قر باسەكەلەستىكتى قورعاۋ جانە دامىتۋ اگەنتتىگى توراعاسىنىڭ كولىكتەرگە ارنالعان سۇيىتىلعان مۇناي گازىنىڭ بولشەك ساۋداداعى باعاسىن رەتتەۋدى ۇزارتۋ تۋرالى بۇيرىعى 2023 جىلدىڭ 9 قاڭتارىنان باستاپ كۇشىنە ەندى.
شەكتى باعا بولشەك ساۋدادا ءار ءوڭىر ءۇشىن جەكە بەلگىلەندى. ماڭعىستاۋ وبلىسىندا سۇيىتىلعان گاز ليترىنە 50 تەڭگە, شالعاي اۋدانداردا بۇدان 5 تەڭگەگە قىمبات.
«وتكەن جىلدىڭ قاڭتارىندا ورىن العان وقيعالاردىڭ باستى سەبەپتەرىنىڭ ءبىرى – سۇيىتىلعان گاز قۇنىنىڭ كۇرت ءوسۋى بولعانى بارىمىزگە ءمالىم. قيىن شاقتا وڭىرلىك كاسىپكەرلەر پالاتاسى بىرنەشە رەت بيلىك پەن كاسىپكەرلەردى ءبىر ۇستەل باسىنا جيناپ, ديالوگقا شاقىردى. وبلىس تۇرعىندارى گاز باعاسىن ليترىنە 120 تەڭگەدەن 50 تەڭگەگە دەيىن تومەندەتۋدى سۇرادى, ولاردىڭ تالاپتارى قاناعاتتاندىرىلدى», دەيدى ماڭعىستاۋ وبلىسىنىڭ كاسىپكەرلەر پالاتاسى ديرەكتورىنىڭ ورىنباسارى امانات ماحمۇتوۆ.
باعانىڭ كۇرت ءوسۋى سۇيىتىلعان مۇناي گازىن ەلەكتروندىق ساۋدا الاڭدارىندا ساتۋعا بايلانىستى بولعاندىقتان, بولشەك ساۋدا جاساۋشىلار ءۇشىن گازدى ساتىپ الۋ قيىنعا سوقتى. سونىن سالدارىنان گاز تۇتىنۋشىلارعا ۋاقىتىلى جەتپەي, تاپشىلىق تۋىندادى.
ماڭعىستاۋ وبلىسىنىڭ كاسىپكەرلەر پالاتاسى وڭىردەگى ەكونوميكالىق تەرگەۋ دەپارتامەنتىمەن بىرلەسىپ كاسىپكەرلىك سۋبەكتىلەرىن قورعاۋ ماقساتىندا باعا ءوسىمىنىڭ ماسەلەسىن شەشۋ جانە كوگىلدىر وتىن تاپشىلىعىن جويۋ ءۇشىن بەلسەندى اتسالىستى. دەپارتامەنت قىزمەتكەرلەرى ساۋدا-ساتتىقتى ۇيىمداستىرۋشىلار جانە ولاردىڭ جوسىقسىز قاتىسۋشىلارىنىڭ جۇمىس جۇيەسىن تەكسەردى. ناتيجەسىندە قىلمىستىق ءىس قوزعالىپ, تەرگەۋ ناتيجەلەرى بويىنشا كىنالى تۇلعالار جاۋاپقا تارتىلدى.
«قازىر سۇيىتىلعان مۇناي گازىن بولشەك ساۋدادا وتكىزۋمەن اينالىساتىن كاسىپكەرلىك سۋبەكتىلەرى ونى وندىرۋشىدەن دەلدالسىز ساتىپ الادى, ءارى ۇكىمەت رەتتەيتىن باعالار بويىنشا تۇپكىلىكتى تۇتىنۋشىلارعا وتكىزەدى. بۇگىندە ايماقتا سۇيىتىلعان مۇناي گازىن قامتاماسىز ەتۋ جاعدايى تۇراقتى», دەدى امانات ماحمۇتوۆ.
