياساتىنا جاۋاپتى ۇلتتىق ەكونوميكا مينيسترلىگى مونوقالالاردى دامىتۋ بويىنشا بەلسەندى جۇمىس جۇرگىزىپ جاتىر. بۇل باعىتتا ينجەنەرلىك جانە كولىكتىك ينفراقۇرىلىمدى جاڭعىرتۋعا, سونداي-اق مونوقالالارداعى حالىقتىڭ ءومىر ءسۇرۋ دەڭگەيىنە ەرەكشە نازار اۋدارىلادى. 2020-2022 جىلدارى قر ۇەم بيۋدجەتتىك باعدارلاماسى اياسىندا ساتپاەۆ قالاسىندا «باتىس, شىعىس اۋداندارى مەن №8 شاعىن اۋدان اۋماعىنىڭ جەر ءۇستى سۋلارىن تومەندەتۋ جانە بۇرۋ» جوباسىن ىسكە اسىرۋعا رەسپۋبليكالىق بيۋدجەتتەن 1,1 ملرد تەڭگە ءبولىندى.
جالپى العاندا, مونوقالالاردى دامىتۋ ماسەلەلەرى مينيسترلىكتىڭ تۇراقتى باقىلاۋىندا.
